प्रेरित 24 - राना थारु नयाँ नियम

बडो हाकिम फेलिक्सके अग्गु पावल

¹ पाँच दिन पिच्छु प्रधान यहूदी पुजारी हननिया और कुछ यहूदी अगुवनको समुहनके, तर्तुल्लस नाउँको एक जनै वकिल सँग कैसरिया सहरमे आए, और बे पावलके बिरुद्धमे बडो हाकिमके अग्गु मुद्दा पेश करीं।

² जब पावलके राजा हेरोदको दरबारसे बडो-हाकिमके अग्गु लाओगओ तओ तर्तुल्लस बोके अइसे कहात दोष लागन लागो, “माननीय फेलिक्स, तुमसे हम बहुत शान्ति पाए हएं, और तुम जा जातिके ताहीं सुधार सुरु करेहओ।

³ जा बातके हम हर प्रकारसे सब ठाउँमे धन्यबादसाथ स्वीकार करत हएं।

⁴ पर हम चाँहत हएं, कि तुमर जद्धी समय नाए लैके हमर बिन्ती छुटकरीमे दया करके सुनदेबओ।

⁵ काहेकी हम जा आदमीके इतएउतए दुख देत नेँगत, संसार भरके सारा यहूदीनके बीचमे हुलदङ्गा मचात और नासरत गाउँको धार्मिक सम्प्रदायको मुख्य अगुवाके रुपमे पाए हएं।

⁶ जा मन्दिरके फिर अपबित्र करन कोसिस करि रहए, पर बो बेरा जाके हम पकणे। हमर मोशाको नियम कानुन अनुसार जाके दोष दिखानके बिचार करे रहएं।

⁷ पर सेनापति लुसियस हमरे ठिन आएके जबरजत्ती करके पावलके हमर हातसे छिनाएके लैगओ। और जाके बिरोधमे दोष लगान बारेनके तुमर ठिन आनके आज्ञा करि रहए।

⁸ अब तुम स्वयम जाको जाँच करैगे कहेसे, हम जाके लगाएभए दोषके जे सब सच्चाई बोसे पता पाएजाबैगे।”

⁹ बे यहूदी समुह फिर, जा बात सब सच्चो हए कहिके समर्थन करीं।

फेलिक्‍सके अग्गु पावल अपनो बचाओके ताहीं बोली

¹⁰ जब बडो हाकिम पावलके बोलनके ताहीं इशारा करी, तओ पावल जबाफ दइ, “बहुत बर्षसे तुम जा यहूदी जातिके आदमीनको बडो हाकिम और न्यायधीश होओ कहान बारी बात पता पाएके कारणसे, तुमर अग्गु मोके अपनो बयान देनके ताहीं उत्सहा बढो हए

¹¹ तुमके पता लागन सिकतहओ, कि मए यरूशलेम सहरको मन्दिरमे आराधना करनके ताहीं आए जम्मा बाह्र दिन इकल्लो भओ हए।

¹² मोके दोष लगान बारे आदमी नए त मोके कोइ आदमी सँग बहस करत पाइं, नए त मन्दिरमे, नए त यहूदी सभाघरमे, नए त सहरमे, नए त जनताके उसकात पाइं,

¹³ नाए त जे मोके हबए दोष लगान बारी बातको प्रमाण दए पएहएं।

¹⁴ पर जा मए तुमर अग्गु स्वीकार करत हओं, कि मए ख्रीष्टके डगरमे नेँगके मिर पुर्खाको परमेश्वरको आराधना करत हओं, जौनके यहूदी अगुवा झुठो कहातहएं। पर मए नियम कानुनमे भओ बात और अगमबक्तनको किताबमे लिखेभए सब बातमे बिश्वास करत हओं।

¹⁵ मए परमेश्वरमे आसरा करत हओं, कि धर्मी और अधर्मी दुनौके, मरे भए मैसे परमेश्वर फिरसे जिइ उठात हए कहान बारी बात जे अपनए स्वीकार करत हएं।

¹⁶ जहेमारे परमेश्वरमे और आदमीनमे मए सदादीन शुद्ध बिबेक धरन कोसिस करत हओं।

¹⁷ बहुत बर्ष पिच्छु अपन गरीब आदमीनके ताहीं दान और परमेश्वरके ताहीं बलिदान चढानके यरूशलेम सहरमे आओ रहओं।

¹⁸ बहे समय बे मन्दिरमे मोके शुद्ध होन बारो बिधि पुरा करत देखीं। हुवाँ कोइ भिड मिर पच्छु नाए लागी रहए, और हुलदङ्गा फिर नाए भओ रहए। पर हुवाँ एशिया परदेशके कोइ यहूदी आदमी रहएं, बे मोके देखी रहएं।

¹⁹ अगर मए कुछ गलत करो हओं, तओ बे मिरमे आरोप लगानके ताहीं उनहीनके हियाँ तुमर अग्गु होनके रहए।

²⁰ अथवा जे आदमी अपनए हियाँ कहिते कि जब मए महासभाके अग्गु ठाणो रहओं तओ जे मोएमे का दोष पाइं?

²¹ एकए इकल्लो दोष जो मेरे बिरुद्धमे लगाए सकत हएं, बो जा हए, कि जब मए आँगनमे ठाणके चिल्लातए कहो रहओं, ‘परमेश्वर मरे भए आदमीनके फिरसे जिन्दा करैगो कहान बारी बातमे मए बिश्वास करनके कारणसे आज तुमर अग्गु मिर मुद्दा चलरहो हए।’”

²² जा ख्रीष्टको डगरके बारेमे बडो हाकिम फेलिक्सके ठिक-ठिक ज्ञान होनके कारणसे बो जा बात सुनके उन्हएं अइसे कहिके पठाए दइ, “सेनापति लुसियस हियाँ आबैगो तओ मए मुद्दाको फैसला करदेमंगो।”

²³ तओ बडो हाकिम पावलको अच्छेसे लख्बारी करीयओ, और थुर छुट दियओ, और बोको कोइ फिर सँगीके बोको सेवा करनके ताहीं रोक मत् लगैयओ कहिके कप्तानके आज्ञा दइ।

फेलिक्‍स और द्रुसिल्‍लाके अग्गु पावल

²⁴ कुछ दिन पिच्छु बडो हाकिम फेलिक्स, अपनी यहूदी बैयर द्रूसिल्लाके सँगमे लैके आओ। बो पावलके बुलाएके, ख्रीष्ट येशू उपरको बिश्वास करनके बारेमे पावलसे सुनी।

²⁵ पर पावल “परमेश्वरके अग्गु धार्मिक आज्ञा मानके काम करन पणत हए, अपनो इच्छा उपर नियन्त्रण करन पणत हए और परमेश्वरको न्याय करन बारो दिन आएरहो हए” कहान बारी बात सुनात पेती फेलिक्स घबणियातए अइसे कही, “हुइगओ, आजके ताहीं इतकए, अब तए जाए सकत हए। मौका मिलैगो तओ मए फिरसे तोके बुलामंगो।”

²⁶ बडो हाकिम फेलिक्स बो बातके बारेमे डराइगओ, जो पावल कही रहए। पर, पावलके जेल मैसे छुटामंगो तओ कुछु रुपैया मिलैगो कि, कहिके आसरा फिर करे रहए। तभीमारे बो घरी-घरी बुलाएके बातचित करत रहए।

²⁷ अइसीयए दुई बर्ष बितिगओ, तओपिच्छु फेलिक्सके ठाउँमे पर्किअस फेस्तस बडो हाकिम बनिगओ। फेलिक्स यहूदीनके खुसी करन ताहीं, पावलके जेलमे डारके गओ।