प्रेरित 20 - राना थारु नयाँ नियम

पावल माकेडोनिया और ग्रीसमे

¹ जा हुलदङ्गा शान्‍त हुइके पिच्छु पावल प्रभु येशूके चेलनके जम्मा करके बिनको बिश्वासमे हौसला मिलए करके शिक्षा, दइके बिदा भओ और फिर माकेडोनिया परदेशको इलाका घेन गओ।

² हुवाँ पुगके बे ठाउँ-ठाउँमे जाएके प्रभुके चेलनके हौसला दइके पिच्छु, बे ग्रीक देशमे पुगे, जौनसे अखैया परदेश फिर कहात हएं।

³ हुवाँ बे तीन महिना बिताइं। तओ पिच्छु पावल पानीजहाजसे सिरिया परदेशमे जानके बिचार करी। पर बे सिरिया परदेश हुइके पानीजहाजमे जान पेती बो सुनी कि कोइ-कोइ यहूदी दलके नेता बोके पानीजहाजमे मारन योजना बनात रहएं। जहेमारे पावल माकेडोनिया परदेश हुइके सिरिया परदेश जानके निर्णय करी।

⁴ तओ यात्रामे बिरिया सहरके आदमी, पुरसको लौंणा सोपात्रोस, थेसलोनिके सहरमे रहान बारे अरिस्‍तार्खस और सिकन्दश, डर्बी गाउँके गायस, और तिमोथी लुस्त्रा गाउँसे और एशिया परदेश तक तुखिकस और त्रोफिमस बिनके सँगमे रहएं।

⁵ बे सँगी हमसे अग्गु पुगए और हमके त्रोआस गाउँमे पुगके असियात रहएं।

⁶ पर हम अखमिरी रोटीको तेवहार मनाएके पिच्छु, फिलिप्पी सहरसे जहाजमे यात्रा करके पाँच दिनमे त्रोआस सहरमे बिनके ठिन पुगे, हुवाँ सात दिन तक रहे।

युटिकस जिन्दा भओ

⁷ हप्ताको पहिलो दिनमे जब हम प्रभुभोज खानके जम्मा भए रहए। तओ पावल दुस्रे दिन जानके इच्छा करनके कारणसे बिनके सँग आधि रात तक बात चित करि रहए।

⁸ हम जमा भए घरको उपरको पाँणको कोनेम बहुत दिया रहएं।

⁹ युटिकस नाउँ भओ एक जनै जवान झ्याल ठिन बैठो रहए। पावल बहुत देरतक बात करी रहए। तओ बो सोइगओ गओ और निँधके काबुमे पणके बो तेस्रो पाँणसे गिरिगओ, तओ बो बेरा कुछ आदमी तरे उतरके आए और बो उठाइं, और बो मरीगओ रहए।

¹⁰ तओ पावल तरे उतरके बोके जौँणे गओ, और घुपटा पणके बोके गलबैयाँ डरके और कही, “मत घबणीयाबओ काहेकी बो जिन्दा हए।”

¹¹ तओ फिरके बे उपर चढेके प्रभुभोज खाइं पिच्छु सुबेरे उजियारो होनसे बहुत देरतक बात चित करके बैठे। तओ पिच्छु बिदा भए।

¹² तओ बे बा जवानके जिन्दा अवस्थामे लैगए और बहुत खुसी भए।

त्रोआस सहरसे मिलेटस गाउँतकको यात्रा

¹³ पावल बाहेक हम सब पानीजहाजमे चढके मिसिया परदेशको अस्सोस सहर तक गए। और पावलके, अस्सोस सहर तक पैदर नेँगन मन हुइके कारणसे बो अपने ताहीं अस्सोस गाउँतक इकल्लो पानीजहाजमे चढनके बन्दोबस्‍त करी रहए।

¹⁴ और जब बे हमके मिसिया परदेशको अस्सोस सहरमे भेँटीं, हम बिनके जहाजमे चढाए, और मितिलेने गाउँमे आए पुगे,

¹⁵ दुस्रो दिन हुवाँसे जहाजमे यात्रा करके खियस टापूके ढिँगै आए पुगे, और तिस्रे दिन सामोस टापूमे आए पुगे, और बोके दुस्रो दिन मिलेटस गाउँमे आए पुगे।

¹⁶ एशिया परदेशमे समय बितानके बिचार नाए हुइके कारणसे बे एफिसस सहरमे बिना घुसके जानके बिचार करीं। काहेकी बे पेन्तिकोस तेवाहरको दिन यरूशलेम सहरमे पुगन बे अड्बाडात रहएं।

एफिसस सहरके अगुवनके सँग पावलको बिदाइ

¹⁷ जब हम मिलेटस सहरमे आए पुगे, तओ पावल एफिसस सहरके मण्डलीके अगुवनके एक खबर पठाइ।

¹⁸ जब बे बिनके ठिन आए तओ पावल बिनसे कहीं, “एशिया परदेशमे पौली टेको पहिलो दिनसे, मए जम्मए समय तुमर बीचमे कौन किसिमसे बिताओ सो तुम जानत हओ।

¹⁹ पुरा नम्रतामे आँसु बहात, यहूदीको षड्यन्त्रको परीक्षामे फिर मए प्रभुको सेवा करो।

²⁰ तुमके फाइदा होन बारी बात तुमर अग्गु परचार करो और घर-घरमे सबके अग्गु शिक्षा दओ।

²¹ यहूदीनके और ग्रीक देश बारेनके, पाप छोडके परमेश्वर घेन घुमओ और हम प्रभु येशू ख्रीष्ट उपर बिश्वास करएं, करके बातको गवाही मए दओ।

²² अब देखओ, मए पबित्र आत्माको आज्ञा मानके यरूशलेम सहर घेन जातहओं, हुवाँ मोके कैसो हुइहए सो मए नाए जानत हओं।

²³ इतकए इकल्लो जानत हओं, कि हरेक सहरमे कैद और कष्ट मिर उपर आत हए करके पबित्र आत्मा मोके गवाही देतहए।

²⁴ पर मए अपनो जीबन कोइ मोलके और अपनो ताहीं प्यारो नाए मानो इतकए इकल्लो मए जानत हओं, कि परमेश्वरको अनुग्रहको अच्छो समाचारको गवाही देनके मिर दौड और प्रभु येशू ख्रीष्टसे मिलो मिर सेवाकाइ मए पुरा कर पामओं।

²⁵ अब देखओ, मए जानत हओं, कि तुम मैसे सब जनै जौन-जौनके मए परमेश्वरको राज्यको परचार करत नेँगो, तुम मोके दुबरा नाए देखैगे।

²⁶ जहेमारे आजको दिन मए तुमके गवाही देत हओं, अगर तुम मैसे कोइ येशूमे बिश्वास करे बिना मरजाबैगो, तओ बो खुनमे मेरी जिम्मेदारी नाए हए।

²⁷ काहेकी मए तुमके सब बात बताओ हओं, जो तुम जानओ करके परमेश्वर चाँहत हए।

²⁸ तुम अपन ताहीं और अपने पुरा समुहके ताहीं साबधान रहियओ। पबित्र आत्मा तुमके समुहको मण्डलीको अगुवा बनानके कारणसे तुम, ख्रीष्टको अप्नो खुनसे किन भओ परमेश्वरको मण्डलीको रेखदेख तुम करओ।

²⁹ काहेकी मोके पता हए, कि तुमर बीचमे झुठे शिक्षाक आमंगे और बिश्वासीनके बहुत नुक्सान पुगामंगे। बे उनके चिरडारन बारे बनकुत्ताके समान होमंगे जो भेंणाके मरडारत हएं।

³⁰ हियाँतककी तुमर अपने बिश्वासी समुह मैसे भणकान बारी बात मस्कन बारे आदमी आमंगे। और बे चेलनके अपने पिच्छु लैजामंगे।

³¹ जहेमारे जा सम्झके होसियार हुइयओ, कि तीन वर्षतक दिनरात आँसु बहात हरेक आदमीनके मए चेतावनी देत रहो।

³² अब मए तुमके परमेश्वरको और बाको अनुग्रहको बचनमे सौँप दओ हओं, जौनके तुमके बिश्वासमे मजबुत करैगो और परमेश्वर तुमके बो बातको हक बारो बनाबैगो, जो बासे पबित्र करेभए सबए जनैके देनके प्रतिज्ञा करीहए।

³³ मए कोइ आदमीको सोनो, चाँदी, लत्ताको लोभ नाए करो।

³⁴ तुम अपनए जान्त हओं, मिर जे हातसे काम करके मिर और मिर सँग होन बारेनको आवश्यकताके पुरा करो रहओं।

³⁵ मए सबए बातमे नमुना दओ हओं, तुम फिर अइसियए करके मेहेनत करके कमजोरके मदत करीयओ। प्रभु येशूको बचन याद करीयओ, कैसे करके बा अपनए कही हए, कि लेनसे देनो औ धन्य हए।”

³⁶ यितकए कहिके पावल सबके सँग घुँटो टेकके प्राथना करी।

³⁷ बे बहुत शोक करीं। सबए रोत पावलके गलबैयाँ डारके गलौवा चुमत बिदा भए।

³⁸ बिनसे पावल कही, कि मोके दुबरा नाए देखैगे, बे भइया जा बातमे बहुत शोक करीं। और बे बोके पानीजहाजके ठिन पुगएदइं।