प्रेरित 2 - राना थारु नयाँ नियम

पेन्तिकोस तेवहारके दिनमे पबित्र आत्मा आओ

¹ यहूदीनको पेन्तिकोसको दिनमे बे सब एक ठाउँमे इकट्ठा हुइके बैठे रहएं।

² तओ स्वर्गसे इक्बरी जोडसे हबा चलो और हबाको अबाज आओ। और बे, जौन घरमे बैठे रहएं बो घरमे हबासे भरीगओ।

³ तओ उनके अग्गु अइसो आगीको ज्वाला देखाइ पणो, जौन ज्वालाको आकार जिभ कता रहए। और बो अलग-अलग हुइके सबके उपर पणो।

⁴ तओ बे सब पबित्र आत्मासे भरीगए, और जौन बरदान पबित्र आत्मा बिनके दइ, बो अनुसार बे फरक-फरक भाषा मस्कन लागे।

⁵ बो समयमे, परमेश्वरको डर मानन बारे बादर तरए बहुत जाति रहएं, बे यहूदीके आदमी संसारको सब देशसे, तेवहार मनानके ताहीं आए रहएं और यरूशलेम सहरमे बैठे रहएं।

⁶ तओ एक हबा कता अबाज सुनके आदमीनको भिड जम्मा हुइगओ। और आदमी घबणीयाइ गए, काहेकी सब जनै अपने-अपने भाषामे चेलनके मस्कत सुन्त रहएं।

⁷ बे सब अचम्मो मानिगए और कहान लागे, “देखओ, जे जो बोलरहे हएं का सब गालील परदेशके रहान बारे आदमी नाए हएं?

⁸ जा का हुइ रहो हए, जो हम मैसे हर आदमी इन्के हमर अप्नो-अप्नो भाषामे बात करत सुनन डटे हएं।

⁹ हम मैसे कोइ आदमी पार्थी, मादी, एलामी, मेसोपोटामिया, यहूदिया परदेश, कापाडोकिया परदेश, पोन्टस और एशियाके बासिन्दा हएं।

¹⁰ और फ्रिगिया, पामफिलिया परदेश, मिश्रदेश और कुरेनी सहरके ढिँगै लिबिया देशके भागसे लैके और आसपिसके क्षेत्रके और रोम सहरको आदमी यरूशलेम घेन आन बारे यहूदी,

¹¹ क्रेट टापूके आदमी और अरब देशके आदमी फिर हएं। हम चहुँ यहूदी होएं चहुँ यहूदी धर्म लएभए औरे जातके आदमी हएं, जे परमेश्वरको करन बारो शक्तिशाली चमत्कारके बारेमे बोलो भओ अपनो-अपनो भाषामे सुनरहे हएं।”

¹² बे अचम्मो मानके छक्क पणिगए और अकमकाएके एकदुस्रेके अइसे कहान लागे, “जा का हुइ रहो हए?”

¹³ पर दुस्रे आदमी ठठ्ठा करके कहीं, “बे नयाँ दारुके नसामे हए।”

भिडके पत्रुसको उपदेश

¹⁴ तओ पत्रुस एघार चुनेभए चेलनके सँग ठाणके जोणसे कही, “ए यहूदिया परदेशके आदमीयओ और यरूशलेम सहरके आदमीयओ, तुमके जा बात बुझनके जरुरी हए। तभीमारे मिर बातके तुम ध्यानसे सुनओ।

¹⁵ तुमर सोँचो जैसो जे नसामे नाए हएं, काहेकी हबए सुबेरेको नौ इकल्लो बजो हए।

¹⁶ पर जहे बात होबैगो कहिके अगमबक्ता योएलके द्वारा पबित्र-शास्त्रमे परमेश्वर कही रहए,

¹⁷ आखिरी दिनमे अइसो हुइहए करके परमेश्वर कहात हए, ‘मए सब आदमीनके उपर मिर आत्मा देहओं, और तुमर लौंणा और तुमरी लौंणीया अगमबाणी बोलंगे, और तुमर जवान आदमी दर्शन देखंगे, और तुमर बुढेपाखे सपनादर्सी हुइहएं।

¹⁸ बे दिनमे, मए अपने दास-दासीनके अपनो आत्मा देमंगो, और बे अगमबाणी बोलंगे।

¹⁹ और बादर उपर मए अचम्मोको काम और पृथ्वी तरे खुन, आगी, और धुवाँको बद्रिमे अचम्मोको चिन्हा दिखामंगो।

²⁰ परमप्रभुको महान और उजियारो दिन आनेसे अग्गु, दिन अन्धियारो हुइ जाबैगो और जोनी खुन कता हुइजए हए।

²¹ और बो समयसे अग्गु जौन-जौन परमप्रभुको नाउँ लेहए, बे सब जनै मुक्ति पामंगे।’”

²² “इस्राएल देशके ददाभइयओ, मिर बात सुनओ। परमेश्वर येशू द्वारा तुमर बीचमे शक्तिशाली चमत्कारको काम करके अचम्मेको चिन्हा दिखाइ कहिके तुमके पतए हए। बे चिन्हनसे परमेश्वर, नासरतको येशूके अपनए पठाओ हओं कहिके प्रमाण दइ।

²³ परमेश्वर अपनो योजना और ज्ञान अनुसार येशूके तुमर हातमे सौँपदइ और तुम बाके दुष्ट आदमीनको हातमे सौँपके क्रूसमे मारनके लगाए।

²⁴ पर परमेश्वर बाके मरो भओ मैसे जिन्दा करीहए। परमेश्वर बाके मृत्युको शक्तिसे छुटाइहए काहेकी मृत्युके ताहीं येशूके अपने अधिनमे नाए धर सकत रहए।

²⁵ काहेकी दाऊद येशूके बारेमे कही हए, ‘मए प्रभुके सब दिन मेरे अग्गु देखतरहो, काहेकी बा मेरे दहिना हात घेन हए ताकी मए बे आदमीनसे नाए डराओं।

²⁶ जहेमारे मए आनन्दसे भरीगओ हओं, और मए आनन्दसे स्तुति करत हओं। तभीमारे मिर शरीर फिर आसरामे जिइतहए।

²⁷ काहेकी तुम मोके मरन नाए देबैगे और नए तुम अपने पबित्र जनको लहासके सणन देहओ।

²⁸ तुम मोके जीबनको मार्ग बताए हओ तुम मोके अपनो उपस्थितिमे आनन्दसे भरदेबैगे।’”

²⁹ “बिश्वासी ददाभइया, हमर पुर्खा राजा दाऊदके बारेमे मए तुमके निश्चयता साथ कहान चाँहत हओं, कि बो मरो और बोको लहासके चिहानमे फिर धरोगओ। और बो चिहान आजको दिनतक फिर हुनै हए।

³⁰ पर एक परमेश्वरको अगमबक्ता होनके कारणसे जा जानके कि परमेश्वर बोसे कसम खाएके बोसे बाचा करी हए कि, ‘मए तिर खानदानमे एक आदमीके तिर सिंहासनमे बैठामंगो।’

³¹ जा जानके, कि भबिष्यमे परमेश्वर का करन बारो हए। राजा दाउद, येशू ख्रीष्टके फिरसे जिन्दा होनोके बारेमे बताइ। और बो कही, ‘काहेकी तुम मोके मरो नाए रहान देबैगे; और नए त तुम अप्नो पबित्र आदमीको लहासके सणन देबैगे।’

³² जहे येशूके, परमेश्वर मरो भओ मैसे जिन्दा करी। जा बातके हम सब साक्षी हएं।

³³ अब बा स्वर्गमे परमेश्वरको दहिना हात घेन सबसे बडो सम्मानको ठाउँमे बिराजमान हए। और दौवा जैसे बाके बाचा करी रहए, उइसियए बाके पबित्र आत्मा दइ और बो पबित्र आत्मा हमके दइ हए, जैसेकी तुम आजकाल देख रहेहओ और सुनरहे हओ।

³⁴ काहेकी राजा दाऊद त स्वर्गमे नाए चढो, पर बा अपनए कहात हए: ‘प्रभु परमेश्वर मिर प्रभुसे कही, तए मिर दहिना हात घेन बैठ,

³⁵ जब तक मए तिर दुश्मनके तिर अधिनमे नाए करदेओं।’

³⁶ जहेमारे, इस्राएल देशको सारा आदमी जा बातके पक्का करके जानएं: कि परमेश्वर बहे येशूके, प्रभु और मुक्ति देन बारो ख्रीष्ट दुनौ ठहिराइ, जोके तुम क्रूसमे टाँगे।”

³⁷ जब आदमी जा बात सुनीं, तओ बे अपनएके बहुत दोषी महसुस करीं, तओ पत्रुस और चुनेभए चेलासे बे पुँछीं, “हे, बिश्वासी ददाभइया, हम का करएं?”

³⁸ पत्रुस बिनसे कही, “पाप करन छोडके परमेश्वर घेन घुमओ, और तुम पाप क्षमाके ताहीं येशू ख्रीष्टको नाउँमे तुम सबए बप्तिस्मा लेओ, तओ तुम पबित्र आत्माको बरदान पाबैगे।

³⁹ काहेकी प्रतिज्ञा तुमर ताहीं, तुमर सन्तानके ताहीं और दुर-दुरमे रहान बारो सबके ताहीं हए, जौनके प्रभु हमर परमेश्वर अपने ठिन बुलाबैगो।”

⁴⁰ और बहुत बातसे पत्रुस बिनके गवाही दइ, जे बात घरी-घरी कहिके बिनसे बिन्ती करी, कि जा खराब पिढीसे तुम अपनएके बचाओ।

⁴¹ जो कुछ पत्रुस कही, और जौन बोके बातमे बिश्वास करीं बे सब बप्तिस्मा लैं। बो दिन बिश्वासीन्को बो समुहसे लगभग तीन हजार आदमी बढिगए।

बिश्वासीनको संगती

⁴² बे चुनेभए चेलनसे, शिक्षा पान, संगती करनमे, और बे प्रभुके भोजनमे सहभागी होन और प्राथना करनमे भक्तिसाथ लागे रहात रहएं।

⁴³ यरूशलेम सहरमे सबए आदमी अचम्मो मानके डर अनुभब करीं और चुनेभए चेलनसे बहुत अचम्मोके काम और चिन्हा भए।

⁴⁴ प्रभुमे बिश्वास करन बारे सबए एकए सँग इकट्ठा होत रहएं, और जो कुछ फिर उनके सँग होत रहए बे सब एक-दुस्रे जनैके बाँटत रहएं।

⁴⁵ बे अपन सम्पति और मालसमान बेँचके जौन-जौनके जो-जो चीजको जरुरत पणत रहए सबके बे बाँट देत रहएं।

⁴⁶ बे एक मनके हुइके मन्दिरमे एकए सँग उपस्थिति होत रहएं। और प्रभुभोजके ताहीं एक-दुस्रेके घरमे जमा होत रहएं। और बे खुसीसे शुद्ध मन हुइके खानु खात रहएं।

⁴⁷ और बे परमेश्वरको प्रसंसा करत रहएं और सबए आदमी उनसे खुस रहएं। उद्धार पान बारेनको संख्या उनको झुण्डमे प्रभु दिनए-दिन बढाए देत रहए।