प्रेरित 13 - राना थारु नयाँ नियम

पावलको पहिलो परचार-यात्रा

¹ सिरिया परदेशको एन्टिओखिया सहरको मण्डलीमे अगमबक्ता और शिक्षा देन बारे आदमी बहुत रहएं। बे बारनाबास, निगेर कहान बारो शिमियोन, कुरेनी सहरको लुकियस, राजा हेरोदए सँग हुर्को भओ मनेन और शाऊल रहएं।

² जब बे उपवास सहित प्रभुकी आराधना करनडटे रहएं, तओ पबित्र आत्मा कही, “मेरे ताहीं बारनाबास और शाऊलके मेरी सेवा करनके ताहीं अलग करओ जोके ताहीं मए उनके बुलाओ हओं।”

³ बे फिरसे उपवास बैठे और प्राथना करतए बे दुई जनैके उपर अपने हात धरीं और बिनके परमेश्वरको काम करनके ताहीं पठाइं।

⁴ पबित्र आत्मासे पठाए भए बारनाबास और शाऊल एन्टिओखिया सहरसे नेँगीं। बे एन्टिओखिया सहरसे सिलुकिया सहरमे गए जहाँ पानीजहाज ठाणे होत हएं। हियाँसे बे समुन्दरको यात्रा करके साइप्रस टापूमे सलामिस सहरमे गए।

⁵ सलामिस सहरमे जाएके यहूदी सभाघरमे घुसके बे परमेश्वरको बचन सुनान लागे। बो काममे मदत करनके ताहीं बे मर्कूस कहान बारो यूहन्नाके फिर सँगमे लैगए रहएं।

⁶ जाके पिच्छु बे सबए टापूके एक गाउँसे दुस्रे गाउँकी यात्रा करीं और अन्तिममे बे पाफोस सहरमे पुगीगए। हुवाँ बे एक बार-येशू कहान बारो यहूदिया परदेशके जादुगरके भेँटीं। बो अपनएके मए अगमबक्ता हओं कहात रहए।

⁷ बो जादुगर, साइप्रस टापूको बडो हाकिम सर्गीयस पौलस सँग बैठत रहए। सर्गीयस पौलसको घरमे जाए करत रहए। सर्गीयस पौलस एक बुद्धिमान आदमी रहए। हाकिमके परमेश्वरको बचन सुननके इच्छा भओके कारणसे बारनाबास और शाऊलके बुलान पठाइ।

⁸ पर एलुमास जादुगर (एलुमासके ग्रीक भाषामे बोको नाउँको अर्थ जादुगर हए), बारनाबास और शाऊलके सामना करके येशुमे बिश्वास करनसे बडो हाकिम सर्गीयस पौलससे रोकन खोजी।

⁹ तओ शाऊल, जौनसे पावल फिर कहात हएं, बो पबित्र आत्मासे भरके जादुगरके एक नजर लगाएके देख्तए कही,

¹⁰ “तए शैतानको लौंणा, सारा धार्मिकताको दुस्मन, और खराब बातसे भरोहए। का तए प्रभुको सुध डगरके टेणो करन कब्ही नाए छोडैगो?

¹¹ अब देख, प्रभु तोए दण्ड देन बारो हए। तए अन्धरा हुइके कुछ समय तक घामुको उजियारो फिरसे नाए देख पाबैगो!” तओ बहे बेरा कोहोरा और अंधियारो बोके तोपदइ, और बो अन्धरा हुइगओ और हातसे इतएउतए सहारा ढुँणन लागो।

¹² तओ प्रभुको शिक्षामे भओ शक्ति देखके बडो हाकिम अचम्मो पणो और बो प्रभु येशूमे बिश्वास करी।

पिसिदियास जिल्लाको एन्टिओखिया सहरमे पावलको शिक्षा

¹³ पावल और बक सँगी पाफोस सहरसे पानीजहाजमे चढके पामफिलिया परदेशको पर्गा सहरमा पुगे। हुवाँसे मर्कूस कहान बारो यूहन्ना पावल और बारनाबासके छोडके यरूशलेम सहर घेन घुमिगओ।

¹⁴ पावल और बारनाबास पर्गा सहरसे अग्गु बढके गलातिया परदेशको पिसिदिया जिल्लाके ढिँगै एन्टिओखिया सहरमे पुगे, और पबित्र दिनमे बे दुई जनै यहूदी सभाघरमे जाएके बैठे।

¹⁵ अब मोशाको नियम कानुन और अगमबक्तनको किताबसे पढनके बाद यहूदी सभाघरको मुखिया पावल और बारनाबासके बुलाएके कहीं, “हे बिश्वासी ददाभइया! अगर तुमरसँग आदमीनके ताहीं सहास देन बारी कुछ बातहएं कहेसे बताबओ।”

¹⁶ जा सुनके पावल उठो और उनके शान्त करनके ताहीं हातसे इसारा करके मस्कन लागो, “हे इस्राएल देशके आदमी और परमेश्वरसे डरान बारे गैर-यहूदी, सब जनै सुनओ,

¹⁷ इस्राएल देश बारे जातिनको परमेश्वर हमर पुर्खनके छानी और जब बे मिश्रदेशमे रहएं तओ बिनके महान जाति बनाइ। अपनो पराक्रमी शक्ति दिखाएके परमेश्वर बिनके मिश्रदेशसे निकारके लाइ।

¹⁸ बे जंगली इलाकामे रहात पेती परमेश्वर चालिस सालतक बिनको रेखदेख करी, तहुँफिर बे घरी-घरी बाकी आज्ञाके उलंघन करीं।

¹⁹ बा कनान देशके सात गैर-यहूदीके आदमीनके नाश करी और बो देश हमरे पुर्खनके दइ।

²⁰ बो बेरा तक चार सओ पचास बर्ष कटिगओ रहए। तओ फिर परमेश्वर बिनके बीचमे न्याय करनके ताहीं न्यायधिसन्के खटाइ। बे न्यायधिस पालि-पाला करके अगमबक्ता शमूएलके पालातक काम करीं।

²¹ जब शमूएल अभौतक उनको अगुवा रहए, तओ पिच्छु हमरे पुर्खा राजाको माँग करीं और परमेश्वर उनके बेन्यामीन कुलको कीशको लौंणा शाऊलके राजा बनाइ। शाऊल चालिस सालतक इस्राएलके आदमीनमे राज्य करी।

²² परमेश्वर, शाऊलके पदसे हटाएके बोके ठाउँमे दाऊदके राजा बनाइ। दाऊदके बारेमे परमेश्वर अइसे गवाही दइ हए, ‘मोके एक आदमी, यिशैको लौंणा दाऊद, मेरे मनके अनुसार मिलिगओ हए। बो मेरी सब इच्छाके पुरा करैगो।’

²³ अपनो करोभओ बाचा पुरा करके परमेश्वर इस्राएल देशमे रहान बारेनके ताहीं दाऊद राजाको कुलमे एक मुक्तिदाता पठाइ, जो येशू हए।

²⁴ येशू अपनो सेवा सुरु करनसे अग्गु बप्तिस्मा देन बारो यूहन्ना आओ। और इस्राएल देशके सबए आदमीनके ‘पाप छोडके परमेश्वर घेन घुमन और बप्तिस्मा लेन जरुरी हए’ करके परचार करी।

²⁵ और जब बप्तिस्मा देन बारो यूहन्ना अपनी सेवा पुरा करनमे रहए, तओ बो कही, ‘तुम मोके का सम्झत हओं? मए ख्रीष्ट नाए हओं! पर देखओ, मेरे पिच्छु एक आन बारो हए, बो मोसे बहुत जद्धा महान हए जो कि मए बाको पाउँको जुताको तनी खोलनको लायक फिर नाए हओं।’

²⁶ हे बिश्वासी ददाभइया, चहुँ हम अब्राहामके सन्तान होएं चहुँ हम परमेश्वरसे डरान बारे गैर-यहूदी होएं, परमेश्वर तुमर ठिन येशूके बारेमे जा सन्देश पठाइ हए जो आदमीनके बचात हए।

²⁷ यरूशलेम सहरके आदमी और उनके अगुवा येशू ख्रीष्टके नाए चिन पाइं। और बे अगमबक्तनको बो बचनके नाए सम्झीं, जौनके बे हर पबित्र दिनमे पढत रहएं। जहेमारे बे येशूके दोषी ठहिराइं और बाके मृत्युदण्ड दइके बे धर्मशास्त्रमे बाके बारेमे लिखेभए बातके पुरा करीं।

²⁸ मृत्युदण्ड देनके, कोइ दोष नाए पाएके फिर बे येशूके मारन पणैगो कहिके बडो-हाकिम पिलातससे बिन्ती करीं।

²⁹ और अइसियए धर्मशास्त्रमे बाके बारेमे लिखेभए सब बात पुरा करके बे बाके क्रूससे उतारीं और चिहानमे धरीं।

³⁰ पर परमेश्वर येशूके मरो भओ मैसे जिन्दा करी।

³¹ और बहुत दिनतक येशू गालील परदेश मैसे यरूशलेम सहरमे आन बारे अपन चेलनके ठिन दिखाइ देतए रहो। और अब आदमीनके ठिन जेहीँ इकल्ले साक्षी रहएं। काहेकी जे येशूके देखी रहएं।

³² अब हम तुमके जा अच्छो समाचार परचार करत हएं, जो प्रतिज्ञा परमेश्वर पुर्खानसे करी रहए,

³³ कि परमेश्वर, येशू ख्रीष्टके मृत्युसे जिन्दा करके, बहे प्रतिज्ञा हमरे सन्तानके ताहीं पुरा करी; जैसे भजनसँग्रहमे परमेश्वर ख्रीष्टके बारेमे बताइ हए, ‘तए मिर लौंणा हए; और मए तेरो दौवा बनीगओ हओं।’

³⁴ बाके कभी फिर नाए मरन पणए करके जिन्दा करैगो, कहान बाली बातमे परमेश्वर अइसे कही हए ‘दाऊदसे प्रतिज्ञा करोभओ पबित्र और अटल आशिष मए तुमर बीचमे पठामंगो।’

³⁵ जहेमारे फिरसे, भजनसँग्रहमे राजा दाऊद अइसे लिखी हए, ‘हे परमेश्वर, तुम अपनो पबित्र जनको शरीर सणन नाए देबैगे।’

³⁶ जा बात दाऊद अपनो बारेमे नाए कही रहए काहेकी परमेश्वरको इच्छामे काम करके राजा दाऊद मरिगओ और अपनो पुर्खनके सँग गणोगओ रहए। जहेमारे हम जानत हएं, कि राजा दाऊद अपने बारेमे नाए मस्कनडटो रहए।

³⁷ पर परमेश्वर, बो येशूके बारेमे बात करनडटो रहए जौनके परमेश्वर जिन्दा करी, बो सणनके नाए पाइ।

³⁸ जहेमारे प्यारे बिश्वासी ददाभइया, तुम जानलेओ, कि येशूके द्वारा पाप क्षमाको अच्छो समाचार तुमके दओ जात हए।

³⁹ येशू ख्रीष्टमे बिश्वास करन बारे सब पापसे छुटकारा पाएके परमेश्वरके अग्गु ठिक ठहिरत हएं। जा छुटकारा मोशाको नियम कानुनसे तुमर ताहीं सम्भब नाए रहए।

⁴⁰ जहेमारे होसियार होबओ, नत अगमबक्ताके किताबमे कही जा बात तुमर उपर आए पणंगी:

⁴¹ ए, बेज्जत करन बारे, देखओ और अचम्मो मानओ, और नष्ट हुइजाओ, काहेकी तुमर समयमे मए अइसो एक काम करंगो, बो कामके बारेमे कोइ तुमके बताएसे फिर तुम बिश्वास नाए करैगे।”

⁴² जब पावल और बारनाबास यहूदी सभाघरसे निकरन डटे रहएं, आदमी बिनसे बिन्ती करन लागे, कि आन बारो पबित्र दिनमे हमके जा बात फिरसे सुनाओ जाए।

⁴³ जब यहूदी सभाघर निभटके बिदा भए, तओ बहुत आदमी यहूदी दलके नेता और यहूदी धर्म मानन बारे भक्त मनै, पावल और बारनाबासके पिच्छु लग्गए। पावल और बारनाबास उनसे बात करके, रोज परमेश्वरके अनुग्रहमे रहे रहियओ कहिके बिन्ती करीं।

⁴⁴ अग्लो पबित्र दिनमे गाउँके लगभग सब आदमी परमेश्वरको बचन सुननके ताहीं इकट्ठा हुइगए।

⁴⁵ पर यहूदी अगुवा भिडनके देखके दिक्कसे भरीगए और पावलको बत्काओ भओ बातके बिरोध करतए उनको बदनाम करन लागे।

⁴⁶ तओ पावल और बारनाबास नाए डराएके कहीं, “परमेश्वरको बचन सबसे पहिले तुमके सुनान जरुरी रहए, पर तुम सुनन नाए मानत हओ। तुम अपनएके कभी फिर नाश नाए होन बारो जीबनको अयोग्य ठहिरे हओ। जहेमारे अब हम गैर-यहूदीनके ठिन जामंगे।

⁴⁷ काहेकी प्रभु हमके जा आज्ञा दइ हए, ‘मए तोके जाति-जातिके आदमीके ताहीं ज्योति ठहिराओ हओं, ताकी तुमके संसारमे हर ठिहा आदमीनके ठिन जाओ, और उनके बताओ कि परमेश्वर उनके कैसे बचान चाँहत हए।’”

⁴⁸ जा बात सुनके गैर-यहूदी खुसी होत परमेश्वरको दओ भओ अच्छो समाचारको प्रसंसा करन लागे। कभी फिर नाश नाए होन बारो जीबनके ताहीं अग्गुवएसे परमेश्वरसे चुनेभए आदमी येशू ख्रीष्टमे बिश्वास करीं।

⁴⁹ परमेश्वरको बचन बो परदेशमे सबए घेन फैलीगओ।

⁵⁰ पर यहूदी अगुवा, भक्ति करन बारे उच्च श्रेणीके बैयर और सहरके नेतनके समेत पावल और बारनाबासके बिरोधमे उपद्र करनके उठाइं और बे दुई जनैके बो परदेशको सिमानासे बाहिर निकार दइं।

⁵¹ तओ पावल और बारनाबास उनके अग्गु अपन पौलीको धुधर टकटकाएके आइकोनियन सहरमे आए, उनके जा दिखानके ताहीं, कि परमेश्वर उनके अस्वीकार करदइ हए और उनके दण्ड देबैगो।

⁵² और आइकोनियन सहरमे चेला आनन्दसे और पबित्र आत्मासे भरिगए।