प्रेरित 10 - राना थारु नयाँ नियम

पत्रुस और कर्नेलियस

¹ कैसरिया सहरमे कर्नेलियस नाउँको एक आदमी रहए, जो इटालिया कहान बारो पल्टनको एक कप्तान रहए।

² बो परमेश्वरको आराधना करत रहए, बो और बोको अपनो सारा परिवार समेत परमेश्वरको डर मन्त रहएं। और गरीब आदमीनके बहुत दान देत रहएं और घरी-घरी परमेश्वरसे प्राथना करत रहएं।

³ एक दिन दुपहारके लगभग तीन बजे घेन दर्शनमे स्पष्ट रुपसे देखी, कि परमेश्वरको एक स्वर्गदूत बोके ठिन भितर आएके कही, “ए कर्नेलियस!”

⁴ कर्नेलियस स्वर्गदूतके ध्यानसे देखी और डराएके कही, “का आज्ञा हए प्रभु?” बा कर्नेलियससे कही, “तेरे प्राथना और तेरे दान स्मरणके ताहीं परमेश्वरको अग्गु पुग्गए हएं।

⁵ और अब कोइ आदमीके योप्पा गाउँमे पठा, और पत्रुस कहान बारो सिमोनके बुलान पठा।

⁶ बो खलरीको काम करन बारो सिमोनके घरमे बैठो हए, जौनको घर समुन्दर किनारे हए।”

⁷ जब कर्नेलियससे मस्कन बारो स्वर्गदूत बिदा भओ, तओ कर्नेलियस अपनो दुई नोकर और परमेश्वरसे डर मानन बारो एक सिपाहीके बुलाइ। बो सिपाही रोजए कर्नेलियसको सेवा-टाहाल करत रहए।

⁸ कर्नेलियस अपना देखीभइ सब बात बताएके बिनके योप्पा गाउँमे पठाइ।

पत्रुसको दर्शन

⁹ दुस्रे दिन कर्नेलियस द्वारा पठाए गए बे तीन लोग चल्तए-चलत योप्पा गाउँके ढिँगै पुगे, तओ दुपहारके बाह्र बजे घेन पत्रुस प्राथना करन घरको छतमे चढो।

¹⁰ प्राथना करतए-करत बोके भुँख लागी और कुछ खान चाँहत रहए, पर जब बे खानु तयार करत रहएं तओ पत्रुसको ध्यान मगन हुइगओ और अचम्मको बात देखी,

¹¹ स्वर्ग उघरो और हुवाँसे एक बडो तन्ना चारौ कोनेमे बँधो कता पृथ्वी घेन झरनडटो देखी।

¹² बो तन्नामे सब मेलके चार टांगके जानबर और घिसटके नेँगन बारे जन्तु और बादरके चिरैंचिरगुनी रहएं।

¹³ और बोके एक अइसियए अबाज सुनाइ दइ, “ए पत्रुस उठ, और मारके खा।”

¹⁴ पर पत्रुस कही, “नाए प्रभु, कब्ही नाए; काहेकी मए कब्हु कोइ अपबित्र और अशुद्ध चीज नाए खाओ हओं।”

¹⁵ पर फिरसे अइसो अबाज आओ, “जो कुछ परमेश्वर शुद्ध करदइ हए, बोके तए अशुद्ध मत् कहो।”

¹⁶ तीन चोटीतक अइसियए भओ; तओ तुरुन्त बो तन्ना स्वर्गमे उठाओ लैगओ।

¹⁷ जब पत्रुस अपना देखो भओ दर्शनको अर्थ का हुइहए करके मनए-मनमे अन्योलमे पणो रहए। बहेबेरा कर्नेलियस द्वारा पठाए गए आदमी सिमोनके घर पता लगाएके फाटक अग्गु ठाणे।

¹⁸ और बुलाएके पुछन लागे, “पत्रुस कहान बारो सिमोन हियाँ बैठो हए कि?”

¹⁹ जब पत्रुस दर्शनके बारेमे बिचार करत रहए तओ पबित्र आत्मा बोसे कही, “देख, तीन आदमी तोके ढुणरहे हएं।

²⁰ बे गैर-यहूदी होएसे फिर उठ, और तरे जा, और नाए हिचकिचाएके बिनके सँग जा, काहेकी बिनके मए पठाओ हओं।”

²¹ तओ पत्रुस उत्रो, और बे आदमीनके ठिन जाएके कही, “देखओ, जौनके तुम ढुणरहे हओ बो आदमी महिं हओँ, तुम हियाँ का कामके ताहीं आए हओ?”

²² बे कहीं, “कप्तान कर्नेलियस, जो धार्मि, परमेश्वरसे डर मानन बारो और सारा यहूदी जातिसे सम्मान पाओ एक आदमी हए, बो एक पबित्र स्वर्गदूतसे जा हुकुम पाइहए, कि तोके अपने घर बुलाएके तोसे सन्देश सुनए।

²³ तओ पत्रुस उनके भितर बुलाएके उन्हए रहानके ताहीं ठाउँ दइ। और दुस्रे दिन, पत्रुस उनके सँगमे गओ; और योप्पा गाउँमे भए प्रभुमे बिश्वास करन बारे कुछ बिश्वासी ददाभइया फिर बे आदमीनके सँग गए।”

कर्नेलियसके घरमे पत्रुस

²⁴ दुस्रे दिन बे कैसरिया सहरमे पुगे, और कर्नेलियस अपनो घनिष्ट नातेदारनके और सँगीन्के इकट्ठा करके पत्रुसको आसरा देखत रहए।

²⁵ जब पत्रुस भितर आनडटो रहए, तओ कर्नेलियस पत्रुससे भेँट करी और बोके पाउँमे आदर देनके ताहीं प्रणाम करी।

²⁶ पर पत्रुस कर्नेलियसके अइसे कहात उठाइ, “उठ, मए फिर त आदमीयए हओं, मेरी आराधना मत् करए।”

²⁷ तओ पत्रुस कर्नेलियससे बातचित करत घर भितर गओ, और हुवाँ बहुत आदमी जमा भए पाइ।

²⁸ तओ पत्रुस बिनसे कही, “हम जाति-जातिके आदमीके आदमी सँग सँगत कर्नो, वा उनके भेँट करन एक यहूदी आदमीनके ताहीं हमर नियम कानुनके बिरुद्ध हए कहान बारी बात तुम सबके पतए हए। पर कोइ फिर आदमीके अशुद्ध नाए ठहिरान पणत हए कहिके अब परमेश्वर मोके दिखाइ हए।

²⁹ जहेमारे जब मए बुलाओ गओ, तओ बिना कुछ कहे हियाँपर चलो आओ। अब मए पुँछत हओ, कि मोके कौन कामके ताहीं बुलाए हओ?”

³⁰ कर्नेलियस कही, “चार दिन पहिले, जहे समय, मए अपने घरमे दुपहारके तीन बजे प्राथना करनडटो रहओं तओ एक लोग चम्कन बारो लत्ता लगाओ भओ मिर अग्गु आएके ठाणो, और कही,

³¹ ‘ए कर्नेलियस, परमेश्वर तेरो प्राथना सुनी हए और तए गरीबनके करोभओ दानको कामके याद करीहए।

³² जहेमारे कोइके योप्पा गाउँमे पठाएके सिमोन कहान बारो पत्रुसके बुला। बो समुन्दरके किनारे खलरीको काम करन बारो सिमोनके घरमे बैठो हए। जब बो आबैगो, तओ बो तुमके परमेश्वरके तरफसे एक सन्देश बताबैगो।

³³ तओ मए तुरन्त तेरे ठिन आदमी पठाओ। और तए जा अच्छो करो, कि हियाँ आइगओ। अब परमेश्वर तोके आज्ञा करोभओ बातके सुननके हम सबए प्रभुके अग्गु इकट्ठा भए हएं।’”

कर्नेलियसके घरमे पत्रुसको उपदेश

³⁴ तओ पत्रुस कहान लागो, “नेहात्तओ परमेश्वर सबए आदमीनसे बरोबर ब्यबहार करत हए। जा बात अब मोके पता भओ।

³⁵ पर जाति-जातिके आदमीन मैसे चहुँ जौन जातिको होएसे फिर, परमेश्वरके आदर करन बारो और ठिक काम करन बारो आदमीके इकल्लो बा स्वीकार करत हए।

³⁶ तुम बो सन्देशके जान्त हओ, जो परमेश्वर हमके, अर्थात् इस्राएल देश बारे आदमीनके पठाइ रहए। बा शान्तिके बारेमे अच्छो समाचार परचार करी, जो आदमीनके येशू ख्रीष्टमे बिश्वासके द्वारा मिलसकत हए। बा सब आदमीनको परमेश्वर हए।

³⁷ बो बचन तुम जान्तए हओं, जो यूहन्नाको बप्तिस्माको परचारके पच्छु गालील परदेशसे सुरु हुइके सारा यहूदिया परदेशमे फैलीगओ।

³⁸ परमेश्वर नासरत गाउँको येशूके खटाएके अपनुवए पबित्र आत्मा और शक्ति बामे अख्नाइ। परमेश्वर येशूके सँग होएके कारण बा भलाइको काम करतए, शैतान लगे भएनके अच्छो करत सब ठाउँमे गओ।

³⁹ बा यहूदिया परदेशमे और यरूशलेम सहरमे करेभए सब बातकी हम साक्षी हएं। यरूशलेम सहरमे यहूदी अगुवा बाके क्रूसमे टंगलाएके मारीं।

⁴⁰ पर तिसरे दिनमे परमेश्वर बाके मरो भओ मैसे जिन्दा करी और बा आदमीनके बीचमे प्रकट करबाइ।

⁴¹ सबए आदमीनके त बा नाए दिखानो, पर बा जिन्दा होनके बाद, बाके सँग खानपिन करन बारेनके ठिन दिखाइ पणो, काहेकी परमेश्वर हमके जा घटनाको साक्षी बनानके ताहीं हमके पहिलीएसे चुनी रहए।

⁴² और बा हमके आज्ञा दइ हए, कि सब आदमीनके परचार करओ और गवाही देओ, कि जा येशू बहे हए जौनके परमेश्वर जिन्दा भएनको और मरेभएनको न्याय करन खटाइ हए।

⁴³ सबए अगमबक्ता बाको गवाही दइं रहएं। बामे बिश्वास करन बारे बाको नाउँको शक्तिके कारण अपने पापसे क्षमा पामंगे।”

गैर-यहूदीनमे पबित्र आत्मा आओ

⁴⁴ पत्रुस जे बात बतकातए-बतकात बचन सुनन बारे सबमे पबित्र आत्मा आइगओ।

⁴⁵ परमेश्वर अपनो पबित्र आत्माको बरदान गैर-यहूदी आदमीके उपर फिर अख्नाओ देखके पत्रुस सँग आएभए खतना करेभए बिश्वास करन बारे यहूदी बिश्वासी अचम्मो मानीं।

⁴⁶ काहेकी बे सुनन बारे फरक-फरक भाषनमे मस्कत और परमेश्वरको प्रसंसा करत बे सुनीं। तओ पत्रुस कही,

⁴⁷ “हमएं कता जे फिर परमेश्वरके घेनसे पबित्र आत्मा पाइ हएं! अब जे आदमीनके पानीको बप्तिस्मा लेनसे कौन रोक पएहए?”

⁴⁸ जहेमारे जो कर्नेलियसके घरमे जमा भए रहएं सबके “येशू ख्रीष्टके नाउँमे बप्तिस्मा लेओ” करके पत्रुस आज्ञा दइ। तओ फिर बे पत्रुसके कुछ दिनतक अपने सँग बैठन बिन्ती करीं, और जहेमारे बो कुछ दिनके ताहीं रुकिगओ।