2 पतरस 1 - राना थारु नयाँ नियम

¹ मए सिमोन पत्रुस, तुमर ताहीं जा चिट्ठी लिखनडटो हओं, मए येशू ख्रीष्टको सेवक और चुनो भओ चेला हओं। मए तुम सबके लिखनडटो हओं, जौन हम सबके समान अनमोल बिश्वास प्राप्त करीहए। जा बिश्वास हमर परमेश्वर और मुक्तिदाता येशू ख्रीष्टद्वारा हमके दओगओ हए, जौन हमके परमेश्वर द्वारा धर्मी बनातहए।

² मए प्राथना करत हओं, कि परमेश्वर और येशू हमर प्रभुको ज्ञानमे तुम बढतए जात पेती परमेश्वर तुमके बहुतसे बहुत अनुग्रह और शान्ति देबए।

ख्रीष्टको बुलावट और चुनाव

³ परमेश्वर अपनो ईश्वरीय शक्ति द्वारा बाके खुसी बनान बारो जीबन जिनके ताहीं हमके चाहो भओ सब चीज दइ हए। जा सम्भब हए, काहेकी हम परमेश्वरके चीन्हत हएं और बहे हए जो हमके अपनो महिमा और नैतिक भलाइ द्वारा हमके अपनो आदमी होनके बुलाइ हए।

⁴ और बाको महिमा और भलाइके कारण बा हमके बहुत बडो और अनमोल प्रतिज्ञा दइ हए। जे बरदान इस्तमाल करके हम जा संसारको खराब इच्छनसे बचपामंगे, जौन आदमीनके नष्ट करत हए और ईश्वरीय स्वभाबमे हम सहभागी होन सिकत हएं।

⁵ काहेकी तुम परमेश्वरको स्वभाबमे सहभागी होन बनाए गए हओ, तुम ख्रीष्टमे बिश्वास करन इकल्लो नाए, बल्कि तुम दुस्रेनके ताहीं रोज अच्छो काम करनके कोसिस फिर करन पणत हए। तुम असल काम करन बारे इकल्लो नाए, पर तुम बुद्धिमान तरिकासे ब्यबहार करन बारे आदमी बनन पणत हए,

⁶ तुमके जहे इकल्लो जाननके नाए कि, समझदारीसे कैसे ब्यबहार करनके हए, बल्कि तुम बे बुरे कामनके फिर नाए करनके हए जो तुम करन चाँहत हओ। तुमके अच्छे कामनमे इकल्लो नाए, बल्कि तुमके कठिनाइमे फिर स्थिर होन पणो। तुमके स्थिर इकल्लो नाए होन हए, बल्कि तुमके अइसे जीइनके हए जोके द्वारा परमेश्वरको प्रसंसा होबए।

⁷ तुम सिरफ परमेश्वरके खुसी बनान किसिमसे जीबन मत् बिताओ, बल्कि अपनुवए परिवारको सदस्य कता तुमके एकदुस्रेनके प्रेम करन पणो। तुमके सिरफ अपनी परिवारको सदस्य कता तुम एकदुस्रेनसे प्रेम करनके नाए, बल्कि तुम्के सबए आदमीनसे प्रेम करन पणो।

⁸ अगर जे सब बात तुममे हएं औ बढरहे हएं कहेसे, जे बातसे हमर प्रभु येशू ख्रीष्टको ज्ञानमे तुमके काम लागन बारो और फलदायी होनके मदत करैगो।

⁹ पर अगर एक आदमी अइसे जीबन नाए बितए हए कहेसे, बो एक अच्छेसे नाए देखपान बारो और अन्धरा आदमी कता हए। बो जा भुलो हए, कि ख्रीष्टमे बिश्वास करनसे पहिले बोको करेभए पाप परमेश्वर क्षमा करीहए।

¹⁰ जहेमारे बिश्वासी ददाभइया, अपनएके और दुस्रे आदमीनके जा दिखान औ जद्धा असल ब्यबहार करनके कोसिस करओ, कि परमेश्वर तुमके अपनो आदमी होन चुनीहए और बुलाइ हए। अगर तुम उइसे करैगे कहेसे, तुम नेहात्तओ फिर परमेश्वरसे कभी अलग नाए होबैगे।

¹¹ और जाके सँगएसँग परमेश्वर तुमके येशू ख्रीष्ट भओ राज्यमे भव्य स्वागत करैगो, जो हमर प्रभु और मुक्तिदाता हए, बा हुवाँ सदादीनके ताहीं राजा हुइके राज्य करैगो।

पबित्र शास्त्रको अगमबाणी

¹² मए तुमके जे बातके बारेमे घरी-घरी सम्झातए रहानके कोसिस करत हओं, होन त तुमके बे बातके बारेमे पहिलीए पता हए और तुम पक्का हओ, कि बे बात सच्चे हएं।

¹³ मोके पता हए, कि मए जिन्दा रहानतक तुमर सँग बे बातके बारेमे बत्कातए रहान ठिक हए, ताकी तुम बे बात नाए भुलओ।

¹⁴ काहेकी मए जानत हओं, कि मए जल्दीए मरंगो, काहेकी हमर प्रभु येशू ख्रीष्ट मोके स्पष्ट रुपमे बो दिखाइ दइ हए।

¹⁵ तभीमारे मए तुमके जे बात अभए लिखके कडा मेहेनत कररहो हओं, ताकी मए मरनके बाद तुम जे बात सदा दिन याद करपाबओ।

ख्रीष्टको महिमाको साक्षी

¹⁶ जब हम चुनेभए चेला तुमके हमर प्रभु येशू ख्रीष्टको शक्ति और आगमनको बारेमे परचार करे रहएं, तओ चलाँख हुइके हम तुमर ताहीं बनाए भए, लिखी कहानी नाए बताए रहएं। बरु हम अपनए ख्रीष्टको बडो महिमा देखे हएं।

^17-18 हम बाके सँग पबित्र पहाडमे रहएं, जब येशू ख्रीष्ट दौवा परमेश्वरसे आदर और महिमा प्राप्त करी। बो बेला प्रतापमय महिमा, परमेश्वरसे येशूके अइसो कहात अबाज आओ, “जा मिर अपनुवए प्यारो लौंणा हए, जासे मए बहुत खुसी हओं।” हम अपनए फिर स्वर्गसे आओ भओ जा अबाज सुने।

¹⁹ जहेमारे हम अगमबक्तनके द्वारा लिखेभए पबित्र-शास्त्रमे औ जद्धा भरोसा करत हएं। अगर तुम जा सन्देशमे ध्यान दए कहेसे तुम अच्छो काम करैगे, काहेकी जा सुबेरे नाए होनतक अन्धकारमे चमकतए रहान बारो दिया कता हए, और सुबेरेको तारा संसारमे ज्योति लाओ कता, ख्रीष्टको ज्योति तुमर हृदयमे चम्कैगो।

²⁰ सबसे जरुरी बात जा हए, कि तुम सम्झत हओ कि कोइ फिर अपनी शक्तिसे परमेश्वरको भबिष्यबाणीके सम्झनको लायक नाए हए जो पबित्र-शास्त्रमे दओगओ हए।

²¹ काहेकी कोइ फिर भबिष्यबाणी कभु फिर आदमीसे नाए आओ। पबित्र आत्मा अगमबक्तनको मनके चलाइ, और बे परमेश्वरको सन्देशके आदमीनके बताइं।