1 तिमोथी 6 - राना थारु नयाँ नियम

ख्रीष्टियन कमैयनको बानी

¹ सब बिश्वासी जो कमैया हएं, उनके हर तरिकासे अपने-अपने मालिकन्को आदर करन पणत हए, ताकी अन्य आदमी परमेश्वरको बदनाम और हमर शिक्षाके अपमान नाए करएं।

² और जौननके मालिक बिश्वासी हएं, मालिकके बे बिश्वासी ददाभइया होनके कारण मालिकनके ठिक सम्मान देमएं; बल्कि उनके कमैयनके ताहीं और मेहेनतसे काम करन चाहो, काहेकी उनके फाइदा होनो अपनुवए प्यारो बिश्वासी दादा-भइयनके फाइदा होनो हए। जे बातनको उपदेश दएकर और बिनको पालन करनके ताहीं सबके उत्साहित कर।

³ अगर कोइ झुठी शिक्षाको उपदेश देतहए, और बहे साच्ची शिक्षामे सहमत नाए होत हएं, जो शिक्षा हमरे प्रभु येशू ख्रीष्ट दइ रहए। और बहे आदेश नाए मानत हएं जो आदेशसे प्रभु येशूको आदर होत कहेसे,

⁴ तओ बो बहुत घमण्डी हए और बो कुछ फिर नाए बुझत हए। बल्कि बे शब्दके अर्थके बारेमे दुस्रे-दुस्रे आदमीनके सँग बिबाद और लडाइ करन चाँहत हएं। और जे बातसे गुस्सा, लडाइ और बदनामकी बात और खराब शंखा पैदा होत हएं।

⁵ और एकदुस्रेके सँग खतम नाए होन बारो लडाइसे उनको दिमाग खराब हुइगओ हए। और बे नाए समझ पातहएं, कि सच्चो का हए। बे सोचत हएं, कि परमेश्वरको सेवा करन धनी होनको तरिका हए।

⁶ पर हमरे ताहीं जा अच्छो हए, कि हम बहे करएं, जो परमेश्वरके खुसी करत हए। और बामे सन्तुष्ट रहामएं जो बा हमके देतहए।

⁷ काहेकी जब हम जन्मे रहएं, तओ हम संसारमे कुछु नाए लाए, और जब हम मरङगे, तओ कुछु नाए लैजाए पामंगे।

⁸ और अगर हमरे ठिन खानके और पैंधनके ताहीं होए तओ बहेमे सन्तुष्टि होन पणो।

⁹ पर जो धनी होनके चाँहत हएं बे सब मेलके पाप करनके ताहीं सजिलोसे परीक्षामे पणजात हएं, और एक जानबर हानी फन्दामे फस्जात हएं। आदमी बेहीं चीजके करन चाँहत हएं, जो उनके ताहीं मुरख और खतरनाक हए, और जा इच्छा उनके बर्बादी घेन लैजाबैगो, और नाश करदेबैगो।

¹⁰ काहेकी धनको प्रेम सब किसिमको खराबीको जर हए, कुछ आदमी धीरे-धीरे ख्रीष्ट येशूको शिक्षामे बिश्वास करन छोड दइ हएं। काहेकी बे धनके बहुत चाँहत रहएं। और अब अपनए-अपनएके कोइ एक हथियार लैके अँदाओ कता बे बहुत मेलके दुखमे पणे हएं।

तिमोथीके ताहीं पावलको शिक्षा

¹¹ पर हे तिमोथी, तए परमेश्वरको सेवा करन बारो आदमी हए, तोके जे सब चिजनके करनसे बचनके हए; पर तए परमेश्वरके अग्गु ठिक ठहिरन बाली बातमे, भक्तिमे, बिश्वासमे, प्रेममे, धिरजमे, नम्र होन बारो बातमे अपनो मन लगा।

¹² युद्धमे एक अच्छे सैनिक हानी, जो लडाइमे कभी हार नाए मानत हए, तोके फिर परमेश्वरमे भरोसा करनके और बाकी आज्ञाके पालन करन नाए छोडनके हए। और कभी फिर नाश नाए होन बारो जीबनके मजबुतसे पकणले, जौनके ताहीं तए बुलाओ गओ हए, और बहुत आदमीके अग्गु, तए स्पष्ट रुपसे कहो रहए, कि तए ख्रीष्टमे भरोसा करत हए।

¹³ सबके जीबन देन बारो परमेश्वरके और सँगए-सँग हाकिम पन्तियस पिलातसके अग्गु न्यायके ताहीं लाओभओ समयमे मजबुतसे सच्चो बात कहान बारो येशू ख्रीष्टके साक्षी धरके मए तोके जा आज्ञा देत हओं।

¹⁴ कि तए बे सब चीज कर जोके पुरा करनके ताहीं परमेश्वर तोके आज्ञा दइ हए। ताकी कोइ फिर प्रभु येशू ख्रीष्टके लौटके आनतक तिर उपर कुछ फिर गलत कामको आरोप नाए लगाए पाबए।

¹⁵ और परमेश्वर जो इकल्लो राजा हए, जो प्रसंसाको लायक हए, राजनको सबसे महान राजा और प्रभुनको प्रभु हए, बहे ख्रीष्ट येशूके ठिक समयमे प्रकट करैगो।

¹⁶ और सिरफ बहे इकल्लो हए, जो हमेसाके ताहीं जिन्दा हए, और बा इतनो चम्कन बारो उजियारोमे रहात हए, कि कोइ फिर बाके ढिँगै नाए आए पातहए। और नए बाके कोइ आदमी देखी हएं, और नए कभी देख पामंगे। बाकी महिमा और शक्ति सदा दिन रहाबए। आमेन।

धनी आदमीनके आदेश

¹⁷ जा संसारके धनी आदमीके आदेश दे, कि घमण्डी नाए बनएं और अपने धनमे भरोसा नाए करएं जोकी धन जद्धा समय तक नाए रहाबैगो। पर बे परमेश्वरमे आसरा करएं जो सब चीज खुल्ला मनसे देतहए, जोको जरुरी हमके होतहए, ताकी हम बो चीजको आनन्द लैपामएं।

¹⁸ और बे भलो काम करएं, भलो काममे धनी बनएं, खुल्ला मनको होमएं, और औरेन्के देन तयार होमएं।

¹⁹ अइसे करके बे अपन अच्छो कामके अपन ताहीं सम्पति कता जोरंगे, जौन भबिष्यमे जाएके स्वर्गमे उनके ताहीं एक मजबुत घरको जग कता होबैगो। और बे सच्चो जीबन पामंगे, जौन जीबन हमेसाके ताहीं रहो रहाबैगो।

अन्तिम आज्ञा और समापन

²⁰ हे तिमोथी, पक्का कर, कि तए बहे कामके करत हए, जौन काम करन जिम्मा परमेश्वर तोके दइ हए। अधर्म और बिना कामके बात चित और परमेश्वरको शिक्षनके बिरोध करन बारो बो सब शिक्षाके बे गलत तरिकासे “ज्ञान हए” कहिके कहात हएं।

²¹ कुछ आदमी झुठे ज्ञानके स्वीकार करलै हएं, और अइसे करके बे अब ख्रीष्टके बारेमे सच्ची शिक्षामे बिश्वास नाए करत हएं। मए प्राथना करत हओं, कि परमेश्वरको अनुग्रह तुम सबके उपर होतए रहाबए।