1 कोरिन्थी 5 - राना थारु नयाँ नियम

व्यभिचारके बारेमे खण्डन

¹ मए आदमीनके तुमर बारेमे जा कहात सुनो हओं, कि तुमर मण्डलीमे तुम मैसे कुछ आदमी व्यभिचारमे लागे हएं। जो आदमी परमेश्वरके नाए जानत हएं, बिनमे फिर अइसो व्यभिचार नाए होत हए। कोइ त अपनो सौतिया अइयाके बैयर करलै हए।

² तुमके जाके बारेमे दुखए-दुखसे भरजानके रहए और बो आदमी जो बो करी, बोके मण्डलीसे निकार देन रहए, लेकिन जाको बदला तुम घमण्ड महसुस करत हओ।

³ मए हुवाँ पर तुमर सँग नाए हओं, पर मेरे बिचार तुमर सँग हएं, मानओ कि मए तुमर सँग हओं और अइसो काम करन बारेनके बारेमे न्याय करनडटो हओं।

⁴ तुमके अइसे करन पणैगो, हमरे सँग प्रभु येशू ख्रीष्टको अधिकार हए कहान बारी बात बुझके तुम सब बिश्वासी एक साथ इकट्ठा होबओ। और मए मेरे बिचारमे हुवाँ हओं कता सोँचके तुम बिश्वासीनके कता जमा हुइजाओ। और हमर प्रभु येशू ख्रीष्टको शक्तिसे,

⁵ बो पापी ब्यबहार करन बारे आदमीके मण्डलीसे बाहिर निकार देओ और बो आदमीके शैतानके अधिकारमे फिर्ता पठाए देओ। ताकी जा आसरा करोजाए सकत हए, कि बो पाप करन छोडके परमेश्वर घुमजएहए कि। काहेकी अगर बो पश्चाताप करत हए कहेसे बो सचमे बो दिनमे बचाओ जाबैगो जब प्रभु न्याय करैगो।

⁶ घमण्ड करन बन्द करओ; का तुम नाए जानत हओ, कि थोडी खमिर पुरो मणो भओ चुनके फुलाए देतहए। उइसीयए, अगर एक आदमीके पाप करनके अनुमति दओ जातहए, तओ जल्दीए सब बहे काम करनके ताहीं लोभ करत हएं।

⁷ जैसेकी यहूदीनको निस्तार तेवहारको भोज माननसे पहिले यहूदी आदमी अपने घरसे सब खमिर निकारत हएं, जहेमारे तुमके अइसे अनैतिक आदमीके अपने समुहसे बाहिर निकार देन चाहो। फिर तुम रोटी कता हुइ जाबैगे जोमे कोइ खमिर नाए होत हए। जोको मतलब हए, कि तुम एक बिश्वासीनको बगाल होबैगे जो बगालमे अइसो कोइ बगाल नाए होए जो अपनो इच्छासे पाप करत होए। काहेकी जब तुम ख्रीष्टमे बिश्वास करे, तओ परमेश्वर तुमके भितरसे शुद्ध बनाइ। काहेकी ख्रीष्ट हमएं हमर पापनसे छुटकारा दइ हए और बा एक भेंणा बरोबर हए जोसे यहूदी आदमी निस्तार तेवहारके समयमे बलि करी रहएं।

⁸ तओ आओ हम निस्तार तेवहार मनात हएं। निस्तारके समयमे, यहूदी अपने घरसे सब खमिरके फेक देत हएं। उइसीयए, हमके बिश्वासी बननसे पहिले हम जौन तरिकासे ब्यबहार करत रहएं, बो कामके करन बन्द कर देन चाहो। बो निस्तारके समयमे, यहूदी रोटी खाइं, जोमे कोइ खमिर नाए रहए। उइसीयए, हमके ब्यबहार करन चाहो। काहेकी परमेश्वरके आदमीनके अइसो ब्यबहार करन चाहो जैसे हमरे जीबनमे कोइ मेलको फिर खराब ब्यबहार नाए हए। जोको मतलब, हमरे दिलमे धोखासे फिर खराब बात छिपन नाए चाहो, बल्कि इमान्दारीसे ख्रीष्टको अनुसरण करन चाहो।

अनैतिकताके ताहीं न्याय

⁹ मिर अपनो पहिलो चिट्ठीमे मए तुमके लिखो हओं, कि व्यभिचारीनको सँगत मत् करओ।

¹⁰ और संसारके व्यभिचार करन बारे, लोभ करन बारे, दुस्रेके धोखा देन बारे आदमी, मूर्ति पूजन बारेनके बारेमे नाए कहो हओं; अगर इनसे अलग रहान हए कहेसे त तुमके संसारसे बाहिर निकरन पणैगो।

¹¹ मिर कहाइको मतलब जा हए; कि अगर कोइ अपनएके एक बिश्वासी बताएके, व्यभिचार करन बारे, लोभ करन बारे, मूर्ति पूजन बारे, बुराइ करन बारे, दारु पिन बारे, या चुरान बारे होएं, तओ बोको सँगत मत् करीयओ; और अइसे आदमीनके सँग खानु फिर मतखैओ।

¹² काहेकी जो आदमी बिश्वासी नाए हएं उनके न्याय कर्नो हमर जीम्मेबारी नाए हए, लेकिन निश्चित रुपसे तुमके बे आदमीनके अनुशासित करनके चाहो, जो तुमर मण्डली समुहके हिस्सा हएं।

¹³ पर जो आदमी बिश्वासी नाए हएं उनको न्याय परमेश्वरए करत हए: पर जैसे पबित्र-शास्त्र कहात हए, “बो दुष्ट आदमी तुमर समुहको हिस्सा नाए हुइ पाबैगो।”