1 कोरिन्थी 15 - राना थारु नयाँ नियम

ख्रीष्ट फिरसे जिन्दा भओ

¹ हे मेरे बिश्वासी ददाभइयओ, मए तुमके बहे अच्छो समाचारके याद दिलात हओं जो पहिलीयए परचार करडारो हओं, जोके तुम बो सन्देशमे बिश्वास फिर करे रहओ और जोमे तुम भरोसा करतए आए हओ।

² परमेश्वर तुमके, बो अच्छो समाचारके द्वारा उद्धार दइहए। और अगर तुम बो अच्छो समाचारमे बिश्वास करतए रहे कहेसे परमेश्वर तुमके बचाबैगो। अगर तुम अइसे नाए करत हओ तओ तुम बिना कामको बिश्वास करे हओ।

³ जहेमारे मए तुमके बो सबसे जरुरी सन्देशके बताओ जो मोके प्रभु येशूसे मिलो रहए, बो सन्देश जा हए: “पबित्र-शास्त्रके बचन अनुसार येशू ख्रीष्ट हमर पापनके ताहीं मरो।

⁴ और गडो गओ; और पबित्र-शास्त्रके अनुसार तिसरो दिन मृत्युसे जिन्दा हुइके लौटके आओ।”

⁵ और येशू पत्रुस केफास, और तओ फिर बाह्र चेलनके ठिन दिखा पणो।

⁶ फिर पाँच सओसे जद्धी बिश्वासी ददाभइयनके एकए सँग दिखाइ दइ, जौन मैसे बहुत जद्धा जिन्दा हएं और कुछ मरीगए हएं।

⁷ फिर पिच्छु याकूबके दिखाइ दइ, और पिच्छु सब चुनेभए चेलनके दिखाइ दइ।

⁸ और अन्तमे बा मिर ठिन फिर देखा पणो, और मए आसरा नाए करो समयमे इक्बरी प्रभु येशूको चुनो भओ चेला बनिगओ।

⁹ काहेकी मए चुनेभए चेला मैसे सबसे कम महत्त्वपूर्ण हओं, और चुनो भओ चेला कहानको फिर लायक नाए हओं, काहेकी मए परमेश्वरको मण्डलीमे बिश्वासीनके सतात रहओं।

¹⁰ मए एक परमेश्वरसे चुनो भओ चेला बनोगओ काहेकी परमेश्वर मिर ताहीं दयालु रहए। और बाको अनुग्रह मेरे जीबनमे प्रभावशाली हए। पर मए अन्य चुनेभए चेलनसे जद्धा मेहेनत फिर करो तहुँफिर जा मेरे घेनसे नाए भओ पर परमेश्वरको अनुग्रहमे मोके बाको काम करनमे मदत करी।

¹¹ जहेमारे, चहुँ मए होओं, चहुँ अन्य चुनेभए चेला होएं, हम सबए ख्रीष्टके बारेमे एकए सन्देशके परचार करे, और जहेमे तुम बिश्वास फिर करे।

मरेके फिरसे जिन्दा होनो

¹² जहेमारे मए तुमसे जा पुछन चाँहत हओं: काहेकी हम सब तुमर बीच जहे परचार करे, कि जब ख्रीष्ट मारोगओ तओ परमेश्वर ख्रीष्टके फिरसे जिन्दा करदइ। पर तुम मैसे कोइ फिर अइसे नाए कहाबए, कि परमेश्वर बिश्वासीनके, मरे मैसे फिरसे जिन्दा नाए करत हए।

¹³ मरे भए आदमी फिरसे जिन्दा नाए हुइते कहेसे ख्रीष्ट फिर मरके जिन्दा नाए हुइतो।

¹⁴ और अगर ख्रीष्ट मरो मैसे जिन्दा नाए हुइतो, तओ जौन सन्देशको परचार हम करत हएं, बो सन्देश और ख्रीष्टमे तुमर बिश्वासको कोइ अर्थ नाए हुइतो।

¹⁵ जासे जद्धी हम परमेश्वरके बारेमे ठगन बारे ठहिरत हएं। काहेकी परमेश्वर, ख्रीष्टके मरो मैसे जिन्दा करी कहिके हमीं साक्षी दए हएं। पर अगर मरे मैसे जिन्दा नाए हुइते कहेसे परमेश्वर बाके फिर मरे मैसे जिन्दा नाए करतो।

¹⁶ अगर मरे भए आदमी मृत्युसे जिन्दा नाए हुइते कहेसे ख्रीष्ट फिर मृत्युसे जिन्दा नाए भओ।

¹⁷ अगर ख्रीष्ट मृत्युसे जिन्दा नाए हुइतो कहेसे तुमर बिश्वासको कोइ अर्थ नाए रहए; और तुम अभौफिर अपने पापमे जीइ रहेहओ।

¹⁸ अगर ख्रीष्ट मरे भए मैसे नाए उठो हए, तओ जो बिश्वासी मरीगए हएं, बे नाए बचाएगए हएं, बल्कि बे खोइगए हएं; अर्थात् जा, कि हमेसाके ताहीं परमेश्वरसे अलग हुइगए हएं।

¹⁹ अगर ख्रीष्टमे हमर आसरा सिर्फ जहे जीबनके ताहीं हए, तओ हमर उपर संसारमे कोइ औको तुलनामे सबसे जद्धा दया दिखाओ जान चाहो।

²⁰ पर सच्चाई जहेहए, कि परमेश्वर नेहात्तओकमे ख्रीष्टके मृत्युसे जिन्दा करी, बहे भरोसामे परमेश्वर बे आदमीनके फिर जिन्दा करैगो जो मरीगए हएं।

²¹ तुम जो देखत हओ, जैसेकी एक पुरुष आदमके द्वारा जा संसारमे मृत्यु आइगओ, और अब मरेभएनसे जीबनमे लौटके आन फिर एक अन्य पुरुष अर्थात् ख्रीष्टसे सुरु हुइगओ हए।

²² एक आदमी अर्थात् आदमके पापके कारण सबए मानब जातिके मरन पणो। उइसीयए एक आदमी अर्थात् येशू ख्रीष्ट जो करी बोके कारण, सबए मेरे मैसे फिरसे जिन्दा करो जामंगे।

²³ पर हर आदमी एक ठिक क्रम अनुसार जिन्दा करोजाबैगो; ख्रीष्ट पहिलो आदमी रहए जोके जिन्दा करोगओ; फिर जब ख्रीष्ट लौटके आबैगो तओ बे सब जो ख्रीष्टमे हएं, उनके फिरसे जिन्दा करोजाबैगो।

²⁴ फिर, जब ख्रीष्ट परमेश्वरको बिरोध करन बारे सब बुरे शक्तिनके नाश करदेबैगो। तओ ख्रीष्ट अपनो दौवा परमेश्वरको अपनो राज्य सौप देहए, ताकी बा बोके उपर पुरी रुपसे राज्य करए।

²⁵ काहेकी ख्रीष्टके राजाके रुपमे शासन करन चाहो। जबतककी परमेश्वर बाके सब शत्रुन्के बाके अधिनमे नाए करदेए।

²⁶ जौन शत्रुके सबसे अन्तमे नष्ट करो जएहए, बो हए; मृत्यु।

²⁷ काहेकी पबित्र-शास्त्र कहात हए, “परमेश्वर सब कुछ ख्रीष्टको अधिकारके अधिनमे करदेबैगो।” तओ, जा स्पष्ट हए, कि जामे परमेश्वर सामिल नाए हए काहेकी बहे हए जौन ख्रीष्टके अधिकार दइ रहए।

²⁸ फिर, जब सब चीज ख्रीष्ट, अर्थात् लौंणाके अधिकारके अधिन हुइजए हएं तओ लौंणा अपनएके परमेश्वरके अधिकारके अधिन करदेबैगो, ताकी परमेश्वर हर ठिहा हर चीजमे होइगो जौन अपनो लौंणाके सब चिजनमे अधिकार दइ हए।

²⁹ अब, मरे भएनके जिन्दा नाए करो जैतो तओ बप्तिस्मा लेन बारे आदमीनके का फाइदा भओ? अगर मरे भए जिन्दा नाए हुइहएं कहेसे, काहे उनके बोके ताहीं बप्तिस्मा दओगओ?

³⁰ जहाँ तक हम्री बात हए, अगर मरे भएनके जिन्दा नाए करीहए, तओ हमएं अपनएके खतरामे डारन मुरखता हए।

³¹ हे मेरे बिश्वासी ददाभइयओ, मए तुमएं बतात हओं, कि मए हर दिन लगभग मारो जातहओं। मए जो जा कहात हओं जा बस्ताबमे सच हए। जैसेकी जा फिर सच हए, कि मए नेहात्तओकमे खुस हओं काहेकी तुम हमर प्रभु येशू ख्रीष्टमे भरोसा करत हओ।

³² मए एफिसस सहरमे बहुत जद्धा कठिनाइको अनुभब करो हओं, बे आदमीनके कारण जो आदमी मेरे बिरोध कर रहे हएं, जोकी भयङकर जनाबर कता हएं। अगर जा सिर्फ आदमीनको बिचारमे आधारित हए तओ बो कठिनाइसे का हासिल करो? कुछ फिर नाए। जहेमारे अगर जा सच हुइतो, कि मरे भए आदमी फिरसे जिन्दा नाए होत हएं, तओ अच्छो हुइतो कि हम आदमीनको कहाइको अनुसरण करत हएं, कि जो जा कहात हएं, “आओ, हम खामएं पिमएं, काहेकी अगर हम कल मरिगए तओ जाको अन्त हुइ जाइगो।”

³³ “जौन आदमी अइसे बात करत हएं, उनके कारण मुरख मतबनओ।”

³⁴ जो ठिक हए बोके बारेमे ध्यानसे बिचार करओ, अबसे पाप मत् करओ; काहेकी तुम मैसे कुछ आदमी परमेश्वरके स्पष्ट रुपसे नाए जानत हएं।

मरे मैसे जिन्दा भओ शरीर

³⁵ और अगर, उदाहरणके ताहीं कोइ पुँछत हए, कि परमेश्वर मरे भए आदमीनको जीबनके ताहीं कैसे जिइबाबैगो? और उनको शरीर कैसो होत हए?

³⁶ मिर जबाफ हए, हे बिना बुद्धिके आदमी, जब एक बीज बोतहएं, तओ पेण बननसे पहिले बीज गाइब हुइजात हए।

³⁷ जो कुछ तुम बोत हओ, चहुँ गेहुँ होए या कुछ औ, जा सिर्फ एक बीज हए। जाको रुप बो नाए हए जो पेणको होतहए।

³⁸ परमेश्वर पेणके बो रुप देतहए जो बा बोके ताहीं चाँहत हए। हर मेलके बीज अपने रुपमे बढत हएं।

³⁹ और संसारमे सबए अलग-अलग मेलके जिन्दा प्राणीनको शरीर एकए कता नाए हए। आदमीनको शरीर जानबरको शरीर कता नाए हए। चिरैंनको शरीर फिर मछ्रीनको शरीरसे अलग होत हए।

⁴⁰ और जैसीए पृथ्वीमे बिभिन्न परकरके शरीर हएं, उइसीयए बादरमे फिर हएं जैसे, कि सूर्य, जोनी और तारा। काहेकी बादरकी चिजनमे एक ताराको सुन्दरता होत हए, और पृथ्वीके चिजनमे एक दुस्रो मेलको सुन्दरता होत हए।

⁴¹ दिनको उजियारो दुस्रो मेलको हए और जोनीको उजियारो दुस्रो मेलको हए, और तारनको उजियारो फिर दुस्रो मेलको हए, काहेकी एक तारासे दुस्रे ताराके उजियारोमे अन्तर हए।

⁴² तओ अइसियए मरके जिन्दा भए आदमीमे फिर होइगो। जौन शरीरके बे दफ्नात हएं बो अइसो शरीर हए जो सडो जातहए, पर जब जा फिरसे जीइउठैगो तओ जा एक अइसो शरीर होबैगो जो सण नाए सकत हए।

⁴³ जब हमर शरीरके दफ्नाओ जातहए, तओ हमर शरीर देखनमे खराब और कमजोर होत हए, पर जब बे शक्ति जीबनमे लौटके आत हएं, तओ बे सुन्दर और मजबुत हुइजात हएं

⁴⁴ जौन परकार हमर ठिन प्राकृतिक शरीर और आत्मिक शरीर हए, उइसीयए अइसो शरीर फिर हए जौनन्के परमेश्वरको आत्मा द्वारा जीबन दओ जातहए। और हमर प्राकृतिक शरीरके बेहिं शरीरमे बदलदओ जाबैगो, जौनन्के परमेश्वरको आत्माके द्वारा जीबन दओ जातहए।

⁴⁵ पबित्र-शास्त्रमे फिर जा लिखो हए कि, “पहिलो आदमी, अर्थात् आदम, जीवित प्राणी बनो” और आखरी आदमी जोकी ख्रीष्ट हए, बा बहे हए जो अनन्त जीबन देतहए।

⁴⁶ हमर ठिन पहिले संसारसे सम्बन्धित शरीर होनचाहो, फिर हमएं स्वर्गसे सम्बन्धित शरीर दओ जातहए।

⁴⁷ पहिलो आदमी धर्तीसे अर्थात् मट्टीसे बनो भओ रहए; ख्रीष्ट, जो कि दुस्रो आदम हए, स्वर्गसे आओ हए।

⁴⁸ जो आदमी पृथ्वीसे सम्बन्धित हएं बे पृथ्वीके पहिले पुरुष, आदम कता हएं। पर बे आदमी जो स्वर्गसे सम्बन्धित हएं, बे स्वर्गके पुरुष, ख्रीष्ट कता हएं।

⁴⁹ हम सबके ठिन बहे पुरुष आदमको रुप हए जोके मट्टीसे बनाओ गओ रहए। अइसियए, एक दिन, हमर ठिन ख्रीष्टको रुप होइगो, जो स्वर्गसे आओ रहए।

⁵⁰ हे मेरे बिश्वासी ददाभइयओ, जा पृथ्वीमे हमर शरीर बुट्टी और खुनसे बनो हए; हम स्वर्गमे परमेश्वरके राज्यमे नाए घुस पएहएं। हम स्वर्गमे अपनो अइसो शरीरके साथ नाए रहिपए हएं जो मर सकत हए, काहेकी हुवाँपर कोइ मृत्यु नाए हए।

⁵¹ देखओ, मए तुमसे एक रहस्य कहात हओं, कि हम मैसे कुछ बिश्वासी नाए मरङगे, पर सब बदल जामंगे।

⁵² जा अचानक होइगो, इत्नो तेजीसे, कि जित्नो तेजीसे कोइ अपनो आँखी तिम्काट हए। जब अन्तिम तुरही फुको जएहए, तओ जो आदमी मरचिके हएं बे हमेसाको जीबन जीइनके ताहीं फिरसे जिन्दा करेजामंगे और हम जो जिन्दा हएं, हमर शरीर बदलदओ जाइगो।

⁵³ काहेकी हमर जा शरीर जो सजिलोसे मर जात हए और सणो जात हए, बोके एक अइसो शरीरमे बदलो जान चाहो, जौन नए त कभी मरत हए और नए त कभी सणत हए।

⁵⁴ जब अइसो होइगो, तओ बो पुरा हुइ जाबैगो जो परमेश्वर पबित्र-शास्त्रमे लिखी हए, “जीत, मृत्युके पुरे रुपसे हराइ और जाको कोइ अस्तित्व नाए रहाइगो।

⁵⁵ ए मृत्यु, तए कहाँ जितो? ए मृत्यु, तेरो शक्ति कहाँ हए?” अइसियए पबित्र-शास्त्रमे जो लिखो हए बो पुरा होइगो।

⁵⁶ मानब जातिको पापके कारण मरन होबैगो। और मानब जातिको पापको शक्ति मोशाको नियम कानुन होबैगो।

⁵⁷ पर परमेश्वरके धन्यबाद होए, हमर प्रभु येशू ख्रीष्ट हमर ताहीं जो करीहए बोके द्वारा परमेश्वर हमके पाप और मृत्युमे बिजय दइ हए।

⁵⁸ जहेमारे हे मेरे प्यारे बिश्वासी ददाभइयओ, अपने बिश्वासमे मजबुत रहाबओ, और प्रभुके ताहीं जो तुम करत हओ बोमे हमेसा बढतए जाओ, काहेकी तुम जा जानत हओ, कि जो काम तुम प्रभुके ताहीं करत हओ बो बेकार नाए होबैगो।