1 कोरिन्थी 14 - राना थारु नयाँ नियम

अगमबाणी और भाषाको बरदान

¹ एक-दुस्रेसे प्रेम करन कोसिस करओ, और आत्मिक बरदानन्के फिर उत्सुकताके साथ इच्छा करओ। खास करके जा, कि भबिष्यबाणी मस्कनको बरदानके ताहीं इच्छा करओ।

² काहेकी जो फरक-फरक भाषामे बात करत हए बो आदमीनसे नाए बल्कि परमेश्वर सँग बात हए; जहेमारे कि बोकी बात कोइ नाए सम्झत हए; काहेकी बो पबित्र आत्माको समर्थके द्वारा गुप्त बातनके कहात हए।

³ लेकिन जो परमेश्वरको सन्देशके परचार करत हए, बो बिश्वासीनके बिश्वासमे मजबुत करन, प्रोत्साहित करन और उनके दिलके सन्तुष्टि देनमे मदत करत हए।

⁴ जो फरक-फरक भाषामे बात करत हए, बो सिरफ अपनुवए बिश्वासके मजबुत करत हए। पर जो भबिष्यबाणी करत हए, बो मण्डलीके सब बिश्वासीनको बिश्वासके मजबुत करत हए।

⁵ मए चाँहत हओं, कि तुम सब फरक-फरक भाषामे बोलओ। पर जद्धासे-जद्धा तुम अगमबाणी बोलओ कहिके मए चाँहत हओं; काहेकी अगर अन्य भाषा बोलन बारो आदमी बोको ब्याख्या नाए करत हए कि बो मण्डलीमे बिश्वासीनके बिश्वासके पक्को बनानके ताहीं का कहात हए, कहेसे जौन आदमी परमेश्वरको सन्देशके परचार करत हए बो बहुत जद्धा महत्वपुर्ण काम करत हए।

फरक-फरक भाषाको ब्याख्याके जानन चाहो

⁶ जहेमारे हे मेरे बिश्वासी ददाभइयओ, अगर मए तुमर ठिन आएके फरक-फरक भाषामे बात करओं, और प्रकाश, या कुछ खास ज्ञान लाओं, या परमेश्वरको सन्देश, या शिक्षा देओं, बो तुमर ताहीं फाइदा होबैगो।

⁷ अइसियए जब तुम बसुली और तन्दुरा जैसे सँगीतको बाजा बजात हओ, अगर तुम धुन ठिकसे नाए बजात हओ कहेसे दुस्रे आदमी कैसे चिन्हंगे, कि बो बसुली हए कि तन्दुरा?

⁸ युद्धमे, अगर तुरहीको स्पष्ट अबाज नाए अएहए कहेसे सैनिक लडाइ लडनके ताहीं तयार नाए हुइ सकत हएं।

⁹ उइसीयए, जब तुम फरक-फरक भाषा मस्कत हओ जो आदमी नाए सम्खत हएं, कहेसे तुम जो कहात हओ बोको कोइ मोल नाए होइगो।

¹⁰ जा संसारमे बहुत जद्धा अलग-अलग भाषा हएं और हर भाषाके अर्थ हएं।

¹¹ अगर हम बो भाषाके नाए सम्झत हएं जो दुस्रे मसक रहे हएं, तओ जा अइसो होइगो मानओकी बे हमर ताहीं बिदेशी हएं, और हम उनके ताहीं बिदेशी हएं।

¹² काहेकी तुम पबित्र आत्मा द्वारा दओ जान बारो खास क्षमतनके ताहीं इतना उत्सुक हओ, जहेमारे बे क्षमतनको इच्छा करओ जो मण्डलीमे बिश्वासीनको बिश्वास मजबुत करत हए।

¹³ जाकेमारे जौन फरक-फरक भाषा बोलए, तओ बो प्राथना करए, कि बो जो कही बोको अर्थ अपनए समझ पाए।

¹⁴ जहेमारे मए फरक-फरक भाषामे प्राथना कररहो हओं। मिर आत्मा प्राथना करत हए, पर मिर मनके ताहीं कोइ फाइदा नाए हए, काहेकी मए जाके समझ नाए पातहओं।

¹⁵ जहेमारे, मए प्राथना करन चाँहत हओं, पबित्र आत्मा द्वारा निर्देशित करोजाए; पर मए जा फिर चाँहत हओं कि दुस्रे आदमी जा सम्झएं, कि मए का कहिरहो हओं। और जब मए गात हओं, तओ मए चाँहत हओं कि मिर गाना पबित्र आत्मासे प्रेरित होए, लेकिन जा फिर जरुरी हए, कि मए जो गए रहो हओं बो दुस्रेके द्वारा सम्झाओ जाए।

¹⁶ मानलेओ कि कोइ साधारण आदमी तुमर आराधनामे हए, जब तुम अपनो आत्मासे परमेश्वरको स्तुति कर रहेहओ। अगर बो तुमर बातके नाए सम्झतो त तुम परमेश्वरके धन्यबाद देनके बाद, बोके कैसे पता चलैगो कि तुम “आमेन” कहे हओ।

¹⁷ परमेश्वरके ताहीं तुमर दओगओ धन्यबाद बढिया हुइ सकत हए, पर जासे दुस्रेनके अपने बिश्वासमे मजबुत नाए मिलैगो।

¹⁸ मए अपने परमेश्वरके धन्यबाद देत हओं, काहेकी मए तुमसे जद्धा फरक-फरक भाषामे मस्कत हओं।

¹⁹ लेकिन अइसो होएसे फिर, अगर मए बिश्वासीनको एक मण्डलीके भेलामे हओं कहेसे मए फरक-फरक भाषाको इस्तमाल नाए करत हओं काहेकी जा मेरे ताहीं अच्छो होबैगो कि हुवाँ पाँचए शब्द कहाओं जो सम्झाओ जाए सकए और दुस्रेके सिखाओ जाए सकए।

फरक-फरक भाषा बिश्वासीनके ताहीं चिन्हा

²⁰ हे मेरे बिश्वासी ददाभइयओ, एक बच्चा कता मत् सोँचओ, जब जा बुराइको बात आत हए तओ बच्चाके रुपमे निर्दोष होबओ। पर जे मेलके बातनके सम्झनमे परिपक्व होओ।

²¹ पबित्र-शास्त्रमे लिखो हए, कि प्रभु कहात हए, “मए बिदेशीनके माध्यमसे जे आदमीनसे बात करंगो जौन फरक-फरक भाषामे बोलंगो। तहुँफिर बे मेरे बात नाए सुनंगे।”

²² जहेमारे, फरक-फरक भाषा बोल्नो बिश्वास करन बारेनके ताहीं नाए, पर बिश्वास नाए करन बारेनके ताहीं चिन्हा हए। पर अगमबाणी बोल्नो बिश्वास नाए करन बारेके ताहीं नैयाँ, बल्कि बिश्वास करन बारेनके ताहीं हए।

²³ अगर मण्डली एकठिन इकट्ठा होए, और सबके-सब फरक-फरक भाषा बोलएं, और जो फरक-फरक भाषा नाए समख पातहएं या गैर-बिश्वासी आदमी मण्डली भितर होएं, तओ बे जरुर सोँचत हएं, कि तुम बौराइगए हओ।

²⁴ पर अगर सब परमेश्वरको सन्देशके परचार करन लगएं, और कोइ गैर-बिश्वासी या जो फरक-फरक भाषा नाए समख पातहएं बे भितर आए जाएं, तओ उनके पता चलैगो, कि बे पापी हएं। और तुम जो कर रहेहओ, बहेमारे बे अपने डगरके बद्लन चाहंगे।

²⁵ परमेश्वरको सन्देशके कारण बोके अपनो खराब काम और बोको गुप्तमे भए सोँचके बारेमे महसुस होबैगो। तओ बोके महसुस होबैगो कि बो पापी हए, तओ बो अपन मन परमेश्वरके घेन घुमाबैगो और पाप करन छोडदेहए। और बो परमेश्वरको आराधना करतए कहाबैगो “परमेश्वर नेहात्तओकमे हियाँ तुमर बीचमे हए।”

आराधनामे अनुशासन

²⁶ हे मेरे बिश्वासी ददाभइयओ, सुनओ कि कामके कैसे करोजानके चाहो? जब तुम आराधनाके ताहीं इकट्ठा होत हओ, तओ तुम मैसे कोइ गीत गात हए, कोइ उपदेश देतहए, कोइ प्रभुके द्वारा दओगओ प्रकासको बात करत हए, कोइ फरक-फरक भाषामे बात करत हए और कोइ अन्य भाषाको अर्थ खोलत हए; जे सब बातन्को उदेश्य जा होनचाहो, कि “मण्डलीके बिश्वासमे मजबुत होनके ताहीं मदत करनो।”

²⁷ अगर कोइ फरक-फरक भाषामे बात करन जाएरहो हए, तओ जद्धासे-जद्धा दुई या तीन आदमी एक-एक करके मस्कन चाहो, और फरक-फरक भाषाको अर्थ बतानके ताहीं जरुर कोइ एक होन पणो।

²⁸ पर अगर अर्थ खोलन बारो नाए होबए, तओ फरक-फरक भाषा मस्कन बारो, मण्डलीमे शान्त रहाबए, और बोको अपनो फाइदाके ताहीं परमेश्वरके सँग चुपचाप बात करए।

²⁹ अगमबक्ता मैसे दुई या तिनए फरक-फरक भाषा बोलएं, और जा जरुरी हए, कि हर कोइ सुनए और सोँचए और जाँचए, कि जा जो बात कही हए बो सही हए या नाए हए।

³⁰ पर अगर मस्कनडटो समयमे कुइ औ आदमीके परमेश्वरसे कोइ सन्देश मिलत हए तओ जौन बोलरहो हए बोके रुकन चाहो और दुस्रे आदमीके मस्कनके देनपणो।

³¹ तुम सब परमेश्वरके सन्देशको परचार कर सकत हओ, पर एकके पच्छु एक। ताकी हर कोइ सिखैगो और प्रोत्साहित होबैगो।

³² अगमबक्ताके अपने बरदानके काबुमे करन चाहो।

³³ काहेकी परमेश्वर गडबड करन बारो परमेश्वर नाए हए, पर शान्ति देन बारो परमेश्वर हए; जहे नियम परमेश्वरके आदमीनको हर मण्डलीनमे पालन करोजात हए।

³⁴ कुछ आदमीनको कहाइ जा हए, कि मण्डलीनकी बैयरनके चुप रहान चाहो और नाए सिखान चाहो। और कुछ औ आदमीनको कहाइ हए, कि बे बादबिबादमे भाग लेन नाए चाहो, काहेकी उनके बात करनको अनुमति नाए हए, पर अधिनमे रहानको आज्ञा हए: जैसे पबित्र-शास्त्रमे लिखो फिर हए।

³⁵ अगर बे कुछ औ सिखन चाँहत हएं तओ, बिनके बैठकमे पुँछनके नाए चाहो पर घर पुगके अपनो लोगासे पुँछन चाहो, काहेकी बैयरके मण्डलीमे बात करन सरमकी बात हए।

³⁶ अइसो काहे हए, कि तुम मैसे कुछ पहिले बताए गए जे कानुनन्के पालन नाए करन चाँहत हएं? का तुमके लगत हए कि तुम पहिलो हओ जो परमेश्वरको बचनके देन बारे हओ? या जा केवल तुम्हीके दओगओ रहए?

³⁷ अगर कोइ आदमी अपनएके अगमबक्ता या पबित्र आत्मकी योग्यता दओगओ आदमी सम्झत हए कहेसे बो जानलेबए, कि जो बात मए तुमके लिखत हओं, बे परमेश्वरको आज्ञा हए।

³⁸ पर अगर बे मेरे जे शब्दमे बिश्वास नाए करंगे, तओ उनके उपर बिश्वास मत् करीयओ।

³⁹ जहेमारे हे मेरे बिश्वासी ददाभइयओ, भबिष्यबाणी करनके उत्सुकतासे इच्छा करओ और फरक-फरक भाषा मस्कनसे मनाही मत् करओ।

⁴⁰ जो कुछ फिर तुम आराधनाके समयमे करत हओ बे सब बात पुरा इमानदारीसे और ब्यबस्थित ढंगसे करोजाए।