1 कोरिन्थी 13 - राना थारु नयाँ नियम

महान प्रेम

¹ मए आदमीनको मेल-मेलको भाषनमे और स्वर्गदूतको भाषनमे मस्कत हओं; पर मए दुस्रेन्से प्रेम नाए करो कहेसे मए बोलो भओ बात व्यर्थ उँचो आवाजको झाँझके जैसो होबैगो।

² और अगर मए परमेश्वरको सन्देशके घोषणा करत हओं, और सब रहस्य और सब ज्ञानके बुझतहओं, और हियाँतककी मोएमे पहाडन्के इतएसे उतए करनको परमेश्वरमे मजबुत बिश्वास हए पर अगर मोएमे प्रेम नाए हए कहेसे मिर बिरकुल कोइ मोल नाए हए।

³ और अगर मए अपनो पुरा धनसम्पति गरीब आदमीनके दइ देओं, या हियाँतककी अगर मए उनके मिर शरीरके जलानके दइ देओं, पर मोएमे प्रेम नाए हए कहेसे मिर ताहीं कोइ कामको नाए हए।

⁴ जो आदमी दुस्रेनसे प्रेम करत हएं, बे धर्य पुर्बक और दयाके साथ काम करत हए, उनके गुस्सा नाए लागतहए, और बे घमण्ड नाए करत हएं और उनके गर्व नाए होतहए।

⁵ प्रेम करन बारे केवल अपनएके खुस करनके बारेमे नाए सोँचत हएं, बे जल्दी गुस्सा नाए होत हएं और बहुत सजिलोसे बे आदमीनके माफ करदेत हएं।

⁶ जब आदमी गलत कामके करत हएं तओ बे खुस नाए होत हएं। पर जब आदमी सच्चे काम करत हएं जो सही और सच्चो होत हए, तओ बे खुस होत हएं।

⁷ प्रेम करन बारे कभी हार नाए मन्त हएं, सब बातको आसरा करत हएं, बे हमएं परमेश्वरमे अपनो बिश्वास बनाए रहानमे सक्षम बनात हएं, कठिनाइ और पीडासे होतए धैर्यसे स्थिर रहात हएं।

⁸ बो समय आबैगो जब आदमी परमेश्वरको सन्देशके फरक-फरक भाषामे परचार नाए करंगे, और परमेश्वरके बारेमे गहिरो ज्ञानको जरुरत नाए होइगो, पर प्रेम हमेसाके ताहीं बनो रहाबैगो।

⁹ हमर ज्ञानको बरदान और परमेश्वरको सन्देशको परचार करनको क्षमता अधुरो हए, पर जब बा, जो सम्पूर्ण और सिद्ध आबैगो, तओ बो जो अधुरो हए, बोको जरुरत नाए पणैगो।

¹⁰ पर जब सिद्धता आबैगो तओ अधुरो मिटजाबैगो।

¹¹ जा आदमीको बिकास कता हए। जब मए एक बच्चा रहओं, मए एक बच्चाके रुपमे बात करत रहओं, सोँचत रहओं और तर्क करे करत रहओं। लेकिन जब हम बुढे भए तओ हम अपने बच्चाके तरिका बन्द करदए।

¹² जा हमर बिश्वास करन बारेनके सँग उइसीयए हए। जैसी एक आदमी एक खराब दर्पनमे अपन अनुहार देखत हए। काहेकी हम अभएतक सबकुछ स्पष्ट रुपसे नाए बुझत हएं। हम भबिष्यमे कुछ चीज बुझजामंगे। काहेकी हम परमेश्वरके अपने अग्गु देखंगे। अभए मिर ज्ञान पुरो नाए हए। भबिष्यमे इकल्लो जब बो दिन आबैगो तओ मए नेहात्तओकमे बाके जानंगो, जैसे परमेश्वर मोके फिर जानत हए।

¹³ जहेमारे अब, जे तीन परकारके कामके हमएं करन चाहो: परमेश्वरमे बिश्वास कर्नो, परमेश्वरके बाचामे आसरा कर्नो, और दुस्रेनके प्रेम कर्नो। पर जे तीन मैसे एक सबसे बडो हए: बो हए, दुस्रे जनैनके प्रेम कर्नो।