1 कोरिन्थी 12 - राना थारु नयाँ नियम

आत्मिक बरदान

¹ हे मेरे बिश्वासी ददाभइयओ, पबित्र आत्मा हमके दओ भओ बरदानके बारेमे तुमर करेभए सबालके बारेमे तुम असल तरिकासे बुझओ कहिके मए चाँहत हओं।

² तुम जानत हओ, कि तुम बिश्वासी बननसे पहिले कैसे जीबन जीइत रहओ, तुम बे मसक नाए पान बारे मूर्तिको आराधना करनके ताहीं कित्नो बातके द्वारा प्रभाबित भए रहओ।

³ जहेमारे मए चाँहत हओं कि तुम सम्झओ, कि जो कोइ परमेश्वरको आत्माके अगुवाइसे मस्कत हए, बो अइसे नाए कहात कि येशू सरापित हए, पबित्र आत्मा इकल्लो एक हए बा जोकोइ आदमीके फिर कहानके ताहीं सक्षम कर सकत हए कि, “येशूए प्रभु हए।”

⁴ परमेश्वर हमएं बाको काम करनके ताहीं बहुत मेलके बरदान देतहए, हम मैसे सबएके अलग-अलग बरदान मिलत हए। पर बे सब बरदान एक और एकए पबित्र आत्माको उपहार हएं।

⁵ अलग-अलग मेलके काम हएं, जो हम प्रभुके ताहीं करत हएं। पर हम सब एकए प्रभुको सेवा करत हएं।

⁶ परमेश्वरके हम्रे जीबनमे काम करनके अलग-अलग तरिका हएं। पर जा बहे परमेश्वर हए, जो सबएके मध्यमसे काम करत हए।

⁷ हम मैसे सबके एक अइसो बरदान दओ जातहए, जो पबित्र आत्माको उपस्थितिके दर्शात हए। ताकी हम अपने सँगी बिश्वासीनके मदत करपामएं।

⁸ परमेश्वरको आत्मा, एक आदमीके ज्ञानसे भरो भओ सन्देश मस्कनके बरदान देतहए, और बहे आत्मा दुस्रो आदमीके ज्ञानसे भरो भओ सन्देश मस्कनके बरदान देतहए।

⁹ परमेश्वर एक आदमीके, ख्रीष्टमे बडो बिश्वास करनको बरदान देतहए। और आत्मा, दुस्रे आदमीनके बिमारीनके अच्छो करनको बरदान देतहए।

¹⁰ आत्मा, एक आदमीके चमत्कारको काम करनके शक्ति देतहए; दुस्रेके परमेश्वरको सन्देश मस्कनको बरदान; और कोइ दुस्रे जनैके पबित्र आत्मा ठिनसे आओ भओ और शैतानके ठिनसे आओ भओ बरदानके बारेमे फरक छुट्टयानको क्षमता देत हए। कोइ एक आदमीके फरक-फरक भाषनमे बात करनको बरदान देतहए जौन भाषाके बारेमे बे कभु अध्यान नाए करी हएं; बहे पबित्र आत्मा कोइ दुस्रे जनैनके फरक-फरक भाषामे बोलो भओ भाषक मतलब बतानको क्षमता देत हए। जौन भाषाके बारेमे बे कभु अध्यान नाए करी हएं।

¹¹ सबए बरदान एकए आत्माको काम हए। बा हर एक बिश्वासीके बरदान देतहए जौनके पबित्र आत्मा चाँहत हए।

एक शरीर, बहुत अंग

¹² काहेकी जैसी शरीर एक हए, और बक बेढम अंग हएं, और शरीरको सम्पूर्ण अंग बेढम होएसे फिर शरीर एकए हए, अइसियए ख्रीष्ट और बाके उपर बिश्वास करन बारेनके सँग हए।

¹³ हम यहूदी होएसे फिर, ग्रीक भाषा मस्कन बारे होएसे फिर, कमैया होएसे फिर, स्वतन्त्र होएसे फिर हम एकए पबित्र आत्मा द्वारा बप्तिस्मा पाएके कारणसे एकए शरीर भए हएं और हम सबए एकए आत्मा पाए हएं। जैसे हम सब एकए कटोरा मैसे पिइत हएं।

¹⁴ हमर शरीरमे एकए अंगसे इकल्लो नाए, पर बेढम अंगसे बनो हए।

¹⁵ मानलेओ अगर, टाँग कएहए, कि “मए हात नाए हओं, जहेमारे मए शरीरको अंग नाए हओं,” तओ का बोके अइसे कहानसे बो शरीरको अंग नाए हुइहए?

¹⁶ और अगर कान कएहए कि, “मए आँखी नाए हओं जहेमारे मए शरीरको अंग नाए हओं” तओ का बोके अइसे कहानसे बो शरीरको अंग नाए हुइहए?

¹⁷ अगर पुरए शरीरमे आँखी हुइहए कहेसे तओ सुनेहए कहाँसे? अगर जम्मए शरीर कान हुइहए कहेसे तओ सुंघेहए कहाँसे?

¹⁸ पर नेहात्तओ परमेश्वर हमर शरीरके सबए अंगके अपनी इच्छाके अनुसार शरीरके सब अंगके ब्यबस्थित रुपसे सही ठिहामे धर दइ हए।

¹⁹ अगर एकए अंग हुइहए, त कोइ शरीर नाए रएहए।

²⁰ जहेमारे, भले शरीरके बहुत अंग हएं, तहुँफिर शरीर एकए हए।

²¹ आँखी हातसे नाए कहे सकत हए, “मिर तेरो जरुरत नैयाँ,” और नए मुण टाँगसे कहे सकत हए, “मोए तुमर जरुरत नैयाँ।”

²² बरु शरीरके बे अंग बहुतए जरुरी हएं जो औरे अंगसे कमजोर देखा पणतहएं।

²³ और शरीरके जौन भागके हम कम आदरके लायक मानत हएं, उनके सबसे जद्धा ध्यानसे कपडा पैँधात हएं। जहेमारे हम ध्यानसे बे हिस्सान्के रक्षा करत हएं, जौननके नाएदेखो जान चाहो, जबकी जद्धा आदर लायक भए भागके जा खास देखभारको जरुरी नाए होत हए। जहेमारे परमेश्वर शरीरके अइसे बनाइ हए, कि बे शरीरके जद्धा सम्मान और देखभार दओजाए जौनको जरुरत कम हए।

²⁴ औ अच्छे अंगके हम वास्ता नाए करत हएं। पर कमजोर अंगके जद्धा आदर देन करके परमेश्वरए जा शरीरके अंग मिलाएके धरी हए।

²⁵ परमेश्वर अइसे जहेमारे करी ताकी शरीरके कुछ अंगसे एकदुस्रेन्के सँग लडाइ नाए होए, बल्कि उनके एक-दुस्रेके ताहीं देखभार होन पणो।

²⁶ अगर शरीरके सँग कोइ अंग दुख पातहए तओ बोके सँग शरीरके औ सबए अंग दुखी होत हएं। अगर कोइ एक अंगको आदर बढतहए कहेसे सबए अंग सँगए आनन्द मनात हएं।

²⁷ जहे परकार, तुम सब मिल्के ख्रीष्टको शरीर हओ, और तुम मैसे सबए बाके हओ, बाके शरीरके अंगके समान हओ।

²⁸ मण्डली या ख्रीष्टके जा शरीरमे, परमेश्वर हमएं बहुत परकारके काम दइ हए: पहिले, बे आदमी हएं जो येशूसे चुनेभए चेला हएं; दुस्रे, बे जो अगमबक्ता हएं जो बाके शब्दन्के मस्कत हएं; तिस्रे, बे आदमी हएं जो सिखात हएं। बाके पिच्छु, बे आदमी हएं जौनन्के बा चमत्कारको काम करनको अधिकार दइ रहए। तओ पिच्छु बो हए जौनके बा चङगाइ करनको अधिकार दइ। तओ फिर बे, जौनन्के दुस्रेन्के मदत करनको बरदान मिलो। तओ फिर बे, जो अगुवा हएं। तओ फिर बे, जौनन्के बरदान प्राप्त भओ पबित्र आत्मा द्वारा दओगओ फरक-फरक भाषा मस्कन बारेनके चुनी हए।

²⁹ सब चुनेभए चेला, सबए अगमबक्ता, सबए सिखान बारे गुरु नाए होत हएं। सबए अचम्मोके काम नाए करत हएं।

³⁰ सबए सँग चङगाइ करनको बरदान नाए होत हए। सब फरक-फरक भाषा नाए मस्कत हएं, सबए सँग फरक-फरक भाषाको अर्थ खोलन बारो बरदान नाए होत हए।

³¹ का सबए सँग फरक-फरक भाषाको अर्थ खोलन बारो बरदान होत हए? तओ तुमके इमान्दारीसे सबसे उपयोगी बरदानन्को इच्छा करन चाहो। पर अब मए तुमके सबसे अच्छो डगरके बारेमे बतामंगो।