1 कोरिन्थी 10 - राना थारु नयाँ नियम

इस्राएलके इतिहाससे चितउनी

¹ हे मेरे बिश्वासी ददाभइयओ, मए चाँहत हओं कि तुम याद करओ, कि जंगली इलाकामे हमरे पुर्खनके सँग बहुत समय पहिले का भओ रहए। परमेश्वर बे सबके एक बादर पठाएके निर्देशन करी, जो उनके अग्गु-अग्गु चलत रहए। और बादर बे सबके सुखो भओ जमिनके कता लाल समुन्दरके पानीके बीचसे सुरक्षित रुपसे लाइ।

² हम जा कहे सकत हएं: जैसे हम प्रभु येशूके चेला बननके ताहीं बप्तिस्मा लेत हएं। उइसीयए बे सब बादरके छाहीँमे रहएं और मोशाके चेला बननके ताहीं लाल समुन्दरसे गए रहएं।

³ बे बहे रोटी खाइं, जोके परमेश्वर उनके ताहीं स्वर्गसे दइ रहए।

⁴ बे सब बो पानीके पिइं जो परमेश्वर उनके दइ रहए। काहेकी बे एक चट्टानसे निक्रन बारो पानीके पिइं, और बो चट्टानको तुलना ख्रीष्टसे करोजाए सकत हए जौन उनके सँग जाएके उनके जीबन दइ।

⁵ पर परमेश्वर उन मैसे बहुत आदमीनसे खुसी नाए रहए, जहेमारे बे जंगली इलाकामे मरिगए।

⁶ बहुत पहिले हमरे पुर्खनके सँग भओ जे बात हमरे ताहीं चेतावनी हए, कि अगर हम उनके कता खराब काम करन इच्छा करत हएं कहेसे तओ का होबैगो।

⁷ और तुम मूर्ति पूजन बारे मतबनओ; जैसे कि बिन मैसे कितने मूर्ति पूजन बारे बनिगए रहएं, जैसे पबित्र-शास्त्र कहात हए, “आदमी खान पिनके ताहीं भोजमे बैठिगए, और फिरसे अनैतिक काम करनके ताहीं उठीगए।”

⁸ और हम व्यभिचार नाए करएं; जैसे उन मैसे कितने व्यभिचार करीं और एक दिनमे तेईस हजार मारे गए।

⁹ और हम प्रभुके परीक्षा नाए करएं; जैसे उन मैसे कितने आदमी परीक्षा करीं, और साँपके द्वारा मारे गए।

¹⁰ और हमके गनगन करन फिर नाए पणो, जौन रितिसे उन मैसे कितने आदमी गनगन करीं, तओ परमेश्वर एक दुत पठाइ और उनके मारडारी।

¹¹ पर जे सब बात, जो उनके उपर पणीं, बे चेतावनीके रुपमे रहएं। और बे बात, हमके चेतावनी देनके ताहीं लिखेगए हएं। हम अब संसारको अन्त होन समय घेन आइगए हएं।

¹² जहेमारे अगर हुवाँ कोइ अइसो आदमी हए, जो कहात हए कि परमेश्वरमे बोको भरोसा मजबुत हए, तओ बोके साबधान रहान चाहो। कहुँ अइसो नाए होए, कि बो अचानक परीक्षामे पड्के पाप करए।

¹³ पाप करनको इच्छा हम सबके ठिन जरुर आत हएं, पर परमेश्वर बिश्वासयोग्य हए: काहेकी परमेश्वर तुमर ताहीं अइसो एकौ परीक्षा नाए देहए, जो परीक्षामे तुम लणनमे सक्षम नाए होओ। बल्कि परमेश्वर तुमके शक्ति देबैगो, ताकी तुम पापसे बचनमे सक्षम रहाओ।

प्रभु-भोज और मूर्तिपुजाको भोज

¹⁴ जहेमारे मेरे प्यारे बिश्वासी ददाभइयओ, मूर्तिके आराधना मत् करओ।

¹⁵ मए समझदार मानके तुमसे कहात हओं: ध्यानसे सोँचओ, कि जो मए कहानके जाएरहो हओं बो सही हए या नाए हए।

¹⁶ जब हम प्रभु भोजमे इस्तमाल करेजान बारे कटोरासे अंगुरको रसा पिइत हएं, जोके ताहीं हम परमेश्वरके धन्यबाद देत हएं, तओ हम नेहात्तओकमे ख्रीष्टको बलिदानको खुनमे सामिल हएं। और जब हम रोटी तोडत हएं और जाके खात हएं, तओ हम नेहात्तओकमे ख्रीष्टको शरीरमे सामिल हएं।

¹⁷ एक रोटी जा बातको संकेत हए, कि हम बहुत जनै ख्रीष्टमे एक शरीर हएं। काहेकी हम सब जनै एकए रोटीसे खात हएं।

¹⁸ इस्राएल देशके आदमीनके रिति-रिबाजके देखओ: बलि चढाओ भओ खानु खात हएं तओ परमेश्वरको पुजामे सामिल होत हएं। अइसियए जो आदमी मूर्तिनको चढाओ गओ खानु खात हएं, बे फिर मूर्तिनको पुजामे सामिल होत हएं।

¹⁹ मए का कहानके कोसिस कर रहो हओं? का मए जा कहे रहो हओं, कि मूर्ति सच्चो परमेश्वर हए, जौनके ताहीं बलि चढाओ जातहए और जे बलिदान कुछ मोलके होत हएं?

²⁰ नाए! बिरकुल नाए! बस जा, कि जौन चीजके ताहीं आदमी मूर्तिनके बलि चढात हएं, बे परमेश्वरके ताहीं नाए, बल्कि भुतके ताहीं चढात हएं। और मए नाए चाँहत हओं, कि तुम भुतनके सँग सामिल होओ।

²¹ भुतके जो चढाओगओ हए बोको खान-पिनमे सामिल होन तुमर ताहीं जा सम्भब नाए हए। पर बहेके सँग खान-पिनमे सामिल होओ, जो हमके प्रभुको मृत्युके याद करबात हए।

²² अगर तुम दुष्टके खान-पिनमे सामिल हुइहओ, तओ तुम नेहात्तओ प्रभुके क्रोधित करदेबैगे। याद करओ, कि तुम परमेश्वरसे जद्धा बलवान नाए हओ।

बिश्वासीनको स्वतन्त्रता

²³ तुम कहात हओ, “हम कुछु फिर करनके ताहीं स्वन्त्र हएं।” हाँ, लेकिन हमरे ताहीं सब कुछ अच्छो नाए हए। हम कुछु फिर करनके ताहीं स्वन्त्र हएं, लेकिन सब कुछ परमेश्वरमे हमर बिश्वासके मजबुत नाए करत हए।

²⁴ कोइ अपनुवए इकल्लो भलाइके ध्यान नाए देबए बल्कि दुस्रेनको भलाइके ताहीं फिर ध्यान देबए।

²⁵ बजारमे बिकन बारे सब मेलके बुट्टी खाए सकत हओ। जा मत् पुँछीयओ, कि जा मूर्तिनके ताहीं दओगओ रहए या नाए दओगओ रहए। तओ फिर तुमर बिबेकके परेसान नाए होबैगो

²⁶ तुम खाए सकत हओ काहेकी पबित्र-शास्त्र कहात हए, “पृथ्वी और बोमे भओ सब चीज प्रभुको हए।”

²⁷ और अगर गैर-बिश्वासीन मैसे कोइ तुमके निउतो देबए, और तुम जान चाँहत हओ कहेसे जो कुछ तुमर अग्गु धरो जाबैगो बोके खाएलियओ; और तुमके जा नाए पुँछन चाहो, कि जाको बलि दओगओ हए कि नाए। ताकी अगर जाको बलि दओगओ होएसे फिर तुम दोषी महसुस नाए करैगे।

²⁸ लेकिन अगर कोइ तुमसे कहात हए कि, “मूर्तिनके बो खानु बलि चढाओ भओ रहए,” तओ जाके मत् खाओ, अपनो अन्तरआत्माके मारे नाए, बल्कि बोको बिबेकके कारणसे जौन तुमके बताइ रहए। काहेकी मिर स्वन्त्रताके कोइ अन्य आदमीको बिबेक द्वारा न्याय नाए करोजान चाहो।

²⁹ मिर कहाइ, तुमर अपने बिबेकसे नाए हए, पर बे अन्य आदमीनसे हए। का फाइदा अगर तुम अपनी स्वन्त्रतामे जोड देत हओ कि खाओ जाए सकत हए और दुस्रे आदमी सोँचत हएं कि जा पाप हए? कुछ फाइदा नाए हए।

³⁰ अगर मए अपनो खानु धन्यबाद दइके खाए रहो हओं जो मूर्तिनके चढाओगओ हए। तओ जोमे मए धन्यबाद देत हओं, बोके कारण मोके काहे आरोप लगाओ जातहए?

³¹ अन्तमे, मए तुमसे जा कहान चाँहत हओं कि तुम चहुँ खाओ, चहुँ पिइयओ, चहुँ जो कुछ करओ, सब कुछ परमेश्वरको महिमाके ताहीं करओ।

³² मए सबके खुसी करनके कोसिस करत हओं, मए एकको भलाइके बारेमे नाए सोँच रहो हओं, बल्कि सबको भलाइके बारेमे सोँच रहो हओं, ताकी उनके बचाओ जाए सकए। उइसीयए तुम फिर अइसियए रहाबओ, ताकी यहूदी या ग्रीक भाषा मस्कन बारे या परमेश्वरके मण्डलीके ताहीं कोइ मुस्किल नाए होबए।

³³ मिर देखासेखी करओ। मए जो कुछ फिर करत हओं, बे सबके खुसी करनके कोसिस करत हओं। काहेकी मए अपने भलाइके बारेमे नाए सोँचत हओं, बल्कि सब आदमीनको भलाइके बारेमे सोँचत हओं। ताकी उनके अपने पापनको न्यायसे बचाए जाए सकएं।