1 कोरिन्थी 1 - राना थारु नयाँ नियम

¹ मए, पावल जा चिट्ठीके लिखरहो हओं। मए चुनो भओ चेला होनके ताहीं परमेश्वरको इच्छासे ख्रीष्ट येशू द्वारा बुलाओ गओ हओं। मए हियाँ हमरे सँगी बिश्वासी सोस्थेनेसके सँग हओं, जौन मोके मदत करत हए।

² मए जा चिट्ठी तुमके पठाएरहो हओं, जो कोरिन्थ सहरमे भए परमेश्वरके मण्डली हएं, अर्थात् हम जे बात लिखत हएं, जौनके परमेश्वर अपने आदमीनके रुपमे अलग करीहए। बा तुमके ख्रीष्ट येशूमे एकजुटमे बाँधी हए, और बा तुमके पबित्र आदमी होनके बुलाइ हए; उइसीयए, जैसे परमेश्वर औ सब आदमीनके छानी हए, जौन हमरे ठिहामे हमर प्रभु येशू ख्रीष्टको सेवा करत हए, काहेकी बा हमर सबको प्रभु हए।

³ मए प्राथना करत हओं, कि हमर दौवा परमेश्वर और प्रभु येशू ख्रीष्ट तुमके अनुग्रह करैगो, और तुमके शान्ति प्रदान करैगो।

पावल परमेश्वरके धन्यबाद दइ

⁴ मए तुमर ताहीं अपनो परमेश्वरके रोज धन्यबाद देत हओं, काहेकी परमेश्वर तुमके ख्रीष्ट येशूके सँग तुमर एकजुटके कारण बहुत अनुग्रह करीहए।

⁵ काहेकी हर बातमे तुम बहुत आशिष पाएहओ, काहेकी तुम ख्रीष्ट सँग एकजुटमे हओ। बो जा हए, कि बा तुमके अप्नो बचन मस्कनके और बुझनके सब किसिमको खास क्षमता दइ हए।

⁶ अइसियए परमेश्वर तुमके, ख्रीष्टके बारेमे सच्चो सन्देश हए कहिके प्रमाणित करी।

⁷ और जहेमारे, पबित्र आत्मा तुमके सब आत्मिक बरदान दइ हए, जौनको तुमके जरुरत हए, जबकी तुम हमर प्रभु येशू ख्रीष्टके लौट आनको आसरा कर रहेहओ।

⁸ हमर प्रभु येशू ख्रीष्ट पृथ्वीमे लौटके आन बारो दिनमे, तुम निर्दोष होबओ कहिके परमेश्वर तुमके अन्तक बिश्वासमे मजबुत बनाबैगो।

⁹ परमेश्वर तुमके अपनो लौंणा, हमर प्रभु येशू ख्रीष्टके सँग एकजुट होनके ताहीं छानी हए, और परमेश्वर अपनो प्रतिज्ञा बिश्वाससे पुरा करत हए। तब्ही इकल्लो तुम पक्का हुइपाबैगे, कि परमेश्वर जे सब तुमर ताहीं करैगो।

मण्डलीमे बिभाजन

¹⁰ हे बिश्वासी ददाभइया, हमर प्रभु येशू ख्रीष्टको अधिकारसे, मए तुमसे अइसे करनके ताहीं बिन्ती करत हओं, कि तुमरमे फुट नाए होनचाहो।

¹¹ काहेकी, मेरे बिश्वासी ददाभइया, क्लोएके परिवारके आदमी मोके तुमर बारेमे बताइ हएं, कि तुमर बीचमे लणाइ होए रहो हए।

¹² मिर कहानको मतलब जा हए, कि तुम मैसे कोइ त अपनएके “मए पावलको चेला हओं,” कोइ “मए अपोल्लोसको चेला हओं,” कोइ “मए केफासको चेला हओं” और कोइ “मए ख्रीष्टको चेला हओं” कहात हओ।

¹³ जा अच्छो नाए हए, काहेकी ख्रीष्ट समुहसे नाए बँटो हए। जा पावल नाए रहए, जो क्रूसमे तुमर ताहीं मरो। और अइसियए, तुम पावलके नाउँमे बप्तिस्मा नाए लए?

¹⁴ मए परमेश्वरके धन्यबाद देत हओं, कि जे दुई भइया बाहेक अर्थात् क्रिस्पस और गायसके छोडके मए तुम मैसे कोइके फिर मिर चेलाके रुपमे बप्तिस्मा नाए दओ हओं।

¹⁵ जहेमारे कोइ फिर जा नाए कहे सकत हए, कि तुमए मेरे चेलाके रुपमे बप्तिस्मा दओ गओ।

¹⁶ हाँ, अब मोके याद आइगओ, कि मए स्तिफनासको परिवारके फिर बप्तिस्मा दओ; जे बाहेक मए औ कोइके बप्तिस्मा दओ पता नाए हए।

¹⁷ काहेकी ख्रीष्ट मोके बप्तिस्मा देनके ताहीं नाए बल्कि अच्छो समाचार सुननके पठाइ हए, और जब मए अच्छो समाचारके परचार करत हओं, तओ मए मस्कनके ताहीं अपनो सिप प्रयोग नाए करत हओं। नत्, आदमी मिर उपर सिर्फ मेरे सिपके कारण मोके बिश्वास करते, और बे क्रूसमे ख्रीष्टको मृत्युकी शक्ति नाए जन्ते।

¹⁸ जब आदमी जा सन्देश सुनत हएं, कि ख्रीष्टको मृत्यु क्रूसमे भओ, तओ बे मैसे कोइ-कोइ जा सोँचत हएं, कि जा सन्देश व्यर्थ हए। जौन आदमी अइसो सोँचत हएं बे नरक घेन जाएरहेहएं। पर हमरे ताहीं जौन बो सन्देशमे बिश्वास करत हए, जा परमेश्वरके आदमीनके अपनो शक्तिसे बचानको तरिका हए।

¹⁹ काहेकी पबित्र-शास्त्रमे परमेश्वर कही हए, “मए जा साबित करंगो कि जौन, आदमीनको बिचारनके जा संसारके आदमी बुद्धिमान सम्झत हएं, बास्ताबमे बे बिचार मुरख हएं मए जा साबित करंगो, कि बास्ताबमे बे बिरकुल फिर बुद्धिमान नाए हएं।”

²⁰ उइसो हए तओ, हम बुद्धिमान आदमीनके बारेमे का कहे सकत हएं? हम मोशाको नियम कानुन सिखान बारेसे का कहे सकत हएं? हम संसारके अइसे आदमीनके बारेमे का कहे सकत हएं जो मस्कनमे चलाँक हएं? परमेश्वर बे सबके मुरख बनाए दइ हए और उनको ज्ञानके व्यर्थ दिखाए दइ हए।

²¹ मए जा जहेमारे कहात हओं, काहेकी परमेश्वर बुद्धिमानके साथ जा फैसला लइ, कि जा संसारके आदमी अपनो ज्ञानके द्वारा बोके जाननमे सक्षम नाए होमंगे। जहेमारे परमेश्वर बे आदमीनके बचानको बिचार करी जो बो अच्छो समाचारमे बिश्वास करत हएं जौनको हम परचार करे, हियाँतककी बे आदमी जो बिश्वास नाए करत हएं, कि हमर परचारको कोइ फाइदा नाए हए।

²² जा यहूदीनके ताहीं मुरख जैसो लगत हए काहेकी बे स्वर्गसे एक शक्तिशाली काम चाँहत हएं जौन जा साबित करनके ताहीं, कि जा सत्य हए और ग्रीक भाषा मस्कन बारे आदमी फिर जौन मानबिय ज्ञानके ढुणत हएं।

²³ पर हम जा परचार करत हएं, कि ख्रीष्ट हमके हमर पापसे छुटकारा देनके ताहीं क्रूसमे मरो। यहूदीनके ताहीं जा ठेस लगन बारो बात भओ और गैर-यहूदीनके ताहीं जा मुरख बात ठहिरो।

²⁴ पर बे, जौनन्के परमेश्वर अपने आदमी होनके ताहीं बुलाइ हए चहुँ यहूदी होए चहुँ ग्रीक भाषा मस्कन बारे होएं, ख्रीष्ट परमेश्वरको शक्ति और परमेश्वरको ज्ञान हए।

²⁵ परमेश्वरको जा मुरख योजना आदमीनको सबसे ज्ञानवान योजनासे फिर ज्ञानवान हए, और परमेश्वरको कमजोरी फिर आदमीनको शक्तिसे जद्धा मजबुत हए।

प्रभुमे इकल्लो घमण्ड

²⁶ हे मेरे ददाभइयओ, जाके बारेमे याद करओ, कि जब परमेश्वर तुमके बुलाइ रहए बो समयमे तुम कैसे रहओ, तुम आदमीनको नजरमे जद्धा ज्ञानी नाए रहओ, कुछ आदमी शक्तिशाली नाए रहओ, और सामाजिक हिसाबसे उच्च खानदानके नाए रहओ।

²⁷ बल्कि, परमेश्वर अइसे आदमीनके चुनी, जौनके संसार मुरख सम्झत हए, ताकी बे आदमीनके सरमबाए देबए जो सोँचत हएं, कि बे ज्ञानवान हएं। और परमेश्वर अइसे आदमीनके चुनी जो निर्बल हएं, ताकी उनके सरममे पारए जो बलवान हएं।

²⁸ और परमेश्वर अइसे आदमीनके चुनी जौननके संसारके द्वारा तुच्छ करेगए रहएं, अइसे आदमी जौनन्के कुछु फिर नाए सम्झो जात रहए और उनको उपयोग नाश करनके ताहीं करोजात रहए जोके संसार महत्त्वपूर्ण सम्झत रहए।

²⁹ परमेश्वर अइसो जहेमारे करी, ताकी कोइ फिर आदमी परमेश्वरके अग्गु घमण्ड नाए करपाबए।

³⁰ पर परमेश्वर तुमके येशू ख्रीष्टमे एकजुट बनाइ हए, और ख्रीष्टद्वारा परमेश्वर हमके अपनो बुद्धि दइ हए। परमेश्वर हमके अपनो नजरमे धर्मी फिर ठहिरात हए। ख्रीष्टके द्वारा हम सब पबित्र बनाए गए हएं, और बा हमके पापसे छुटकारा करत हए।

³¹ काहेकी ख्रीष्ट हमर सब कुछ हए, उइसीयए करओ जैसे पबित्र-शास्त्र कहात हए, “घमण्ड करन बारे आदमी बहेमे इकल्लो घमण्ड करएं, जो प्रभु करीहए।”