RUKA 15 - Kîrîîkanîro Kîîyerû

Ngerekano ya ng'ondu yûrîîte

¹ Îgiita rîmwe arûngithia ûgooti na eeyia ibaayire kwîgua bûra Yiesû aarutanaga.

² *Abarisai na aarimû ba watho baanjîîria kûnung'una bakîûragia, “I mbi îgûtûma muntû ûyû athagaana eeyia na arîyanîra na bo?”

³ Yiesû abaa ngerekano îno. Abaûria,

⁴ “Bûrîthûgaania ata? Ûkeegua muntû arî na ng'ondu ciake îgana, îmwe ya cio îkaûra, ntikuuga natiga inu ingî mîrongo kenda na kenda bantû eega akathi gûcûa îra mbûru mwanka rîra akaamîona?

⁵ Akaaya kûmîona amîîkîra ituro akamîkamata akeneete mûno,

⁶ aakinya mûciî ageeta acoore baake na atûûri akabeera, ‘Tûkeneereeni tûrî amwe n'ûntû nkwona ng'ondu yakwa îra îkûûrîîte.’

⁷ “Ga nkûbwîra, gîkeno ta gîku i kîo wîgagua kîrî îgûrû rîra mwîyia ûmwe eerira. Wîgagua kûrî na gîkeno ta gîku, kîînene mûno nkûrûki ya kûrî na antû mîrongo kenda na kenda baagîru batarî na ûntû bwa kwîrirîra.”

Ngerekano ya fetha îrî îmbûru

⁸ Yiesû abaa ngerekano îîngî. Abeera, “Î kana rî, kûrî mwekûrû aûmba kwîgua arî na fetha îkûmi, îmwe ya cio yaûra akarega kûmuntia taa athûkia gîciati aciata nyomba amîceria bwega mwanka rîra akaamîona?

⁹ Akaaya kûmîona, eeta acoore na atûûri bonthe akabeera, ‘Tûkeneereeni amwe n'ûntû nkwona fetha îra ngûteete.’

¹⁰ “Ga nkûbwîra, ûgu i ta bu araîka ba Ngai bakenaga mwîyia ûmwe eerira.”

Ngerekano ya mwana ûra aûrîîte

¹¹ Yiesû aacooka abaa ngerekano îngî kaîrî. Abeera, “Ikwarî na muntû ûmwe aarî na nthaka ciake ciîrî.

¹² Ûra mûniini eera îthe, ‘Baaba, ngaîra into biakwa weendî bira ûraayaga kûngaîra.’ Îthe abagaîra.

¹³ “Nyuma ya ntugû inkai nthaka înu yarî niini, yendia into bia yo bionthe yakamata mbia yathi na cio bwa nthîgûrû îngî, kûraaya na mûciî wao. Yenyangia kîra kîonthe yarî na kîo na mantû maathûûku.

¹⁴ Îkûthiria mbia, nthîgûrû înu yagwatwa i yûûra rîînene mûno. Mûthaka ûyu aanjîîria kûnyamaara.

¹⁵ Aathi gûcûa ngûgî kwa muntû ûmwe naagu nthîgûrû înu. Muntû ûyu amwaa ngûgî ya kûmûrîîthîria ngûrwe ciake.

¹⁶ Mûthaka aagwatwa i yûûra mwanka eenda kûrîa makonde mara ngûrwe ciarîaga. Gûtirî muntû aamûrûmagia gîntû gîa kûrîa.

¹⁷ “Akûthûgaania, aacooka aarîcûkwa. Eebûûria, ‘N'aruti ngûgî bagana barî kwa baaba bakûrîa bakabaa na irio bigatigara, naani nwaka nkûgûîra naaga i yûûra!

¹⁸ Ndîînûka nthi mbîîre baaba, “Baaba, imbîyîîtie kîrî Ngai, na kîrî woû.

¹⁹ Wana ntiagîrîte gwîtwa mwana waku kaîrî. Itû, aba, nthûkia ta ndî ûmwe wa aruti ngûgî baaku.” ’

²⁰ Kwoogu aûkîîra aanjîîria kwînûka mûciî kwa îthe. “Waarî gataaria mma, îthe akûmwona aayîîte amwîgua kîao. Augia rwîro amûthagaana. Akûmûkinyîîra amûrigicîîria njara, amûcunca.

²¹ “Mwana ûyu amwîra, ‘Baaba, imbîyîîtie kîrî Ngai na kîrî woû. Wana ntiagîrîtwe gwîtwa mwana waku kaîrî.’

²² “Îthe eeta aruti ngûgî baake. Abeera, ‘Îthiini na mpwî bûreete nguo îra nthongi mûno bûmwîkîre. Na bûcooke bûmwîkîre mbete kîara na iraatû magûrû.

²³ Rîru bûthi bûreete njaû îra noru bûûrage tûrîeni tûkeneere,

²⁴ n'ûntû mwana ûyû i taka araarî ûmûkuû aariûka. Naraûrîîte oonara!’ Baanjîîria gûkeneera.”

²⁵ “Mwana wake ûra mûkûrû aarî mûndaani akîrutaga ngûgî. Arî njîraani eenûkîîte, arî akubî na mûciî eegua antû bakiina.

²⁶ Eeta mûruti ngûgî ûmwe amûûria, ‘N'ata antû bakûrûtha aaga?’

²⁷ “Mûruti ngûgî ûyu amwîra, ‘Mûruanyûkwe naayire na abaagu akûmûthînjîra njaû îra noru n'ûntû bwa kûmûcookera kaîrî arî mwoyo.’

²⁸ “Mûthaka ûyu ûngî eegua ûgu aathûûra, aarega kûthûngîra nyomba înu. Îthe aumagarûka nja kûmwereka athûngîra.

²⁹ Mûthaka ûyu eera îthe, ‘Ntûîre gûkûrutîra ngûgî mîanka îmingî ngîkwathîkagîra na gûtirî ntugû wampa nwa kabûri nthînja tûrîyanîra na tûkenanîra na acoore baakwa.

³⁰ Îndî mwana ûyu waku akûûya we, nyuma ya kwînyangia into na marwaya wamûthînjîra njaû îra noru!’

³¹ “Îthe amwîra, ‘Mwana wakwa, tûrî naawe aaga ntugû cionthe na into bibi ndî na bio bionthe i biaku.

³² Kwoogu ikwagîrîte kûrûtha kîatho gîkî tûrîyanîra na tûkena tûrî amwe, n'ûntû mûruanyûkwe ûyû i taka arakuîte aariûka. Naraûrîîte oonara.’ ”