RUKA 13 - Kîrîîkanîro Kîîyerû

Gîtûmi gîa kwîrira

¹ Kagiitaani wagaku antû bamwe ba bara baarî agu beera Yiesû mantû ma antû ba kuuma Gariiri, bara Piraatû aûragithiirie bakîrutîra Ngai kîgongwana kîao barî ara kîgongwana kîa nyamû kîarutagîrwa.

² Yiesû abaûria, “Kabûkûthûgaania antû babu baûragirwe n'ûntû i bo baarî na meeyia nkûrûki ya antû bara bangî bonthe ba gîteere kîa Gariiri?

³ Arî, gîku ti kîo kîarî gîtûmi. Ga nkûbwîra, twanga bûkeerira meeyia meenu, bûkaathira wata bo bwinthe.

⁴ Kana ibûkûthûgaania antû bara îkûmi na banaana, bara boomokeerwe i nyomba îra yarî îndaaya mûno Siroamu yabaûraga ka baarî na meeyia nkûrûki ya antû bonthe ba Njerusaremu?

⁵ Arî gîku ti kîo kîarî gîtûmi. Ga nkûbwîra, twanga bûkeerira meeyia meenu, bûkaûra bwinthe wata bo.”

Ngerekano ya mûkûyû ûtaaciaraga

⁶ Yiesû aaria agîtûmagîra ngerekano eera antû, “Muntû ûmwe naarî na mûkûyû mûndaani wake wa mîcabiibû. Akûthi kwona kana nwaciere nkûyû, eethîra ûtaciere.

⁷ Eera mwandîkwa wake wa mûnda, ‘Taraitha wone mîanka îthatû îkûthira wankîîyaga kwona kana mûkûyû ûyû nûciere, îndî gûtirî rîo ndoona ûciere. Curîîke ûtige kûmbonderia mûnda mana.’

⁸ “Mwandîkwa eera mwene mûnda, ‘Rekana na uu itû, aba, mbambe ncurîmîre na ncuîkîre mboreo mwanka ûyû.

⁹ Ûkaaya gûciara matunda, mwanka ûyu ûngî ûkare. Îndî ûkarega gûciara amwe na ûgu, rîru i rîo ûkauga ûrîîkwe!’ ”

Yiesû ooria mwekûrû aarî kîonje ntugû ya Sabatû

¹⁰ Ntugû îmwe ya *Sabatû, Yiesû naarutanaga *sinagoogiini.

¹¹ Ikwarî na mwekûrû ûmwe gûku aarî na kîrundu kîîthûûuku kîamwonjeetie bantû a mîanka îkûmi na înaana. Mwekûrû ûyu aathiyaga agûnkuîte mwanka gwatuîka mûgongo wake ûtigîtambûrûka, arûngama bwega.

¹² Yiesû akûmwona amwîta. Amwîra, “Ûkworua wonje bwaku, mwekûrû.”

¹³ Yiesû akûmwaigîîra njara, nthûti îmwe mûgongo wake watambûrûka. Mwekûrû ûyu akûrûngama, aakaatha Ngai.

¹⁴ Mûtongoria wa sinagoogi aathûûra Yiesû akworania ntugû ya Sabatû. Eera antû, “Kûrî ntugû ithanthatû cia kûruta ngûgî. Rîru i rîo bwagîrîtwe kûûya bûkoorua, îndî ti ntugû ya Sabatû.”

¹⁵ Mwathani amûcookeria amwîra, “Eebwithia baba! N'ûû wacienu atarugûragîra ng'ombe yake kana îng'ooi rîake athi kûnyuithia ntugû ya Sabatû?

¹⁶ Mwekûrû ûyû we n'wa rûrîîyo rwa Îburaîmu, Saitaani naratûîre amûthaîkîîte mîanka îkûmi na înaana. Kaatabatîîrue athaûrwa auma kîthaîkooni ntugû ya Sabatû?”

¹⁷ Ûgu Yiesû augire ibweekîîre anthû baake nthoni. Antû bonthe baakena n'we n'ûntû bwa mantû mara aarûthire ma kûrigaria.

Ngerekano ya gapîndî ka mûtî na ya ndawa ya kwimbithia mîgaate

¹⁸ Yiesû aûria, “I mbi mma mbûmba kûbuanaania n'yo ûnene bwa Ngai?”

¹⁹ Auga, “Bûkari ta gapîndî ka mûtî kara muntû aathûkiirie aanda mûndaani wake, gapîndî kara kaniini kîrî mpîndî cionthe. Gagûkûra gaatuîka mûtî ûmûnene, nyoni ciaya ciaka ntara mpong'iini cia uu.”

²⁰ Yiesû kaîrî aûria, “I mbi mma mbûmba kûbuanaania n'yo ûnene bwa Ngai?”

²¹ Auga, “Ûnene bwa Ngai bûkari ta ndawa ya kwimbithia mîgaate, îra mûka ûmwe aathûkiirie eekîra mûtuuni ûmwingî, yaimbithia mûtu ûyu unthe aguukanda.”

Mwîrîga ûmûcege

²² Yiesû waathiîte bwa Njerusaremu, aariûnga na mataûni na ntûûra akîrutanaga antû.

²³ Muntû ûmwe amûûria, “Mwathani, n'antû baakai bakoonokua kana i baingî?” Yiesû auga,

²⁴ “Geragiani mûno kûthûngîra na mwîrîga ûra mûcege. Bara baingî bagaacûûgia kûthûngîra na uu baremwe.

²⁵ Îgiita rîgaakinya mwene mûciî ainge mûrango. Na rîra bûkaaya bûkaarûngama nja bwanjîîrie kûringaringa mûrango bûkîmwîraga, ‘Mwathani, tûrugûrire.’ “Îndî akaabwîra, ‘Ntiyî bûra buumîîte!’

²⁶ “Abwîra ûgu, bûkîanjîîria kûmwîra, ‘Anga tûtaarîyanagîra na tûkanyunyanîra naawe? Anga ûtaarutanaga ntûûraani cietû?’

²⁷ “Mwene mûciî akaabwîngatia abwîre, ‘Ntibwiyî. Umaani aaga ndî eeyia baba.’

²⁸ “Abwîra ûgu bûkîanjîîria kûrîra bûrî na kîeba kîînene mûno bwona Îburaîmu, Isaka, Njakubu, na iroria bionthe birî ûneneeni bwa Ngai, naabi bûtigîîtwe nja.

²⁹ Antû bakauma nteere cionthe cia nthîgûrû baaye bakaranîîre amwe ûneneeni bwa Ngai.

³⁰ Rîru i rîo bara ba mûthia bagaatuîka ba mbere, ba mbere batuîke ba mûthia.”

Yiesû eegua Njerusaremu kîao

³¹ Îgiita rîru Yiesû augaga ûgu rîongwa, *Abarisai bamwe baaya bamwîra, “Toorooka ûthi n'ûntû Eronde nabangîîte gûkûûragithia.”

³² Yiesû abeera, “Îthiini bwîre mûkangayia ûyu îmunthî inkwîngatia irundu biithûûku na nkîoranagia. Na wana rûû na aûke nwa bu nkaarûtha, mwanka rîra nkaathiria ngûgî yakwa.

³³ Nwa mwanka nthi na mbere na rûgendo rwakwa Njerusaremu, n'ûntû gûtiûmbîka kîroria kîûragîrwa bantû angî tatiga Njerusaremu!”

³⁴ Yiesû auga, “Biû antû ba Njerusaremu, bûûragîîte iroria na bwaringanga bara Ngai aabûtûmîîre na maiga! I maita magana mbendaga kûbwîthîrania amwe ta ngûkû bûra îîthîranagia tûcwi twa yo îgatûguîkîra na mathabu ma yo, îndî naabi bûkarega!

³⁵ Ata rî, ntûûra yenu îgaatigwa îrî îganjo. Na ga nkûbwîra, bûtimbona kaîrî mwanka rîra bûkauga, ‘N'ûmûthaarime ûra aayîîte kwa riîtwa rîa Mwathani.’ ”