NJOANA 15 - Kîrîîkanîro Kîîyerû

Yiesû n'we mûcabiibû wa mma

¹ Yiesû eera arutwa baake, “I niû mûcabiibû wa mma, na Baaba n'we muurîmîri.

² Rwong'i rwakwa runthe rûra rûtaciaraga narutemaga, na rûra rûciaraga narutheragia kaingo rûciara nkûrûki.

³ Biû ibûrîîkîîtie kûtherua i kiugo kîra mbûrutanîîte.

⁴ Karagaani ndeni yakwa, naani ngaakaraga ndeni yenu. Wata bûra rwong'i rûtaûmba gûciara rûrî runka rûtarî mûcabiibûûni, i ta bu kinya biû bûtaûmba kûrûtha ûntû bûtarî ndeni yakwa.

⁵ “I niû mûcabiibû, naabi i biû mpong'i. Ûra akaraga ndeni yakwa naani ngakara ndeni yake naciaraga rûciaro rwingî. Gûtirî bu bûûmba kûrûtha bûtarî na ûteethio bwakwa.

⁶ Muntû ûra atakaraga ndeni yakwa, akari ta rwong'i rûra rûtemagwa rûgateegwa rûkaûma. Na mpong'i ta inu iciîthîranagua ikagerwa mwankiini, ikabîîthua.

⁷ Weegua bûgaakaraga ndeni yakwa na biugo biakwa bigaakaraga ndeni yenu, ûntû kinya bûrîkû bûra bûkeendaga, bwaromba bûkaarûthagîrwa bu.

⁸ Ibûtûmaga Baaba akumua bwaciara rûciaro rwingî na bwonanagia bûrî arutwa baakwa.

⁹ “Mbwendeete ta bûra Baaba ambendeete. Bûtikaareke wendo bwakwa buuma kîrî biû.

¹⁰ Nkabwendaga weegua bûkaathîkagîra maathana maakwa ta bûra na niû mbathîkagîra maathana ma Baaba, akaambenda.

¹¹ “Ndabwîra mantû mama kaingo gîkeno kîra kiumanagia naani gîkaraga ndeni yenu na kaingo bûkaraga bûkeneete mûno.

¹² Yathana rîakwa na rîo i rîrî, endanagaani ta bûra mbwendeete.

¹³ Gûtirî wendo bûkûrûkîîte muntû kûruta mwoyo wake n'ûntû bwa acoore baake.

¹⁴ Na i biû acoore baakwa weegua bûkaarûthaga bûra nkûbwîra.

¹⁵ Ntibwîta aruti ngûgî kaîrî, n'ûntû mûruti ngûgî atimenyaga mûbango wa mûnene wake. Ndîbwîta acoore baakwa n'ûntû biû ndabwîra bunthe kûrû, bûra Baaba aambîîrîîte.

¹⁶ Ti biû bwanthuurire. I niû ndabûthuurire, ndabwathûra ndabûtuîkithia ba kwongeera maciaro nkûrûki, kwongeera kûra gûtagîtaûka. Na kaîrî, kaingo Baaba abwaa kîonthe kîra bûkaamûromba kwa riîtwa rîakwa.

¹⁷ Yathana rîakwa kîrî biû i bwendanage.”

Kûmenwa kwa arutwa ba Yiesû n'antû ba nthîgûrû

¹⁸ Yiesû eera arutwa baake, “Wana bara barî ba nthîgûrû babûmena, ibwiyî i niû baamenire mbere.

¹⁹ Ûkeegua bûgwatanagîra na bo babwenda, n'ûntû wîgua bûrî baciao. Îndî n'ûntû bwa bûra ndabûthuurire kuuma kîrî kîrîndî gîku kîonthe, babûmeneete bûra bûtarî baciao.

²⁰ Ririkanagaani bûra ndabwîrire atî, ‘Nkombo t'yo îrî gîtûmi nkûrûki ya mûnene wa yo.’ Ûkoona baannyamaariirie, wana biû bakabûnyamaaria. Na ûkoona baathîkîîre kiugo gîakwa, wana biû bakaathîkîra bwabeera kîo.

²¹ Bakaabûnyamaaria n'ûntû bwakwa, i kwîgua batiiyî ûra antûmîîte.

²² Ûtiîgua bagîtarîrwa marî meeyia ûkeegua ntaaya mbaria na bo. Îndî îîndî bûra kûrî, bationa bwa kwîgwatia boonania batirî na meeyia.

²³ Ûra ammeneete kinya Baaba namûmeneete.

²⁴ Ûtiîgua bagîtarîrwa marî meeyia, ûkeegua ntaarûtha mantû matoororûthwa kaîrî i muntû ûngî bakîonaga. Îndî îîndî bûra kûrî, iboonire mara ndarûthire, îndî amwe na ûgu baammena na baamena Baaba.

²⁵ Îndî na rîo, gûkarîkîîte ûgu kaingo bûra kwandîkîîtwe *Maandîkooni maao Maatheru bûûyûra; ara kwandîkîîtwe, ‘Baammeneete woogû mana maatheri.’

²⁶ “Rîra nkaabûtûmîra Mûteetheeria kuuma kîrî Baaba, ûra aumaga kîrî we, ta we Kîrundu ûra oonanagia ûmma, agaankûûyîîra.

²⁷ Na wana biû nwa mwanka bûtuîke akûûyî baakwa kîrî antû, n'ûntû bûraarî naani kuuma kîambîrîria.”