NJOANA 12 - Kîrîîkanîro Kîîyerû

Yiesû aakwa maguta arî Bethania

¹ Kîatho gîa *Pasaka gîtigeerie ntugû ithanthatû gîkinya, Yiesû aathi Bethania kwa baRacaarû ûra aariûkîîtie.

² Yiesû aarugîrwa irio bia ûgoro. Mariitha n'we aabatûmîkagîra. Racaarû baakari bantû amwe na bara bangî baarî na Yiesû.

³ Maria aaya na ta nucu rita ya mîtaa yarî ya goro yeetagwa ‘nandi’. Aaka Yiesû yo mbayo, aagiria na ntundu ciake. Nyomba yonthe yaûyûra mûruke wa mîtaa înu.

⁴ Mûrutwa ûmwe wa Yiesû eetagwa Njundas Mûcikariota, ûra aarî akaamûkunyanîra, auga,

⁵ “Mîtaa înu îîndî îkîendiirue îtikiuma mbia inyingî mûno ikagaîrwa nkîa?”

⁶ Atauga ûgu n'ûntû bwa bûra aamakagîra nkîa. I bûra aarî mwaigi wa kîondo kîra beekagîra mbia na n'ûntû aarî mwamba, i cio aarîyaga.

⁷ Yiesû eera Njundas, “Rekana n'we. Aragaigîîte maguta mama n'ûntû bwa mathiko maakwa.

⁸ Gûtirî rîo nkîa ikaathira. Îndî niû ûtiîgua ndî amwe naabi îgiita rîkaaya.”

⁹ Antû baingî bakwîgua Yiesû naarî Bethania, baathi noogo kûmwona, naka bakîona Racaarû ûra Yiesû aariûkîîtie.

¹⁰ *Athînjîri bara banene ba Ngai baabanga kûûraga Racaarû wana we,

¹¹ n'ûntû kûriûkua gwake i gwatûmire antû baingî baregana na bo, beetîgia Yiesû.

Yiesû aakinya Njerusaremu akeneereetwe mûno

¹² Rûûni rwa ntugû înu kîrîndî kiingî kîra kîayîîte kîathooni gîa *Pasaka gîkwîgua Yiesû naayîîte Njerusaremu,

¹³ gîakamata nkîndû kîathi kûmûthagaana gîkiugagîîria na inya gîkauga, “Ocana! N'ûmûthaarime ûra aayîîte kwa riîtwa rîa Mwathani! N'ûmûthaarime ûra akaathana Isiraeri!”

¹⁴ Yiesû oona kayaû ka îng'ooi kamûkamata, wata bûra *Maandîko Maatheru maugîîte,

¹⁵ “Bûtikaamake, antû ba Cayûni! Cûûbaani bwone mûnene wenu aayîîte, akamatîîtwe i kayaû ka îng'ooi.”

¹⁶ Tika arutwa ba Yiesû baamenyaga gîtûmi kîa mantû mamu. Nyumaani Yiesû akûriûka, i rîo baaririkanire mantû mamu maatuîkîkire kîrî we i maandîke Maandîkooni Maatheru. Na i rîo baaririkanire atî, na mara aarûthîîrwe naarî akaarûthîrwa mo.

¹⁷ Kîrîndî kîra kîarî oogo Yiesû agîîta Racaarû auma nthikooni amûriûkia kîathiire gîkiugaga mantû ma kûriûkua gwake.

¹⁸ Na kîama gîku antû beegîîtue Yiesû naaringîîte, i kîo gîatûmîîte kîrîndî kîmûthagaana.

¹⁹ *Abarisai bakwona ûgu beerana, “Ûtikwona gûtirî bu twîteethia na bu aaga! Ene gûtirî muntû atakûmûthingata!”

Yiesû akîgweta mantû ma gûkua gwake

²⁰ Kîrî antû bara baayîîte Njerusaremu kûromba Ngai îgiitaani rîru rîa kîatho gîku, ikwarî na Angiriki.

²¹ Baathi boona Piripû bamwîra, “Itûkwenda kwona Yiesû, aba.”

²² Piripû aathi eera Enderea, baathi beera Yiesû.

²³ Yiesû auga, “Îîndî kagiita i gaakinyu ka mwago wa Mwana wa Muntû kwonwa!

²⁴ Na mma ga nkûbwîra, mpîndî ya ngano îtiumana îtagwîte nthîgûrû îkara taka yakua. Yakua i rîo yumanaga.

²⁵ Ûra eendeete gûtûûra akî eekenia na mwoyo wa kîînthîgûrû agaata mwoyo wake. Îndî ûra ateendeete gûtûûra akî eekenia na mwoyo wa kîînthîgûrû, mwoyo wake ûgaatûûra tene na tene.

²⁶ Muntû wonthe ûra akwenda kûndutîra ngûgî nwa mwanka aanthingate, kaingo ara ûkeegua ndî, wîgua mûruti ngûgî wakwa arî amwe naani. Na muntû wonthe ûra akaandutîra ngûgî, Baaba akamwaa gîtîîyo.”

²⁷ Yiesû auga, “Inkwîgua ngîtangîka mûno nkorooni yakwa, îndî mbuge ata? Mbuge, ‘Baaba nduta kînyamaaraani gîkî kîîyîîte kagiitaani gaka’? Îndî na rîo gîkî i kîo gîtûmi kîra gîatûmire mbûya nthîgûrû. Ndaayire n'ûntû bwa kagiita gaka.

²⁸ Baaba tûma riîtwa rîaku rîkumue!” Yiesû akuuga ûgu kayû kauma îgûrû, kauga, “Intûmîîte rîkumua na ngaatûma rîkumua kaîrî.”

²⁹ Kîrîndî kîra kîarî agu gîkwîgua kayû gaku, bamwe bauga beegua ta nkwa yaaria. Bangî na bo bauga, “I mûraîka aaria n'we.”

³⁰ Yiesû eera antû, “Kayû gaku gatiraaria kaanguna, kaaria kabûguna.

³¹ Îîndî i kagiita ga kîrîndî kîa nthîgûrû kûgiitîrwa îgamba. Ûra aathanaga nthîgûrû nakeengatua.

³² Naani rîra ngeetithua îgûrû mbume nthîgûrû, ngaakuuyia antû bonthe batuîke baakwa.”

³³ Yiesû augire ûgu kwonania gîkuû kîra aarî agaakua.

³⁴ Kîrîndî kîamwîra, “Twiyî kuuma mabukuuni meetû ma *watho atî Kîrîstû akaaya akare tene na tene. Aabu n'ata ûkuuganga Mwana wa Muntû nwa mwanka eetithue îgûrû aume nthîgûrû? Ka Mwana ûyû wa Muntû arî ûû?”

³⁵ Yiesû abeera, “Gatigeere kagiita gaakai ka werû kwîgua bûrî amwe naabi. Îthiini rîra werû bûrî naabi, kaingo mwindu ûtabûkîria inya. Ûra athiyagîra mwinduuni atimenyaga ara atarîîte.

³⁶ Kwoogu, îîndî werû bûrî amwe naabi, bwîtîgieni kaingo bûtuîka antû ba werû.” Yiesû akûrîîkia kuuga ûgu, aathi eebitha ara antû batakîmwona.

Ayaundi bara baingî baarega gwîtîgia Yiesû

³⁷ Waamwe na kwîgua Yiesû naaringire biama ta bibu bakîonaga, baingî batamwîtîgia.

³⁸ Na gwakarire ûgu kaingo ûroria bwa kîroria Isaaya bûûyûra, rîra augire, “Mwathani, n'ûû eetîgîîtie ntûmwa îra twabeerire? I kîrî ûû Mwathani oonanîîtie inya yake?”

³⁹ Kaîrî kîra kîgirîîtie beetîgia, i kwîgua kîroria Isaaya augîîte,

⁴⁰ “Ngai nabaingîîte meetho, abaûmia biongo, kaingo bataûmba kwona, kana baciûra. Ûkeegua t'ûgu baagarûka kîrî niû, nkabooria.”

⁴¹ Isaaya augire ûgu n'ûntû nooneete bûra Yiesû aarî agaakumua bûgana, aaroria.

⁴² Îndî amwe na ûgu, wana atongoria ba Ayaundi baingî ibeetîganiirie na Yiesû. Îndî batikiuga antû bakîîgagua n'ûntû ibaakuthûkaga *Abarisai baaya kûbeera batigaakinye *sinagoogiini.

⁴³ Beendire gûkenia antû bantû a gûkenia Ngai.

Mîgambo ya Yiesû îgaatûmîka kûgiitîra antû îgamba

⁴⁴ Yiesû auga na inya, “Muntû ûra ambîtîgagia, ti niû ninka eetîgîtie, îndî neetîgîîtie kinya ûra aantûmire.

⁴⁵ Ûra ambonaga noonaga ûra aantûmire.

⁴⁶ Mbûyîîte nthîgûrû ndî werû, kaingo bonthe bara bakaambîtîgia batakara mwinduuni.

⁴⁷ “Ûra eegagua mîgambo yakwa na atamîathîkîre, ntikûmûgiitîra îgamba, n'ûntû ntaaya kûgiitîra antû îgamba. Ndaayire kûboonokia.

⁴⁸ Muntû ûra andegaga akaregana na mîgambo yakwa, arî na ûra akaamûgiitîra îgamba. Na mîgambo îra mbaragia n'yo îgaatûmîka ntugû ya mûthia kûmûgiitîra îgamba.

⁴⁹ Ntiaragia na bwakwa. Mbaragia mara Baaba ûra aantûmire aambîîraga.

⁵⁰ Na imbiyî mara aambîîraga mbuge imoonagîra muntû mwoyo wa tene na tene. Kwoogu bunthe bûra mbugaga, mbugaga bûra bungwa Baaba aambîîrîîte mbuge.”