NGÛGÎ 22 - Kîrîîkanîro Kîîyerû

¹ “Aruayia na babaaba, nthikîîriani ndîtheteere bûkîîgagua!”

² Antû bakwîgua akîaria rwaria rwao baakira ki. Paûrû aathi mbere na kwaria. Abeera,

³ “Ndî Mûyaundi. Nciarîrîtwe Taarisas gîteere gîa Sirîsia, îndî nkûrîrîte taûni îno. Mwarimû wakwa aarî Gamarieri, na aanthoomithiirie bwega mûno kûthingata watho bûra biûyûûyû bietû beerwe. Na ndarî wîru mûno mantûûni ma Ngai ta bûra bwinthe bûrî na bu.

⁴ Indanyamaaragia athingati ba Yiesû nkîûragithagia bamwe, nkîgwatithagia bara bangî nkabathaîkithia nceera, bonthe aka na arûme.

⁵ Mûthînjîri ûra mûnene wa Ngai na kîama kîa Ayaundi kîonthe nwa gîkûûyîre gîkabwîra n'ûmma ûgu i bu ndarûthaga. I bo bampeere baarûa ira baandîkîrîte Ayaundi ba Ndamasiki, bampa rûûtha rwa kûthi noogo ngwata athingati ba Yiesû nkîbathaîkaga mbareeta Njerusaremu beewa îkaanûkia.

⁶ “Ta thaa thiita nthiîte, ndî akubî gûkinya Ndamasiki, nthûti îmwe werû bûûnene mûno bwanthararîra nteere cionthe.

⁷ Ndagwa nthîgûrû! Ndeegua kayû kambîîra, ‘Saûrû, Saûrû, i kî n'ûntû ûkûnnyamaaria?’

⁸ “Ndaûria, ‘I woû ûû, mûnene?’ “Ancookeria aambîîra, ‘I niû Yiesû wa Nasareethi ûra ûkûnyamaaria.’

⁹ Bara twathiyanîîtie na bo iboonire werû bûbu, îndî bataamenya kayû ka ûra aaragia.

¹⁰ “Ndaûria, ‘N'ata ûkwenda ndûtha, Mwathani?’ “Mwathani aambîîra, ‘Ûkîîra ûthi Ndamasiki. Wakinya ûkeerwa monthe mara ûthuurîîtwe ûrûtha.’

¹¹ Bara twathiyanîîtie na bo bangwata njara bambira Ndamasiki n'ûntû werû bûbu ibwarî na inya mûno, bwanta meetho.

¹² “Ndamasiki ikwarî na muntû eetagwa Anania. Aarombaga Ngai kûringana na watho na Ayaundi ba naagu bonthe ibaamûtîîyîîte.

¹³ Aaya aarûngama waagu akubî naani. Aambîîra, ‘Mûruayia Saûrû, tua kwona kaîrî!’ Warîo ndatua kwona.

¹⁴ “Aambîîra, ‘Ngai wa biûyûûyû bietû akûthuurîîte ûmenya bûra eendaga kûrûthwa, woona ûra Mwagîru na wîgua akîaria naawe.

¹⁵ Ûgaakûûyîîra mara woneete na mara wîgîîtue.

¹⁶ Kwoogu i mbi îngî weteereete? Ûkîîra ûbaatithue na ûthambue meeyia maaku riîtwaani rîake.’

¹⁷ “Ngûcooka Njerusaremu, nkîromba ndî nyomba ya Ngai ndoonua kîoneki.

¹⁸ Ndoona Mwathani akîaria naani akîmbîîraga, ‘Uma Njerusaremu na mpwî n'ûntû antû batiîtîgia ûkûûyî bwaku îgûrû rîakwa.’

¹⁹ “Ndamwîra, ‘Mwathani, antû baba ibakûmenya bwega ndarathiyaga kuuma *sinagoogiini kûthi îra îngî nkîthaîkithagia nceera bara bagwîtîgîîtie na nkîbaturaga.

²⁰ Na kinya mûkûûyî waku Stibini akîûragwa noogo ndarî ndûngi nkîonanagia inkûgwatanîra na ûntû bûbu, nkarîîtie nguo cia bara baamûûragaga.’

²¹ “Mwathani n'we aambîîra, ‘Ngagûtûma ûthi gûntû kûraaya mûno kîrî antû batarî Ayaundi.’ ”

Paûrû airwa kambîîni

²² Antû ibaathikîîrîîtie Paûrû, îndî akuuga ûgu baanjîîria kûringa gîtuma bakiugaga, “Nathirue! Atibuîrîîte kwîgua arî mwoyo!”

²³ Baaringaga gîtuma bakîyiûragia tûbuuti twao ruuoni, bakiuragia tîîri bakîmincaga îgûrû.

²⁴ Mûnene wa acikaarî auga Paûrû airwe kambîîni aringwe ibooko aumbûre kîra gîatûmaga antû bamûringîra gîtuma.

²⁵ Bakîmûthaîka njara kaingo bamûringa ibooko, Paûrû aûria mûrûngamîîri ûmwe wa acikaarî aarûngi agu akubî n'we, “Watho ibwîtîgîîrîîtie Mûrooma aringwa ibooko atakûrî kûgiitîrwa îgamba?”

²⁶ Mûrûngamîîri ûyu akwîgua ûgu, aathi kîrî mûnene amûûria, “N'ata ûkûrûtha? Muntû ûyû i Mûrooma!”

²⁷ Mûnene ûyu aathi kîrî Paûrû. Amûûria, “Ingûkûûria, ûrî Mûrooma?” Paûrû amûcookeria amwîra, “Yîî.”

²⁸ Mûnene auga, “Ndaarîire mbia nyingî mûno kaingo ntuîka Mûrooma.” Paûrû auga, “Niû ndî Mûrooma gûciarwa.”

²⁹ Acikaarî bara baathiîte kûringa Paûrû ibooko bakwîgua ûgu baacooka nyuma warîru. Mûnene aamaka athaikithîîtie Paûrû na arî Mûrooma.

Paûrû airwa kîrî kîama

³⁰ Rûûni mûnene neendaga kûmenya gîtûmi kîa Ayaundi kûthitanga Paûrû. Kwoogu auga Paûrû atharue. Aaruta watho auga *athînjîri bara banene ba Ngai na kîama kîonthe barîîkane. Rîru auga Paûrû aareetwa, aarûngamua mbere yao bonthe.