NGÛGÎ 15 - Kîrîîkanîro Kîîyerû

Gûturania mbaara n'ûntû bwa rûtaano

¹ Antû bamwe bauma Njundea baaya Antiokia, baarutana eetîgîri babeera, “Bûtionokua bûtarî bataane kûringana na wîthîre bûra Musa aarutanire.”

² Paûrû na Baranaba baaturania mbaara mûno na bo. Eetîgîri ba kanica ya Antiokia baagwatanîra bauga Paûrû na Baranaba, na bamwe ba eetîgîri bathi bakoone atûmwa na akûrû Njerusaremu baarîîrie ûntû bûbu.

³ Bagûtûmwa i kanica, baathi baagendeera Boinîcia na Samaria bakîîraga eetîgîri bûra antû batarî Ayaundi baagarûkîîte baatuîka antû ba Ngai. Ûntû bûbu bwakenia eetîgîri bonthe.

⁴ Bagûkinya Njerusaremu, baagwatwa ûgeni i kanica, atûmwa, na akûrû. Babeera mantû mara Ngai aarûthîîte gûkûrûkîîra kîrî bo.

⁵ Îndî eetîgîri bamwe ba gîkundi kîa *Abarisai baarûngama bauga, “Nwa mwanka bara batarî Ayaundi bataanagwe na barutanwe kwathîkîra watho bwa Musa.”

⁶ Atûmwa na akûrû baatua mûceemanio wa kwarîîria ûntû bûbu.

⁷ Bakwarîîria ûntû bûbu mûno, Petûrû aarûngama auga, “Aruayia, biû bwingwa ibwiyî atî, îgiita rîthiru Ngai aanthuurire kuuma kîrî biû ntûmîîria ntheto îmbega kîrî bara batarî Ayaundi, kaingo beegua, beetîgia.

⁸ Na Ngai ûra aiyî mathûgaania ma antû, noonaniirie nabeetîgagîra rîra aabeere Kîrundu Ûmûtheru ta bûra na tiû aatwere we.

⁹ Oonaniirie gûtirî mûkûûrani wetû na bo. Wana bo abatheria nkoro ciao n'ûntû bwa wîtîgio.

¹⁰ Aabu i kî n'ûntû bûkûgeria Ngai bûkîendaga gwaîkia eetîgîri mûrigo ûtakamatîka? Mûrigo biûyûûyû bietû biaremirwe n'uu na tiû beene!

¹¹ Twîtîgîîtie twonokagua kûringana na ûtugi bwa Mwathani Yiesû. Na wana bo i bu kûrî.”

¹² Paûrû na Baranaba babeera mantû mara Ngai aarûthîîte kîrî antû batarî Ayaundi gûkûrûkîîra kîrî bo. Babeera biama bira aaringire na magegania mara oonaniirie.

Rwaria rwa Njakubu

¹³ Paûrû na Baranaba bakûrîîkia kwaria, Njakubu aarûngama auga, “Aruayia, nthikîîriani.

¹⁴ Simioni akûrîîkia gûtwîra bûra îgiita rîa mbere Ngai eetire bamwe ba bara batarî Ayaundi kaingo batuîka antû baake.

¹⁵ Na ûntû bûbu ibûkûgwatanîra na mîgambo ya iroria, wata bûra kwandîkîîtwe,

¹⁶ ‘Nyuma ya mantû mama ngaacooka nneneithie mûciî wa Ndaundi ûra waraganîîte. Ngacuaka kaîrî ûthire wombokanu. Nkaurikia kaîrî.

¹⁷ I kaingo antû ba mîgongo îra îngî bacûa Mwathani bara bonthe mbîtîîte batarî Ayaundi batuîka baakwa. Ûgu i bu Mwathani augîîte, ûra atûmîîte mantû mamu matuîkîka

¹⁸ amamenyithania kuuma wo tene.’ ”

¹⁹ Njakubu aathi na mbere abeera, “Kwoogu bûra nkwona niû, tûtikaûmîrieni mantû bara bagarûkîrîte Ngai batarî Ayaundi.

²⁰ Îndî tûbaandîkîreeni baarûa tûbeere batikaarîe irio bia kûrutîra ngai cia ûrongo. Na kaîrî tûbeere batikaarute ngûgî cia ûmaramari. Batikaarîe nyama cia nyamû îrîmbite, kana barîa nyama irî na nthakame.

²¹ N'ûntû kwa îgiita rîîraaya mûno, watho bwa Musa ibûthoometwe na bwarutanwa *masinagoogiini ma wakîra taûni, ntugû ya *Sabatû.”

Baarûa kîrî eetîgîri bara bataarî Ayaundi

²² Atûmwa, akûrû, na kanica yonthe boona i kaaba bakathuura bamwe baciao, babatûme bathiyanie na Paûrû na Baranaba Antiokia. Baathuura antû baarî îgweta kanicaani. Baarî Njundas ûra kaîrî eetagwa Baasabas na Sairas.

²³ Baarûa îra baarî baire yaugaga ûûgû: Kîrî biû aruayia bûtarî Ayaundi, biû bûtûîre Antiokia, Sîîria na Sirîsia. Bara tûkûbwandîkîra, i tiû atûmwa, akûrû, na eetîgîri bara tûrî naaga Njerusaremu. Muugaani.

²⁴ Tûreegiirue antû baraumire naaga baaya babûreetera thîîna, babûtanga meeciiria na mîgambo îra barabwîrire. Ti tiû tûrabatûmîîte.

²⁵ Tûrakomanire twona i kaaba tûtûme antû kîrî biû, baayanie na eendwa Baranaba na Paûrû.

²⁶ Batimakagîra mîoyo yao n'ûntû bwa Mwathani wetû Yiesû Kîrîstû.

²⁷ Kwoogu twatûma Njundas na Sairas. Bakabwîra na kanyua mantû wamama tûbwandîkîrîte.

²⁸ Kîrundu Ûmûtheru aroonire ti bwega, na wana tiû nwa bu tûroonire atî, tûtikaabwaîkie mûrigo ûngî tatiga mantû mama ma gîtûmi mûno.

²⁹ Na mo n'atî, bûtikaarîe irio bia kûrutîra ngai cia ûrongo. Bûtikaarîe nyama irî na nthakame, kana bûrîa nyama cia nyamû îrî îmbite. Na bûtikaarute ngûgî cia ûmaramari. Weegua bûrûthîîte ûntû bwega waya kwîgua bûkaathingata mantû mamu twabwîra. Tigwaani bwega.

³⁰ Babu baatûmîîtwe baakinya Antiokia. Beethîrania eetîgîri bonthe, babanenkera baarûa.

³¹ Eetîgîri bakûthooma baarûa înu beegua îkîbeekîra wîru, baakena mûno.

³² Njundas na Sairas bara baarî iroria babaarîria kwa îgiita rîraaya. Babeekîra wîru na baarikithia wîtîgio bwao.

³³ Bagûkarakaranga eetîgîri babu ba Antiokia babarekeeria na ûkiri, baacooka kîrî bara baabatûmîîte.

³⁵ Paûrû na Baranaba bo baatigwa Antiokia, baakarakaranga noogo baarutana kiugo kîa Mwathani na baatûmîîria ntheto îmbega barî na antû bangî baingî.

Paûrû na Baranaba baathûkana

³⁶ Nyuma ya kagiita kagana ûna, Paûrû eera Baranaba, “Tûcooke taûni ira cionthe twatûmîîrie kiugo kîa Mwathani, tûriûngîre eetîgîri tûmenye bûra bathiîte na mbere.”

³⁷ Baranaba neendaga bathi na Njoana Maariko

³⁸ îndî Paûrû atoonaga bûrî bwega bathiîte n'we n'ûntû aabatigîîte Pamburia, aarega kûthi kûbateethia ngûgîîni.

³⁹ Paûrû na Baranaba baakararania mûno, baathûkana. Baranaba aathûkia Njoana Maariko baatwa meeri baathi Kupooro.

⁴⁰ Paûrû aathuura Sairas bathiyanagia n'we. Mbere ya bathi, eetîgîri babanenkanîra ûtugiini bwa Mwathani.

⁴¹ Paûrû baathi baagendeera Sîîria na Sirîsia bagîîkagîra makanica inya.