MAARIKO 4 - Kîrîîkanîro Kîîyerû

Ngerekano ya mwandi wa mbeû

¹ Ntugû îngî Yiesû naarutanaga antû kaîrî. Ikwarî na antû baingî agu rûteere rwa îria, bara baayîîte kûmûthikîîria. N'ûntû bwa antû kwingîa, Yiesû aakari nthî îtarûûni waagu rûûyîîni, kîrîndî na kîo gîakari rûteere rwa îria.

² Yiesû aarutana mantû maingî agîtûmagîra ngerekano. Eera antû,

³ “Thikîîriani. Mwandi naathiire kwanda mbeû ntugû îmwe.

⁴ Wabûra aamincaga mbeû yake mûndaani, kûrî mpîndî imwe ciagûîre njîraani, nyoni ciaya cioya.

⁵ Ingî na cio ciagwa njaraani cia maiga kûra gûtaarî na mûthetu wa kûgana. Inu itaakarakaranga itirauma n'ûntû itaarî inthike.

⁶ Mwathû ûkwara ciarûngûra ciaûmagara n'ûntû iteebînjîrîte bwega.

⁷ Kûrî ingî ciagwîre bantû kwarî na matî ma mîîgua. Ikuuma, matî mamu ma mîîgua maakûrania na cio maciinyîka ciaremwa gûciara.

⁸ Îndî kûrî ira cio ciagwîre mûthetuuni ûmûnoru, ciauma ciakûra bwega, ciaciarana. Imwe cia cio ciaumana maita mîrongo îthatû, ira ingî maita mîrongo îthanthatû, na ingî maita îgana.”

⁹ Yiesû eera antû, “Ûra arî na matû neegue.”

Gîtûmi kîa Yiesû gûtûmîra ngerekano

¹⁰ Kagiita kamwe barî bonka, arutwa bara ba Yiesû îkûmi na baîrî na bamwe ba bara baathikîîrîîtie Yiesû, bamûûria abeere gîtûmi gîa gûtûmîra ngerekano akîrutana.

¹¹ Yiesû abeera, “Biû ibwetwe ûûme bwa kûmenya witho bwa ûnene bwa Ngai. Îndî kîrîndî kîra kîngî kîo nwanga ngakîîra mantû monthe na ngerekano,

¹² kaingo ‘Gûcûûba bagaacûûbaga, îndî bationa. Kwîgua bakeegagua bathikîîrîîtie, îndî baticiûkîrwa. Ûkeegua t'ûgu baagarûka kîrî Ngai akabarekera.’ ”

Yiesû aataûra ngerekano ya mwandi wa mbeû

¹³ Yiesû abaûria, “Ûkeegua bûtigûciûra ngerekano îno rî, n'ata bûkaamenya îngî bwerwa?

¹⁴ “Mwandi wa mbeû, i muugi wa kiugo kîa Ngai.

¹⁵ Mbeû îra yagwîre njîraani, i ngerekano ya antû bara beegagua kiugo, îndî Saitaani akaaya warîo akabûria kîra gîkûrî kîande ndeni yao.

¹⁶ Mbeû îra yagwîre njaraani cia maiga, i ngerekano ya antû bara beegagua kiugo kîa Ngai bagagîîtîgîîria warîo bakeneete,

¹⁷ îndî ûtiîgagua barikîîtie wîtîgio bwega. Beetîgagia kagiita gaakai. Boona thîîna kana baatua kûnyamaarua n'ûntû bwa gwîtîgia kiugo bacookaga waara akûrû nthûti îmwe.

¹⁸ Mbeû îra yagwîre bantû kwarî na mbeû ya matî ma mîîgua, i ngerekano ya antû bara beegagua kiugo kîa Ngai,

¹⁹ îndî n'ûntû bwa kwîmakîra ûtûûrooni bûbû bwa nthîgûrû, kwenda ûtonga na mawîrirîîria mangî ta mamu makabathûngîra makainya kiugo kîra kîrî ndeni yao gîkathaata.

²⁰ Mbeû îra yagwîre mûthetuuni ûmwega, i ngerekano ya antû bara beegagua kiugo kîa Ngai bagagîîtîgîîria bakoonania maciaro ma kîo, bamwe mîrongo îthatû, bangî mîrongo îthanthatû na na bangî îgana.”

Werû bwa kiugo kîa Ngai

²¹ Yiesû abaûria, “Anga kûrî muntû areeta taa îndî akamîkunîkîra kana akamiiga rungu rwa ûrîrî? Îndiuga ka amîtûûgagîîria bantû aûkîîru kaingo îmûrîkîra antû?

²² Gîntû kîonthe kîra kiithe igîkaumbûrwa. Witho bunthe bûkaamenyekana.

²³ Ûra arî na matû neegue.”

²⁴ Yiesû kaîrî abeera, “Îmenyagîîreeni mûno kuumania na mara bûkeegagua. Bûra ûthûkagia bara bangî i bu wana woû ûkaathûkua, na nkûrûki.

²⁵ Ûra arî na gîntû akoongeerwa. Îndî ûra we gûtarî kîo arî na kîo, wana kaniini kara arî na ko nagaatunywa.”

Ngerekano ya gûkûra kwa mbeû

²⁶ Yiesû aacooka eera antû, “Ûnene bwa Ngai bûkari ta bûra muntû athiyaga akaanda mbeû mûthetuuni.

²⁷ Wakîra ntugû gwatuga akamaama, gwakea agaûka, mbeû îkauma îgakûra îndî tika aiyî bûra îkûrangaga.

²⁸ Mûthetu ûrî uu ungwa n'uu ûkûragia kîmera. Mbere kîmera kîambaga kûgîa mûûgwa, rîru gîgakerûra, rîru gîkagîa mpîndî.

²⁹ Irio biaûma mûkethi athûkagia kayiû akathi mûndaani gûketha n'ûntû wîgagua karî kagiita ka maketha.”

Ngerekano ya gapîndî ka mûtî

³⁰ Yiesû abaûria, “I mbi yo mma tûûmba kûbuanaania n'yo ûnene bwa Ngai? Kana i ngerekano îkari ata tûûmba gûtûmîra?

³¹ Bûkari ta gapîndî ka mûtî kara kaniini kîrî mpîndî cionthe, karî kaande mûthetuuni.

³² Gapîndî gaku kaumaga gagatuîka mûtî ûrî na mpong'i inene, nyoni igaaka ntara gûku mûgunyeeni wa mpong'i inu.”

Kîra gîatûmaga Yiesû atûmîra ngerekano

³³ Yiesû akîrutana kiugo naatûmagîra ngerekano inyingî ta inu kûringana na bûra antû baûmbaga kûmûthikîîria bûgana.

³⁴ Yiesû atikîrutana antû atagûtûmîra ngerekano. Îndî rîra arî na arutwa baake bonka naabaumbûragîra mantû.

Yiesû aakiria kîbuubani îriani

³⁵ Ûgorooni bwa ntugû înu, Yiesû eera arutwa baake, “Tûringeeni tûthi rûgongo rûra rûngî rwa îria.”

³⁶ Arutwa baatwa gatarûûni kara Yiesû aakari, baathi baatiga kîrîndî. Na gûku rûûyîîni weegua ikwarî na matarû mangî kinya mo mathiîte wata bo.

³⁷ Kwagîa kîbuubani kîînene gûku îriani makûmbî ma rûûyî maakûmba îtarû, rûûyî rwanjîîria kûgîa ndeni.

³⁸ Yiesû aarî nyuma ya îtarû amaami aigîîrîîte kîongo gîake bantû aûkîîru. Arutwa baake bamûûkia bakîmûûragia, “Mwarimû, nûtakwona ta ûntû na itûkûthira?”

³⁹ Yiesû aûkîîra. Aagondokera kîbuubani akîîra, “Tiga!” Makûmbî na mo ameera, “Kirîîriani!” Kîbuubani kîathira, rûûyî rwakirîîria.

⁴⁰ Yiesû aûria arutwa baake, “I mbi îkûbûmakagia? Bûrî kû wîtîgio bwenu?”

⁴¹ Baamaka mûno. Baûrania, “Ika muntû ûyû arî ûû n'ûntû wana ruuo, wana rûûyî, ibikûmwathîkîra!”