MAARIKO 15 - Kîrîîkanîro Kîîyerû

Yiesû airwa kîrî Piraatû

¹ Rûûni rûkîîrî mûno, *athînjîri bara banene ba Ngai, akûrû, aarimû ba watho, na kîama kîonthe baabanga bûra bakaûragangithia Yiesû. Bamûthaîka njara bamwirîra Piraatû ûra aarî ngabana.

² Bagûkinya, Piraatû aûria Yiesû, “I woû mûnene wa Ayaundi?” Yiesû amwîra, “Nwa ta ûgu wauga.”

³ Athînjîri bara banene ba Ngai baatuîrîîra Yiesû mantû maingî.

⁴ Piraatû eera Yiesû, “Ûteetheteere na nûkwîgua bûra mantû maingîîte bûgana mara bakuuga nûrûthîîte?”

⁵ Îndî wana rîo gûtirî bu Yiesû auga. Piraatû aarigara mûno.

Yiesû aatuîrwa kûûragwa

⁶ Wakîra mwanka kagiita ga kîatho gîa *Pasaka gaakinya, bwarî wîthîre bwa ngabana kûrekia mûgwate ûmwe ûra antû beendaga.

⁷ Kagiita gaku ikwarî na mûgwate nceera eetagwa Baraba. Baraba ûyu aarî mûregi watho na aathaîkîîtwe n'ûntû bwa kûûraga muntû kûrî na mûgomo.

⁸ Kîrîndî kîathi kîrî Piraatû kîanjîîria kûmûûria arekia mûgwate ûmwe wata wîthîre.

⁹ Piraatû abaûria, “Ibûkwenda ndekia Mûnene wa Ayaundi?”

¹⁰ Piraatû naiyî *athînjîri bara banene ba Ngai baareeteete Yiesû kîrî we n'ûntû bwa bûra baamwîgagua rûriitho.

¹¹ Athînjîri babu banene ba Ngai ibaarî bakwîra antû, na antû beetîgîîria kwîra Piraatû arekie Baraba.

¹² Piraatû aûria antû kaîrî, “Aabu n'ata bûkwenda ndûtha na muntû ûyû bûgwîta Mûnene wa Ayaundi?”

¹³ Kîrîndî kîaugîîria na inya kîamwîra, “Mwambe!”

¹⁴ Piraatû abaûria, “I kî? I mabîtia marîkû arûthîîte?” Amwe na ûgu, kîrîndî gîaûkîîria kayû na inya nkûrûki, kîera Piraatû, “Mwambe!”

¹⁵ Na n'ûntû Piraatû neendaga kûbaingîria bûra beendaga, auga Baraba arekue. Aaruta watho auga Yiesû aringwe ibooko. Rîru amûnenkanîra kîrî acikaarî athi kwambwa.

Acikaarî baanyûrûnta Yiesû

¹⁶ Acikaarî babu baira Yiesû nyomba îra magamba maagiitagîrwa gûku kambîîni ya ngabana. Nyomba înu yeetagwa Puritoria. Bakûmwira ku beeta mbûûtû ya acikaarî bara bangî bonthe.

¹⁷ Beekîra Yiesû nguo îndaaya ya rangi ya ûkûyû. Baatumania matî ma mîîgua maakara ta nthûmbî ya ûnene bamwîkîra mo.

¹⁸ Bakûrûtha ûgu, baacooka baatua kûmwîra, “N'ata îîndî, Mûnene wa Ayaundi!”

¹⁹ Acikaarî babu baacooka baakûng'anga Yiesû kîongo na kamûraagi bakîmûtuuyagîra mata. Bamûturîria maru bakîmûthekeera bakîîrûthaga taka bakûmûgonga.

²⁰ Bakûrîîkia kûrûtha ûgu, acikaarî babu bamûruta nguo înu yarî îndaaya. Bamwîkîra nguo ciake ciongwa kaîrî, rîru baathi kûmwamba.

Yiesû aambwa

²¹ Bathiîte, baarîîkana na muntû eetagwa Simioni, wa kuuma gûntû gweetagwa Kureni. Simioni ûyu aarî îthe wa Aregisanda na Rubas. Kagiita gaku naumîîte mûndaani. Acikaarî baakamatithia Simioni mûtharaba wa Yiesû na taka.

²² Baira Yiesû bantû eetagwa Gorogotha. Gorogotha i ta kuuga, ‘Kîîndî gîa kîongo.’

²³ Bagûkinya, baageria gûkundia Yiesû ndibei yaunganîîtue na manemane. Yiesû aarega.

²⁴ Acikaarî babu baamba Yiesû mûtharabaani. Baacooka baaringîra nguo ciake kuura, muntû aathûkia îra aacindaga.

²⁵ Rîru baamwambire kwarî thaa ithatû cia rûkîîrî.

²⁶ Acikaarî bakûmwamba, baacooka agu îgûrû rîa kîongo giake mûtharabaani baaringaringîra kabaaû ga kwonania kîra Yiesû aathitangîrîtwe. Kabaaû gaku kaandîkîîtwe, “mûnene wa ayaundi.”

²⁷ Baacooka baamba atunyani baîrî agu akubî n'we. Ûmwe aarî rûteere rwake rwa ûrîo, na ûyu ûngî rûteere rwake rwa ûmotho. [

²⁸ *Maandîko Maatheru maingîka, mara maugîîte, “Aathûkiirue bûmwe na auni watho.”]

²⁹ Bara baakûrûkagîîra agu Yiesû aambîîtwe bamûrumanga. Bainainagia biongo bakauga, “Ooo! Anga ûtiraugaga ûkoomborania Nyomba ya Ngai ûmîake kaîrî na ntugû ithatû!

³⁰ Teebambûre uume agu ûrî mûtharabaani, wîbonokie!”

³¹ Wana athînjîri bara banene ba Ngai na aarimû ba watho ibaamûthekagîîra. Beeranaga, “Aroonokagia antû, îndî atikûûmba kwîbonokia!

³² Ûkaaya kwîgua wabu n'we Kîrîstû, mûnene wa Isiraeri, îîndî neebambûre aume agu arî mûtharabaani, twone, tûmwîtîgie.” Atunyani babu baambîîtwe agu wana bo barumanga Yiesû.

Yiesû aakua

³³ Kwanjîîria mûthenya gatî, mwindu waruma mathaa mathatû nthîgûrû înu yonthe.

³⁴ Igûkinya thaa kenda, Yiesû aagondoka na inya. Auga, “Eloi, Eloi, lama cabakithani?” Kuuga ûgu i ta kuuga, “Ngai wakwa, Ngai wakwa, i kî n'ûntû wantiganîria?”

³⁵ Antû bamwe ba bara baarûngi agu bakwîgua Yiesû auga ûgu bauga, “Teeguani, n'Eriya agwîta!”

³⁶ Ûmwe wao augia rwîro aathi aathûkia cibonji amîtombeka ndibeini yarî na gana, amîogeera mûthiani wa kamûtî amîtiirithia mîromo ya Yiesû aciia. Auga, “Gatwoneeni ingî kana weegua Eriya akaaya amwambûre aume mûtharabaani ûyû aambîîtwe.”

³⁷ Yiesû aagondoka kaîrî, aanyaarûka.

³⁸ Gîtambaa kîra kîagaanîîtie nyomba ya Ngai gîatembûkana maita maîrî kîganeene kuuma îgûrû mwanka nthî.

³⁹ Mûtongoria wa njûûrî ya acikaarî aarûngi agu mbere rungu rwa mûtharaba wa Yiesû. Akwona bûra Yiesû aakuyangire auga, “Na mma muntû ûyû araarî Mwana wa Ngai.”

⁴⁰ Ikwarî na eekûrû beebûmbîîte gataaria bakîonaga bûra gwakarîkaga. Bamwe baao baarî Maria Mûmagindari, Saroome, na Maria gina wa Njakubu ûra mûniini na Njastas.

⁴¹ Eekûrû babu baumanîîtie na Yiesû Gariiri bakîmûmenyagîîra. Na ikwarî kinya na eekûrû bangî baingî baayanîîtie na Yiesû Njerusaremu.

Yiesû aathikwa

⁴² Ûgoro bûgûkinya ntugû înu ya kwîthuuranîra n'ûntû bwa *Sabatû,

⁴³ muntû ûmwe eetagwa Njosebu wa kuuma Arimathea aathi kîrî Piraatû aûmîrîîtie, aaroomba eetîgîîrue athûkie kiimba kîa Yiesû. Njosebu ûyu aarî ûmwe wa akîama ba kîama kîa Ayaundi, na aarî ûmwe wa bara beerîgîrîîte ûnene bwa Ngai bûkaaya.

⁴⁴ Piraatû aarigara akwîgua Yiesû naarî agûkua. Atoonaga taka ûkîûmba kwîgua Yiesû aarî agûkua na mpwî ûgu. Eeta ûmwe wa anene ba acikaarî ûra aakarîîtie Yiesû amûûria.

⁴⁵ Akwîrwa Yiesû naarî agûkua, eetîgîîria Njosebu athûkia kiimba.

⁴⁶ Njosebu aagûra cuka. Aambûra kiimba kîa Yiesû mûtharabaani. Akîoga na cuka înu aathi akiiga nthikooni yenjîîtwe rwaraani rwa iiga. Aingiritia iiga rîînene mûno aakunîkîra na rîo.

⁴⁷ Maria Mûmagindari na Maria gina wa Njastas boona kûra mwîrî wa Yiesû wathûngîîrue.