MAARIKO 10 - Kîrîîkanîro Kîîyerû

Gûcookia mûka

¹ Yiesû auma agu aathi bwa gîteere kîa Njudea. Aaringanîria rûgongo rûra rûngî rwa muuro wa Njorondani. Mûkondo wa antû waaya kîrî we kaîrî. Na wata wîthîre abarutana.

² *Abarisai bamwe baaya kîrî we. Bakîenda kûmûgeria beegua bûra akauga, bamwîra, “*Watho bwetû ibwîtîgîîrîîtie muntû acookia mûka?”

³ Yiesû abaûria, “Musa augîîte ata kûringana na watho?”

⁴ Abarisai babu bamwîra, “Musa neetîgîîrîtie muntû eenda gûcookia mûka aandîka baarûa ya kwonania akuumanwa n'we.”

⁵ Yiesû abeera, “Musa aandîkire yathana rîru n'ûntû bwa ûûmo bwa biongo bienu.

⁶ Îndî kuuma kîambîrîria rîra into bionthe biaûmbagwa, ‘Ngai aûmbire antû barî muntû mûrûme na mûka.

⁷ Na kwoogu muntû mûrûme aumaga kwa îthe na gina, akagwatana na mûka wake,

⁸ na barî baîrî bagatuîka mwîrî ûmwe.’ T'antû baîrî mwanya kaîrî, batuîkaga muntû ûmwe.

⁹ Kwoogu bara Ngai agwatithanîîtie gûtikaagîte muntû abaathûrana.”

¹⁰ Bagûcooka nyomba, arutwa baake bamûûria mantû mamu.

¹¹ Yiesû abeera, “Muntû ûra acookagia mûka wake akagûra ûngî neegagua akîthûngîîra na neeyagîria mûka ûyu.

¹² Na mûka ûra atigaga mûrûme wake akagûrwa i muntû ûngî, mûka ûyu neegagua akîthûngîîra.”

Yiesû aathaarima twana

¹³ Antû bamwe ibaareeteete twana kîrî Yiesû aturîîkîîra njara, atuthaarima. Îndî arutwa baake baanjîîria kûbakaania.

¹⁴ Yiesû ataakena akwona ûgu. Eera arutwa baake, “Rekanaani na twana tûûye kîrî niû. Bûtigaatûgirie n'ûntû ûnene bwa Ngai i bwa bara bakari ta twana tûtû.

¹⁵ Na mma ga nkûbwîra, ûra atakîthûkia ûnene bwa Ngai na wîtîgio ta bwa kaana kaniini atithûngîra ku.”

¹⁶ Yiesû aagwata twana tûtu aturîîkîîra njara atuthaarima.

Gîtonga kîaûria Yiesû bûra gîkîrûtha gîkathi mwoyooni

¹⁷ Kagiita kamwe Yiesû athiîte, muntû ûmwe aaya kîrî we na rwîro amûturîria maru amwîra, “Mwarimû ûmwega, n'ata ndûtha nkathi mwoyooni wa tene na tene?”

¹⁸ Yiesû aûria muntû ûyu, “I kî n'ûntû ûkûmbîta ûmwega? Gûtirî we mwega tatiga Ngai wenka.

¹⁹ Woû nwiyî maathana mara maugîîte, ‘Ûtikaûragane,’ ‘Ûtikaathûngîîre,’ ‘Ûtikaiye,’ ‘Ûtigaatuuyanîîre,’ ‘Ûtikaarongoe,’ na ‘Tîîyaga abaagu na nyûkwe.’ ”

²⁰ Muntû ûyu amwîra, “Mwarimû, ntûîre mbathîkagîra maathana mamu monthe kuuma ndî mwana.”

²¹ Yiesû amûcûûba kii, eegua amwenda. Amwîra, “N'ûntû bûmwe ûtigeerie ûtarûthîîte. Îthi wendie into bionthe bira ûrî na bio ûgaîre nkîa mbia ira bikauma, rîru ûûye ûnthingate. Ûkarûtha ûgu, ûkeegua ûrî na ûtonga îgûrû.”

²² Muntû ûyu akwîgua ûgu, aagarûka ûthiû. Aathi akîonanagia kîeba n'ûntû naarî na into biingî mûno.

²³ Yiesû aacûûba arutwa baake. Abeera, “N'ata kûrî inya bara barî into biingî kûthi ûneneeni bwa Ngai!”

²⁴ Arutwa bakwîgua ûgu baarigara. Yiesû kaîrî abeera, “Aana baakwa, n'ata kûrî inya bara beegwetie ûtonga kûthi ûneneeni bwa Ngai!

²⁵ I ûûthû nkamîîra gûkûrûkîîra karinyaani ga cindano kîrî gîtonga kûthi ûneneeni bwa Ngai.”

²⁶ Arutwa bakwîgua ûgu na bu baarigara nkûrûki. Baanjîîria kûûrania, “Anga kûrî we akoonokua?”

²⁷ Yiesû abacûûba. Abeera, “Kîrî muntû ûntû bûbû bûtiûmbîka. Îndî ti kîrî Ngai, n'ûntû gûtirî bu bûrema Ngai.”

²⁸ Petûrû amûûria, “Î tiû naati tûtigîîte bionthe twakûthingata rî, gûgaakara ata?”

²⁹ Yiesû abeera, “Na mma ga nkûbwîra, gûtirî muntû aumîîte mûciî, kana atigîîte aruagina kana aaragina, kana gina, kana îthe, kana twana, kana mînda n'ûntû bwakwa na bwa ntheto îmbega

³⁰ atakîewa bibu bionthe maita îgana. Akeewa nyomba, aruagina, aaragina, bagina, twana, na mînda kagiitaani gaka, amwe na kwîgua akaathîînua n'ûntû bwakwa na bwa ntheto îmbega. Na kagiita gakaaya akeewa mwoyo wa tene na tene.

³¹ Baingî ba bara barî mbere bagaatuîka ba mûthia, bara barî ba mûthia batuîke ba mbere.”

Yiesû akîaria rîa mathatû îgûrû rîa kûûragwa gwake

³² Yiesû na arutwa baake ibaathiîte Njerusaremu, Yiesû arî mbere. Arutwa bataamenyaga bûra gûgûkarîka. Na kinya antû bara baathingatîîte Yiesû ibaamakîîte. Yiesû eeta arutwa baake gataaria, aanjîîria kûbeera bûra kwathiîte gûkarîka kîrî we.

³³ Aabeerire, “Îîndî tûthiîte Njerusaremu, na Mwana wa Muntû agaakunyanîrwa anenkanîrwe kîrî *athînjîri bara banene ba Ngai. Aarimû ba watho bamûtuîre kûûragwa, bamûnenkanîre kîrî antû batarî Ayaundi

³⁴ bamûnyûrûnte bakîmûtuuyagîra mata, bamûringe ibooko, na bamûûrage. Îndî akaariûka ntugû ya ithatû.”

Bûra Njakubu na Njoana beendaga

³⁵ Aana baîrî ba Cabendi, Njakubu na Njoana, baathi kîrî Yiesû bamwîra, “Mwarimû, kûrî bu tûkwenda gûkûûria ûtûrûthîra.”

³⁶ Yiesû abaûria, “N'ata bûkwenda mbûrûthîra?”

³⁷ Bamwîra, “Tûrîenda wathi mwagooni ûtûîtîgîîrie ûmwe wetû akare rûteere rwaku rwa ûrîo, ûyû ûngî rwa ûmotho.”

³⁸ Yiesû abeera, “Biû bûtikûmenya kîra bûkûromba. Bûkaûmba kûnyua gîkombe kîra nkaanyua gîa kûnyamaarua na bûbaatithue ûbaatithio bûra nkaabaatithua bwa kûnyamaarua?”

³⁹ Bamûcookeria bamwîra, “Yîî, tûkaûmba.” Yiesû abeera, “Gîkombe kîra nkaanyua kîo bûkaanyua na ûbaatithio bûra nkaabaatithua bûkaabaatithua bu.

⁴⁰ Îndî ti niû mbagîrîtwe nthuura mbuga i ng'ania agaakara rûteere rwakwa rwa ûrîo kana rwa ûmotho. Naagu kûthuuranîrîtwe gûkarwa i bara Ngai ataarîîte.”

⁴¹ Arutwa bara bangî îkûmi bakwîgua bûra Njakubu na Njoana beendaga babathûûra.

⁴² Yiesû abeeta baayanga akubî n'we. Abeera, “Bara barî anene ba nthîgûrû beendaga kwonia antû i bo anene, atongoria ba nthîgûrû beekumagia kwonia antû i bo atongoria, wata bûra bwiyî.

⁴³ Îndî biû bûtibatîîrue bwîgua bûkari ûgu. Ûra wacienu akwenda gûtuîka mûnene natûmîkîre bara bangî.

⁴⁴ Ûra akwenda gûtuîka wa mbere natûmîkîre bonthe.

⁴⁵ N'ûntû wana Mwana wa Muntû ataaya gûtûmîkîrwa. Aayire gûtûmîkîra antû na kûruta mwoyo wake wonokia antû baingî.”

Yiesû ooria ntûngi yeetagwa Baritimayo

⁴⁶ Yiesû na arutwa baake baakinya Njeeriko. Baumîîte gûku Njeeriko na kîrîndî gîa antû kiingî, ikwarî na ntûngi yeetagwa Baritimayo wa Timayo. Yakari rûteere rwa njîra îkîrombaga antû ûteethio.

⁴⁷ Îkwîgua gûkîîrwa i Yiesû wa kuuma Nasareethi akûrûkîîte, yaanjîîria kûmwîta na inya îkiugaga, “Yiesû, Mwana wa mûciî wa Ndaundi, mbîgua kîao!”

⁴⁸ Antû baingî bamîkaania bamîîra îkire. Yaûkîîria kayû na inya nkûrûki, îkiugaga, “Yiesû, Mwana wa mûciî wa Ndaundi, mbîgua kîao!”

⁴⁹ Yiesû aarûngama. Auga, “Mwîteeni aaye aaga.” Antû beeta ntûngi înu bamîîra, “Ûkîîra ûkeneete, Yiesû nagûgwîta.”

⁵⁰ Ntûngi înu yagera kabuuti gaake naara. Yathûngûtha yarûngama na mpwî, yathi kîrî Yiesû.

⁵¹ Yiesû amîûria, “N'ata ûkwenda nkûrûthîra?” Ntûngi înu yamwîra, “Mwarimû, ga nkwenda ntua kwona.”

⁵² Yiesû amîîra, “Nookathi, wîtîgio bwaku bûgûtûma woora.” Nthûti weenu muntû ûyu aarî ntûngi aatua kwona, aathingata Yiesû na barabara.