AIBIRANIA 3 - Kîrîîkanîro Kîîyerû

Yiesû n'we mûnene kîrî Musa

¹ Kwoogu, aruayia na aarayia, biû bûrî ba Ngai ûra abwîtîîte. Erekeriani mathûgaania meenu kîrî Yiesû. Itwîtîgîîtie n'we aatûmirwe i Ngai atuîka mûthînjîri ûra mûnene wake.

² Aarî mwîtîgua kîrî Ngai ûra aamûthuurire ta bûra Musa aarî mwîtîgua ngûgîîni yake na antû ba nyomba ya Ngai.

³ Mwaki nyomba n'we eeyagwa gîtîîyo nkûrûki ya nyomba yo yongwa. Na kwoogu ûgu i ta bu Yiesû arî gîtîîyo kîînene mûno nkûrûki ya Musa.

⁴ Wakîra nyomba yaakagwa i mwaki mûna, îndî Ngai n'we mwaki wa bionthe.

⁵ Musa aarî mûruti ngûgî mwîtîgua, eetîgîîtue na antû ba nyomba ya Ngai bonthe. Kwîgua naarî mwîtîgua i ku kwarî ûkûûyî bwa kwonania mîgambo îra Ngai akaaria.

⁶ Îndî Kîrîstû i mwîtîgua ta Mwana, arî na watho îgûrû rîa antû ba nyomba ya Ngai. I tiû antû ba nyomba ya Ngai weegua tûkaathi na mbere kwîgua tûrî na ûcamba wîrîgîîrooni bwetû tûkeneete.

Îmenyeereeni bûtikaage wîtîgio

⁷ Kwoogu ta bûra Kîrundu Ûmûtheru augîîte, “Bweegua Ngai akîaria naabi îmunthî,

⁸ bûtikaûmie biongo ta biûyûûyû bienu. Baaregire mbatongoria barî rwanda, bangeria.

⁹ Baangeriirie na amwe na kwîgua ibooneete mantû mara ndarûthîîte mîanka mîrongo îna.

¹⁰ Nkwîgua banthûûria ndauga, ‘Mathûgaania ma antû baba rîonthe meegagua marî kûraaya naani. Baticiûkagîrwa bamenya bûra mbendaga barûtha.’

¹¹ Nkûthûûra ndathiîtia ndauga, ‘Batikooro bakinya kûra mbathuuranîrîte kûrî kînogoko kîao.’ ”

¹² Kwoogu îmenyeereeni, aruayia na aarayia, bwîgue gûtirî we wacienu arî na nkoro ya kûrûtha ûthûûku kana ya kûrega gwîtîgia, aaya kwathûkana na Ngai ûra atûûraga mwoyo.

¹³ Îkanagîraani wîru wakîra ntugû twîtaga “îmunthî,” kaingo bûteeneerua i wîyia bûbûûmia biongo.

¹⁴ Tûrî na kîthaarimo kîmwe na Kîrîstû kuumania na mantû mara arûthîîte, waya kwîgua tûkaathi na mbere kwîgua tûrî na wîtîgio bûûriku mwanka mûthia.

¹⁵ *Maandîko Maatheru maugîîte, “Bweegua Ngai akîaria naabi îmunthî, bûtikaûmie biongo, ta biûyûûyû bienu. Baaregire mbatongoria, bangeria.”

¹⁶ I ba ûû bo beegiirue mîgambo ya Ngai, îndî baarega kûmwîgua? T'wabara bonthe Musa aatongoreerie bauma Miisiri?

¹⁷ Na i ba ûû baathûûrîîtie Ngai mîanka mîrongo îna? T'wabara beeyiirie na bara baakuirîîre rwanda?

¹⁸ Na i ba ûû Ngai aaragîîria îgûrû rîao rîra aathiîtiirie auga, “Batikooro bakinya kûra mbathuuranîrîte kûrî kînogoko kîao”? T'wabara baaregire kûmwathîkîra?

¹⁹ Kwoogu i ta kwonania n'ûntû bwa kwaga wîtîgio kwao, antû babu batigîkinya gûntû gûku.