2 TIMOTHEO 3 - Kîrîîkanîro Kîîyerû

Ntugû cia mûthia

¹ Karaga wiyî atî ntugû ciakinya cia mûthiro wa nthîgûrû gûkeegua kûrî na mathîîna maingî mûno.

² Antû bagaatuîka eebendi, eendi mbia, eekumia, batue kwîbûkagîîria na batuîke arumani. Aana barege kwathîkîra aciari baao, antû baage nkuma, batuîke bara batarî batheru nkorooni,

³ bathire kîao, batige kûrekanagîra, batue gûtuuyanagîîra ûrongo, baremwe i gwîkaanagia kûrûthaga mantû mara mataagîrîte, bathûûke batuîke abitina, beende ûthûûku akî,

⁴ batuîke akunyanîri, barûthage mantû batakûmaka bûra gûgaakara, batue kwîthûkagia barî antû ba gîtûmi, beende mîago ya nthîgûrû bantû a Ngai.

⁵ Bakoonekaga taka barî antû ba Ngai, îndî baregane na inya ya Ngai. Ûtikeende kûgwetanirua na antû ta babu.

⁶ Bamwe ba antû ta babu i bo bathiyaga kinya mîciî ya antû bagakîria inya eekûrû bara batarî inya kweneerua, bara barî na mîrigo ya meeyia maingî mûno na baathagwa i wîrirîîria bwa mîthemba yonthe.

⁷ Eekûrû ta babu beegagua bakîgeria kûmenya, îndî bataûmbe kûmenya ûmma bungwa.

⁸ Ta bûra Njanes na Njamberes baakararagia Musa, antû baba na bo i ta bu bakararagia na bakaregana na ûmma n'ûntû bwa bûra meeciiria maao maathûûkire na wîtîgio bwao ti bwa mma.

⁹ Antû ta baba batikarangaga antû batiracooka kwona bûra bariitîîte bûgana ta bûra baacookire kwona Njanes na Njamberes bakari.

Mataaro ma mûthia kîrî Timotheo

¹⁰ Îndî woû, Timotheo, nwiyî bwega mûno mantû mara monthe ndutanîîte na nwoneete mûkarîre wakwa, mworooto wakwa ûtûûrooni, wîtîgio bûra ndî na bu, kwinyîkîria, kwendanaga, kûûmîîria

¹¹ kûnyamaarua na kûthîînua. Nwiyî bwega mûno kûnyamaarua kûra ndanyamaarîîtue Antiokia, Ikoniamu, na Rîstira, îndî ndaûmîîria. I Mwathani aambonokagia gûntû gûku kunthe.

¹² Muntû wonthe ûra eendaga gûtûûrîra Ngai arî ndeni ya Kîrîstû Yiesû akanyamaarua.

¹³ Antû baathûûku na bara beetuîkithagia kîra batarî ibagaatororeria, bathi na mbere bakîenagîîria antû na bakîîbenagîîria barî bo bongwa.

¹⁴ Îndî woû karaga ûrikîîtie ûmma bûra warutanirwe na wabuîtîgia na inya. Nwiyî aarimû baaku baarî ba ûû.

¹⁵ Kuuma wana bwaku nûtûîre wiyî *Maandîko Maatheru, mara maûmbaga gûkwatha ûkoona wonokio na njîra ya gwîtîgia Kîrîstû Yiesû.

¹⁶ Maandîko Maatheru monthe maumanîîtie na Ngai matûmagîrwa kûrutana antû ûmma, gûkaania muntû, kûruta muntû mabîtia na gûtongoreeria antû batûûra barî baagîru,

¹⁷ kaingo muntû ûra arutagîra Ngai ngûgî aûmba kwîgua arî ûmûganu na akîûmbaga kûrutîra Ngai ngûgî yonthe îmbega.