1 AKORINTHO 3 - Kîrîîkanîro Kîîyerû

Aruti ngûgî ba Ngai

¹ Aruayia na aarayia, ntaaria naabi ta antû ba gîîkîrundu. Ndaariire naabi bûrî bara batongoragîîrua kûrûtha mantû i mawîrirîîria ma kîîmwîrî, bûrî ta tûgenke mantûûni ma gîîkîrîstû.

² Ûrutani bûra ndabûrutanire bwarî ta îria ti ta irio biongwa, n'ûntû bûtikîûmba kûrîa irio. Wana îîndî bûtiûmbana na bio

³ n'ûntû bûtongoragua kûrûtha mantû i mawîrirîîria ma kîîmwîrî. Bûkaraga bûkîîganagua rûriitho, bûkîthetanagia na kwathûkana gatîgatî keenu. Gûku ti kwonania bûtirî ba gîîkîrundu na bûrûthaga mantû ma kîîmuntû?

⁴ Rîra muntû augaga, “Niû ndî wa Paûrû,” na ûngî akauga, “Niû ndî wa Apooras,” ti ta kwonania bûrî bûmwe na antû ba kîînthîgûrû?

⁵ Paûrû îîndî n'ûû? Kana Apooras? Tiû n'aruti ngûgî ba Ngai tu, bara twabûteetheerie bweetîgia. Wakîra ûmwe wacietû aarutire ngûgî îra Ngai amwete aruta.

⁶ Niû i kwanda ndaandire mbeû, Apooras amîîtûûrîria rûûyî. Îndî i Ngai aatûmire mbeû înu îkûra.

⁷ Kwoogu ûra aandaga mbeû na ûra amîîtûûragîria rûûyî batiganaanua na Ngai ûra atûmaga mbeû cionthe ikûra.

⁸ Gîtûmi kîa ûra aandaga mbeû na ûra amîîtûûragîria rûûyî i kîmwe, na woora ûmwe waciao akeewa kîewa gîake i Ngai n'ûntû bwa ngûgî yake.

⁹ Mworooto wetû n'ûmwe ngûgîîni ya Ngai, na biû naabi bûrî mûnda wa Ngai kana mwako wake.

¹⁰ Ndatûmîîre kîewa kîa mwanya kîra Ngai ampete ndaaka mûcingi wa nyomba ta mwaki arî wara, rîru ûngî n'we aaya aakîîra kuuma agu. Îndî nwa mwanka woora mwaki amenyeere bûra agwakanga nyomba îno.

¹¹ Gûtirî we aûmba kwanjîîria mûcingi ûngî tatiga ûra wanjîîrue, ta uu Yiesû Kîrîstû.

¹² Muntû nwa aake kuuma mûcingiini ûyû na thaabu, fetha, maiga ma goro mûno, mbaaû, nyaki, kana na mîboa.

¹³ Ntugû ya mûthia ûkeegua kûrî na kagiita ga kûgeria ngûgî ya woora muntû yonekane bûra îkari. Ngûgî ya woora muntû îgaakûrûkîîrua mwankiini, kaingo yonekana bûra îbuîte bûgana.

¹⁴ Weegua kîra muntû aakire gîkaûmîîria mwanki akeewa kîewa.

¹⁵ Îndî weegua kîra muntû aakire igîkaabea i mwanki, ûyu n'uu mûthia wa kîo. Mwaki arî we akoonokua, îndî i taka akoonoka kuuma mwankiini.

¹⁶ Ka bûtaiyî biû i nyomba ya Ngai na Kîrundu wake atûîre ndeni yenu?

¹⁷ Muntû akaaya kwînyangia nyomba ya Ngai, Ngai nakaamwînyangia n'ûntû nyomba ya Ngai n'întheru, na i biû yo.

¹⁸ Bûtikeebenie. Ûkaaya kwîgua kûrî we akûthûgaania n'ûmûûme mantûûni ma nthîgûrû îno, abatîîrue atuîka kîaa kaingo agîa ûûme bwa mma.

¹⁹ Ûûme bwa mantû ma nthîgûrû i waa kîrî Ngai, wata bûra kwandîkîîtwe *Maandîkooni Maatheru atî, “Agwataga bara baûme na ûûme bwao bongwa.”

²⁰ Na kaîrî kwandîkwa, “Ngai naiyî bûra bara baûme bathûgaanagia. Naiyî mathûgaanio maao i ma ûtheri.”

²¹ Kwoogu gûtirî muntû abatîîrue eekumia na antû. Kîra gîntû i kîenu n'ûntû bwa Kîrîstû,

²² nwîgue i Paûrû, Apooras, kana Kebas. Naka na kinya nthîgûrû, ûûmbani mwoyooni ûyû na gîkuûni, bira birî oogo îgiitaani rîrî kana rîra rîkaaya, bionthe i bienu.

²³ Biû naabi bûrî ba Kîrîstû, na Kîrîstû n'we n'wa Ngai.