Matiu 8 - A Turoxoian Fa'ui Sina Piran

Na Yesus A Vil Faroxoi A Mataa Tana Tapak

¹ Layaan na Yesus a sivimaan ti xuluna put a malila ri usie.

² E lana yaan naang a mataa tana tapak maa bukaak la ka Yesus e kuus, “Memai, tamo no vubuxane no fexaxaas sena vil faroxoiau.”

³ Na Yesus a talangai xe sina pana mana e tawe e a suie, “Aang, ne vubuxane. Savat roxo!” A tana mataa aave a savat roxo fa'ipul sena giisan sina.

⁴ E na Yesus a xuuse, “Langai! Muta xuus ta mataa pana. Falet fatak xe sina priis talo i tafe taxan faroxoi a taam, e mui no taa tatavai pana mo aava na Moses a kuus pana xena faxalit a rabuna pana vil faroxoiaan nano.”

Na Yesus A Vil Faroxoi A Sisiak Sina Saxa Paamua Ina Rawen Ti Rom

⁵ Layaan na Yesus a laak la bina Kapanam a saxa paamua ina rawen ti Rom a savat sina e fenung pana xakaavangan sina malaan,

⁶ “Matalava, a sisiak siak pe la lifu, a giis la ivin sina. A pife fexaxaas sena falet xolai e taxa maasak faagut.”

⁷ Na Yesus a kuus, “Ne taa fe vil faroxoie.”

⁸ Taasaxa paamua aave a suie, “Piau Matalava, no taa pife savat la lifu siak senaso nano, no matalava e nenia, ne mataa palau. No taa kuus mon e a sisiak siak i taa roxo fulaa.

⁹ Nenia sait, ne waan lapaana tateaxan ina paamua siak e ne toxan a rabuna ina rawen lapaana tateaxan iga. Ne taa xuus a saxa pana ‘Falet!’ e a falet; ne xuus a saxa pana ‘Man’ e a filimaan e ne xuus a saxa yaasok siak pana ‘Vil a mo aanabe'’ e nane vile.”

¹⁰ Layaan na Yesus a langai pana mo aanabe' a ipul faagut sena e a kuus xe sina mu rabuna aava ri waan xuvul pana, “Ne xuus tuunei nami, ne pi titingin ta saxa pe Israel pana namkaian malaanabe'.

¹¹ Ne xuus nami o maana rabuna ri taa savat ti paa e ti kol e taa nai la fenamo molava lana fatataganan sina Piran xuvul pa Abrahem, Aisaak nari na Yaakop.

¹² Taasaxa, nari aava Piran a siak fati nari paamua, ri taa tapinan xe lana suk e pave ri taa taangiis faagut e faxakengat a fari.”

¹³ E mui na Yesus a xuus a paamua ti Rom, “Falet xe la lifu siim e a so ta mo no namkai sena i taa savat la matavas xe siim.” E a sisiak sina paamua aave a savat roxo monabe' mon.

Na Yesus A Vil Faroxoi A Maana Rabuna Xaves

¹⁴ Layaan na Yesus a laak la lifu si Pita, nane xalum na imu Pita taxa mati la ivin pana tana lalagaf.

¹⁵ Nane tao a mana e a lalagaf a malit fa'ipul e a tana feroxo e nane tamasiak e faigotan a fanganan xana.

¹⁶ La vung aave a rabuna ri lisanmaan a mu rabuna pana vovau saat xe si Yesus. E na Yesus pana ferawaian mon a gei tapin a mu vovau saat e a vil faroxoi nari xapiak aava ri toxan a maana buk giisan.

¹⁷ E malaanabe' nane fasavat famatavas a maana mo aava na Aisaia, saxa mataa ina kuus fatuxai, fo ferawai pana. A kuus, “Nane xa a siak tapin a giisan sitaara e mulus tapin netaara sena maasaxan.” Aisaia 53:4.

A Rovaat Aava Re Buk Usi Na Yesus

¹⁸ Lavaxa, layaan na Yesus a kaalum o a malila ri fakaliuane, nane fasei faagutan a mu fefeng sina o ri taa falet fatak xe la xasa paxasing ina raarum.

¹⁹ E saxa mataa ina fepitaa pana vuputkai maa savat sina e a kuus, “Mataa ina Fepitaa, ne taa usi nano tamo no falet xe faa.”

²⁰ E na Yesus a suie, “A mu piu vupung ri toxan a liing siri e mu maanu la tavegof ri toxan a singa siri, taasaxa a Natuna Mataa piau ta nobina xena mati fangaafus.”

²¹ A saxafuna aava usi na Yesus, a kuus, “Memai, paamua turoxo o ne taa fe xaafan na Tamaang.”

²² Taasaxa na Yesus a suie, “Usiau e ta'ulan a mu rabuna aava ri fo maat xena xaafan a mamaat siri xa.”

Na Yesus A Famararol A Reref E Tof Molava

²³ Layaan na Yesus a xawas xuluna xaati a mu fefeng sina ri xawas sait.

²⁴ E a tang reref molava xuvul pana raafui re savat fa'ipul la laman e a xaati aave faasilak i lus. Taasaxa na Yesus i taxa matef.

²⁵ A mu fefeng sina ri fe faparaye e ri kuus, “Memai! Fakaxup netaara ulaa taara tamaa xarak!”

²⁶ Na Yesus a sui nari, “Xenaso mi mataut temasaat? A namkaian simi a modak paaliu, bo?” E mui a tamasiak e fasei a reref e tof molava pana re taa taxapus e a reref e tof molava re mararol.

²⁷ E nari xapiak ri ipul e ri kuus, “Nane nase'? Nane ve a so ta buk mataa? A reref e tof molava re langaie.”

Na Yesus A Mulus Tapin A Rovaat Tomexaan Sena Maana Masalai

²⁸ Layaan na Yesus maa savat la xasa paxasing ina raarum la bina ri xalie pa Gadarin, a rovaat tomexaan pana maana masalai re savat ti la matana xawaa e re fesuaian na Yesus. A rovaat aave re toxan a gutan molava e a rabuna ri pife fexaxaas sena sangas liu et la salan aave.

²⁹ E layaan re xalum na Yesus re xukulai faagut, “Rao no sivin nemaame, Natuna Piran? No fo savat xena fakasanamaan nemaame paamuina yaan fatak ina tiisan, bo?”

³⁰ A toxan a tagaan vio taxa waan faasilak e ri taxa fangan.

³¹ E a mu masalai ri nung na Yesus, “Tamo no feng tapin nemaam xasena rovaat aanabe' feng nemaam xe lana tagaan vio aapave.”

³² E na Yesus a xuus nari, “Falet!” E voxo ri ta'ulan a rovaat aave e ri fe vao a tagaan vio. A mu vio xapiak ri fala sivi ti la xasing ina put xe lana raarum aave e ri fexarak e ri maat.

³³ A mu tomexaan aava ri fuuna faxatang a tagaan vio aave ri sinuf xe la bina faasilak e pave ri kuusan a xuuskuus xurul e a so ta mo a savat sina rovaat tomexaan aava mu masalai fo ta'ulan nare.

³⁴ E voxo a mu rabuna xapiak ti la bina ri fesuaian na Yesus. Layaan ri xalume, ri nung faagutane o i taa ta'ulan a bina siri.