Matiu 4 - A Turoxoian Fa'ui Sina Piran

Na Setan A Valam Na Yesus

¹ E mui a Vovau sina Piran a paamuian lisan na Yesus xe la xobingil talo na Setan i taa valame.

² E na Yesus a falfaal pana yaan sangafilu talafaat xurul e felagai.

³ Na Setan aava saxa xena valamaana, a savat sina e kuus, “Tamo nano ve no Natuna Piran, xuus a mu faat o ri taa savat bret.”

⁴ E na Yesus a suie, “A Xakalayan Taap a kuus: ‘A mataa i taa pife siak a gutan sena bret sang mon taasaxa i taa siaxe sena maana ferawaian aava savat ti la valana Piran.’” Vuputkai 8:3.

⁵ E mui na Setan a lisane xo xe la bina taap, na Jerusalem, e fatigineie laa'ui paaliu xuluna tang lifu lotu e a kuus,

⁶ “Tamo nano, no Natuna Piran, tapin fasivi nano xa senaso a Xakalayan Taap a kuus: “‘Nane taa xuus a mu angelo sina pama e nari, ri taa yaas nano xe laa'ui pana mari talo a kaam i taa pife du sui a faat.’” Yanganan 91:11,12.

⁷ Na Yesus a suie, “E vaxa a Xakalayan Taap a kuus: ‘Muta valam a Memai, a Piran siim.’” Vuputkai 6:16.

⁸ E fulaa, na Setan xo a lisane xe laa'ui xuluna put modus e faxalite pana mu fatataganan la xavala e a roxoyan siri e a kuus,

⁹ “Ne taa tavai nano pana maana mo aanabe' tamo no taa bukaak e nangusau.”

¹⁰ E na Yesus a suie, “Faapalau sega, Setan! Senaso a Xakalayan Taap a kuus: ‘Nangus a Memai, a Piran siim e no taa sisiak sina mon.’” Vuputkai 6:13.

¹¹ E mui na Setan a ta'ulane e a mu angelo xo ri maa savat sina e ri xavange.

Na Yesus A Tangpat Pana Faisok Sina

¹² Layaan na Yesus a langai o na Jon fo vipis, nane ulaa xe Galili.

¹³ Nane ta'ulan na Nasaret e fe taagul pe Kapanam aava waan la itina raarum pe Sebulan e Naaptali.

¹⁴ E malaanabe' a ferawaian si Aisaia savat la matavas. Nane kuus:

¹⁵ “A mu rabuna ti pe la ro bina Sebulan e Naaptali, a bina la xasing ina salan aava sivi xe la laman e a bina la vangana Raarum Jordan, a ro bina aave re waan pe Galili e pave a toxan a rabuna xaves aava ri pife Juda-

¹⁶ a mu rabuna aave xo ri fo taagul la suk e naboxo ri xalum a malang molava; e a malang fo savat xuluri aava ri taagul lapaana xaxaalua ina maatan.” Aisaia 9:1,2; 42:6-7.

¹⁷ Ti la yaan aave na Yesus a tangpat pana kuusan fasavat a ferawaian sina Piran malaan, “Puk tapin nami xa xasena vilaana saat simi senaso a yaan ina savatan sina fatataganan sina Piran a faasilak.”

Na Yesus A Xel A Rabuna Talafaat Xena Usiaana

¹⁸ La fena sangasan sina la vangana Laman Galili nane xalum a ro fetinan, na Saimon aava ri xalie pa Pita nare Endru. Re taxa tapin fasivi a vana sire la taas senaso re fuuna faadinan.

¹⁹ E na Yesus a kuus, “Me maa usiau e ne taa fapiti name pana pataasaana rabuna.”

²⁰ E fataapus re ta'ulan a vana sire e re usie.

²¹ A falet famodak fulaa e xalum a xasa rofetinan fulaa, na Jems nare Jon xuvul pa tamare, na Sebedi. Rutul taxa waan xuluna xaati e rutul taxa faigotan a vana sirutul. E na Yesus a xel nare.

²² E fataapus re ta'ulan a xaati e na tamare e re usie.

²³ Na Yesus a falet xolai pe Galili e nane fepitaa la maana lifu ina faxuvulan siri e kuusan fasavat a Lagasai Roxo sena fatataganan sina Piran. E a maana buk giisan aava fo sip a rabuna, nane vil faroxoie.

²⁴ A mu rabuna aave ri xuus fatexaas a xasanofuna pana e mui a mu rabuna xapiak pe Siria ri texaas sena e ri maa lisan a rabuna aava ri giis xe sina: nari pana maana buk giisan e pana maasaxan molava, nari aava vovau saat fo vao nari e nari aava ri gaga e nari aava mari o kari maat. E nane xo a vil faroxoi nari.

²⁵ A tang malila ti Galili, Jerusalem, Judia e ti la bina Dekaapolis sina mu rabuna aava ri pife Juda e ti la bina la xasa paxasing ina Raarum Jordan, nari xapiak ri usie.