Matiu 27 - A Turoxoian Fa'ui Sina Piran

A Mu Paamua Ri Lisan Na Yesus Xe Si Pailat

¹ La paanen lolof a mu paamua priis xuvul pana mu matalava ri lalamon pana punuxaan na Yesus.

² Ri pise e ri lisane xe si Pailat aava paamuian a bina pave lapaana paamua lava ti Rom.

Na Judas A Xiut Nane Xa

³ Layaan na Judas aava pet lisan na Yesus, a texaas o a mu paamua ri fo kuus o na Yesus a vupuno e i taa maat, a mimilisaatan molava a siaxe e nane lisan fa'uli a faat ʻsilvaʼ sangafilu talatul xe sina mu priis.

⁴ E a xuus nari, “Nenia, ne fo faasaal faagut pana pet lisanaana mataa aava pife vupuno!” E nari, ri kuus, “A lagafan siim xo pife mo simaam.”

⁵ Na Judas a tapin fasivi a mu faat aave la nobina ina tang lifu lotu e falet xena xiut fatofan nane xa e a maat.

⁶ Taasaxa mu paamua priis ri siak a mu faat aave e ri kuus, “A mu faat aanabe' a mamareiai ina ria e a mu vuputkai sitaara a kuus o pife roxo xena fawaane xuvul pana mu faat sina lifu lotu.”

⁷ Ri ferawai pana e ri lamon o ri taa maraan a xavala sina mataa ina vavesai pana xavala. Ri maraane xena xaafanaana mu topen.

⁸ E fefexaxaas tanin ri xali a xavala aanabe' pana “Xavala ina Ria”.

⁹ E layaan a mu paamua priis ri vil malaane, a ferawaian sina mataa ina kuus fatuxai, na Jeramaia, a savat tuuna la matavas: “Ri siak a faat ʻsilvaʼ sangafilu talatul, a mamareiai aava saxano rabuna Juda ri turoxo pana

¹⁰ e ri maraan a xavala sina mataa ina vavesai pana xavala malaan sena Memai a xuusau pana.” Jeramaia 32:6-9.

Na Yesus A Fatigineian La Mata Pailat

¹¹ Na Yesus i taxa tigina la mata Pailat aava paamua lava ina bina e nane xo a fin na Yesus, “Nano ve no paamua king sina mu Juda, bo?” E na Yesus a suie, “Nano, no kuus malaan.”

¹² Taasaxa layaan a mu paamua priis xuvul pana mu matalava ri gel tifie, nane pife sui nari.

¹³ E voxo na Pailat a kuus xe sina, “No langai a maana gelan siri, bo?”

¹⁴ Taasaxa na Yesus a pife sui ta saxa fiaian. E a paamua aave a ipul faagut sena.

Na Pailat A Kuus O Na Yesus I Taa Maat

¹⁵ La maana Fenamo ina Paaliuan a paamua lava aave fuuna mulus tapin ta saxa mataa vipis aava malila ri vubuxane.

¹⁶ Lana yaan aave a toxan a mataa vipis aava mu rabuna xapiak ri texaas sena vilaana saat sina, a isina na Baraabas.

¹⁷ E layaan a malila ri fo faxuvul, na Pailat a fin nari, “Nase' ta mataa vipis mi vubuk rao ne taa mulus tapine xe simi? Na Baraabas o na Yesus aava ri xalie pa Krais?”

¹⁸ Nane texaas o a mu paamua sina mu Juda ri fo lisan na Yesus xe sina senaso ri tarasuie.

¹⁹ E fulaa, layaan i taxa nai la nobina ina tiisan, a tefin sina fo lisan a lagasai xe sina, “Muta vil ta mo xasena mataa fatak aave senaso la vung ne fo mif fasaat sena.”

²⁰ Taasaxa mu paamua priis xuvul pana mu matalava, ri yuuf a lamonan sina malila e voxo ri fin na Pailat o i taa mulus tapin na Baraabas e punuk na Yesus.

²¹ Taasaxa na Pailat a fin a malila, “Nase' la palou ire mi vubuk rao ne taa mulus tapine xe simi?” E ri suie, “Na Baraabas!”

²² E na Pailat a fin nari, “Lavaxa, taasaxa ne taa vil a so pa Yesus aava ri xalie pa Krais?” E nari xapiak ri kuus, “Niil fataxutane!”

²³ E na Pailat a fiai, “A so ta vilaana saat nane fo vile?” E nari, ri xukulai faagut, “Niil fataxutane!”

²⁴ Layaan na Pailat a texaas o a pife fexaxaas sena vil ta mo fulaa e a mu rabuna ri tamaa fegagelai e fasavat a fevisan, nane siak a raarum e xamak a mana la matana malila e a kuus, “Nenia, ne taa pife vupuno sena ria ina mataa fatak aanabe'! A mo aanabe' a faisok simi.”

²⁵ E a malila xapiak ri suie, “A vupuno ina maatan sina i taa waan xulumaam e mu yaya simaam!”

²⁶ E na Pailat a mulus tapin na Baraabas xe siri e xuus a mu rabuna ina rawen sina o ri taa inis na Yesus pana yeis tuturuk e mui ri taa niil fataxutane.

A Mu Rabuna Ina Rawen Ri Suaxan Na Yesus

²⁷ E mui a mu rabuna ina rawen si Pailat ri lisan na Yesus xe lana lifu ina fawaan a maana mo ina fevisan e xasano rabuna ina rawen xapiak ri fakaliuane.

²⁸ Ri ririk tapin a marapi sina e ri falaxe pana marapi vuung ina xakaafut.

²⁹ E ri fi a ligilot pana yeis tuturuk e faneie la putuna e ri timin a newai la pamamuaan sina. E mui ri bukaak la nona e ri suaxane e ri kuus, “Maam suai sema, ‘King’ sina mu Juda!”

³⁰ E ri kaanus la tana e ri siak a newai aave e sipe la putuna.

³¹ Layaan ri fataxapin a xurauan saat siri, ri siak tapin a marapi vuung e falaxe pana marapi sina xa e ri lisane xena niil fataxutane.

Ri Niil Fataxutan Na Yesus

³² Layaan ri taxa ta'ulan a bina aave ri savat sina saxa mataa ti la bina Sairiin, a isina na Saimon, e a mu rabuna ina rawen ri fatuaiane xena yaas a bolo si Yesus.

³³ E layaan ri savat la bina Golgaata, a malasuf ina isin aanabe' ve “A bina ina veng”,

³⁴ ri tavai tarei na Yesus pana wain aava toxan a mo mopaak lana ri xalie pana ʻgaalʼ xena nume taasaxa layaan a tafang tareie, a bai nume.

³⁵ Layaan ri fo niil fataxutane xena punuxaana, ri tapin a faat xena texaas o nase' taa siak a marapi sina.

³⁶ E mui ri taxa nai faxatange.

³⁷ E laa'ui la putuna bolo ri timin a lagasai aava kuus pana gel tifiaana, “A mataa aanabe' na Yesus aava King sina mu Juda.”

³⁸ E mui ri niil fataxutan a rovaat tomexaan ina fenau xuvul pa Yesus, saxa la pamuaan sina e saxa la paxaiya.

³⁹ Nari aava ri liu ete, ri liitan a puturi e ri ferawai fasaat xe si Yesus

⁴⁰ e ri kuus, “Nano, no kuus o no taa ngas tapin a tang lifu lotu e vesan fa'ulie lana yaan talatul, lavaxa fakaxup nano xa. Tamo nano ve no Natuna Piran sivimaan ti xuluna bolo aave!”

⁴¹ E mu paamua priis, mu matalava e mu rabuna ina fepitaa pana vuputkai ri vil malaane sait e ri kuus,

⁴² “Nane fakaxup a xasanofuna taasaxa pife fexaxaas sena fakaxup nane xa! Tamo nane ve a piran king tuuna sina mu Israel i taa sivimaan ti xuluna bolo e taara taa namkai sena.

⁴³ Nane namkai o a Piran i taa xavange e a kuus o nane ve a Natuna Piran. Tamo Piran a vubuk rao i taa fakaxupe naak i taa vile naboxo.”

⁴⁴ E a rovaat ina fenau aava ri niil fataxutan nare xuvul pana, nare vaxa re ferawai fasaat sena.

Na Yesus A Maat

⁴⁵ La paanaas, faasilak la belo, a bina xapiak fesuk pana awa talatul.

⁴⁶ La 3 oklok na Yesus a xukulai faagut, “Eloi, Eloi lama sabaatani!” a malasuf ina, “Piran siak, Piran siak, xenaso no lamon ta'ulanau?”

⁴⁷ E saxanofuna aava ri ti faasilak, ri langaie e ri kuus, “Nane taxa xel na Ilaija!”

⁴⁸ E saxa mataa ina rawen a falapukmaan e siak a pel, timine lana wain mopaak e pise la ngusuna wai e tavaie pana xena num.

⁴⁹ Taasaxa xasanofuna ri kuus, “Naboxo maam taa texaas tamo na Ilaija i taa fakaxupe.”

⁵⁰ Na Yesus a xukulai faagut fulaa e a mulus tapin a vovau sina e a maat.

⁵¹ E lana yaan aave a marapi aava tofai la tang lifu lotu a tiririk xapiak ti laa'ui xe lapia. A Piran a faradakui a xavala e gurum a maana faat.

⁵² E a maana bina ina mamaat ri talakas e maana rabuna xaradak sina Piran aava ri fo maat, ri to fa'ulaa ti la mamaat

⁵³ e ri ta'ulan a bina mamaat. Lamina yaan a Piran a fatatoi fa'uli na Yesus ti la maatan, ri laak la Bina Xaradak, na Jerusalem, e pave a maana rabuna xaves ri xalum nari.

⁵⁴ Layaan a paamua sina rabuna ina rawen e mu rabuna ina rawen aava ri waan xuvul pana xena faxatang na Yesus ri xalum a mara'ulia e xasano mo aava savat, ri mataut faagut e ri kuus, “Tuuna paaliu, nane ve a Natuna Piran.”

⁵⁵ A toxan a lutefin xaves pave aava ri fo falet xolai xuvul pa Yesus ti la bina Galili xena xavange. Ri taxa ti falim a maana mo aanabe' ti lasuun fadak.

⁵⁶ La palou iri na Maria ti Mekdala, na Maria aava na nina Jems nare Joses e a tefin si Sebedi, rutul taxa waan.

Ri Xaafan Na Yesus

⁵⁷ Faasilak a bina i suk e a mataa piran ti Erimatia fe savat si Pailat. A mataa aave a isina na Yosep e nane vaxa a saxa fefeng si Yesus.

⁵⁸ Nane laak soxot na Pailat e fine pana vipin i Yesus. E na Pailat a kuus o ri taa tavaie pana.

⁵⁹ E voxo na Yosep a siak a vipin i Yesus e pise pana marapi fa'ui

⁶⁰ e famatie lana liing ina mamaat sina xa aava ri fo taxe lana faat. E a tivotan a matana liing aave pana tang faat e ta'ulan a bina.

⁶¹ Na Maria ti Mekdala xuvul pa xasa Maria re taxa nai kaalum xe la matana liing aave.

A Mu Rabuna Ina Rawen Ri Tivotan A Liing Ina Mamaat

⁶² A yaan mui aava Yaan ina Fangaafusan, a mu paamua priis xuvul pana mu Ferasi ri falet faxuvul xena ferawai xuvul pa Pailat

⁶³ e ri kuus, “Matalava, maam lamon fa'uli a ferawaian sina mataa ina bitan aave. Layaan i taxa to lunai a kuus, ‘Lamina yaan talatul ne taa to fa'ulaa.’

⁶⁴ Xuus a mu rabuna ina rawen siim o ri taa kaalum votai sena liing ina mamaat aave fefexaxaas a fatalatulaana yaan talo a mu rabuna sina ri taa pife fenou a vipin ina e xuus a mu rabuna o nane taxa to fa'ulaa. A bitan fataxapiak aanabe' i taa mo mosaat sena bitan mata.”

⁶⁵ Na Pailat a kuus xe siri, “Lavaxa, ne taa tavai nami pana rabuna ina rawen xena kaalum votai sena liing ina mamaat. Faxa'usi a vubuxanan simi.”

⁶⁶ E voxo ri fe timin a fakalimaanan xuluna tang faat aave e ri feng a mu rabuna ina rawen xena kaalum votai.