Matiu 22 - A Turoxoian Fa'ui Sina Piran

A Ferawaian Paap Pana Fenamo Ina Tamaian

¹ E na Yesus a ferawai paap fulaa xe siri e a kuus,

² “A fatataganan sina Piran a malaanabe': A toxan a paamua king aava faigot pana fenamo ina tamaian sina lak tomexaan sina. E nane fin a saxano rabuna o la yaan fatak ri taa filimaan xe lana.

³ Layaan a maana mo fo faigotanan nane feng a mu sisiak sina xena xuus a mu rabuna aave pana yaan fatak naboxo, taasaxa ri bai filimaan.

⁴ “E nane feng a xasano sisiak sina pana lagasai aanabe' xe siri naang, ‘A fenamo a tamasiak xo; maam fo punuk a mu bulmakau e mu natuna bulmakau aava ri palak faroxo. A maana mo ina fenamo taxa waan naboxo. Filimaan xe lana fenamo ina tamaian!’

⁵ “Taasaxa nari aave ri lamon fepalauane e saxanofuna ri falet xe la lifu ina faisok siri e saxanofuna ri falet xe la uma lava siri.

⁶ E xasanofuna ri yot a mu sisiak aave e sip faagutan nari e punuk nari.

⁷ A paamua king a marala faagut e voxo feng a mu rabuna ina rawen sina xena kawaasan a mu rabuna ina ngaapunuk e faram a bina siri.

⁸ “E mui a xel faxuvul a mu sisiak sina e kuus xe siri, ‘A maana mo fo faigotanan naboxo, taasaxa nari aava ne fo fin nari pana filimaan xe lana, ri pife roxo xena filimaan.

⁹ Lavaxa, naboxo falet xe la mu salan lava lana bina e fin nase' ta rabuna mi tingin nari xena laak lana fenamo siak.’

¹⁰ E voxo a mu sisiak aave ri falet xe la bina e faxuvul a mu rabuna xapiak aava ri tingin nari xena laak la fenamo, nari aava ri roxo e nari aava ri saat. E a lifu ina fenamo a bas pana rabuna.

¹¹ “Taasaxa layaan a paamua king a falet xena xalum a mu rabuna aava ri fo filimaan, a xalum a saxa aava pife mawas pana marapi roxo.

¹² E a kuus xe sina, ‘Fesing, no pife mawas pana marapi roxo xena fenamo ina tamaian, xenaso no taxa waan iau?’ Taasaxa mataa aave a nai kasam senaso piau ta fufuna.

¹³ “E a paamua king a xuus a mu rabuna ina sisiak la fenamo, ‘Pis a mana e kana e tapine xe lamalei la suk.’ Pave a mu rabuna ri taa taangiis faagut e faxakengat a fari.”

¹⁴ E na Yesus a fataxapin a ferawaian sina malaan, “A Piran a fin a mu rabuna xaves o ri taa filimaan xe sina taasaxa siak fati a nutuvaat mon.”

Fepitaian Sena Maraanaana Taakis Si Sisaa

¹⁵ A mu Ferasi xo ri fexuus kasam pana malaafaa ri taa fulung na Yesus pana fiaian siri.

¹⁶ E ri feng a saxano fefeng siri xuvul pana saxano rabuna aava ri xali nari pana mu rabuna si Herot, xe si Yesus. A rabuna si Herot ri vubuk rao a mu Rom ri taa paamuian nari. E ri favupuule, “Mataa ina Fepitaa, maam texaas o nano, no ferawai tuuna. No fepitaa pana tuunayan ina salan sina Piran. E no pife lamon faaxaves pana lamonan sina xasanofuna senaso no lamon fepalauan a lavayan sina mataa.

¹⁷ E voxo, xuus nemaam pana lamonan siim. A vuputkai sitaara a turoxo o taara taa maraan a taakis aava paamua lava ti Rom a ferawai pana o piau?”

¹⁸ Na Yesus fo texaas sena lamonan saat siri e a kuus, “Nami mu xalema maranga! Xenaso mi rao mi fulungau?

¹⁹ Faxalitau pana faat aava mi maraan a taakis aave pana.” E ri lisan a faat aave xe sina.

²⁰ E nane fin nari, “A vavese' e a isise' taxa waan xuluna faat aanabe'?”

²¹ E ri suie, “A paamua lava ti Rom.” E na Yesus a kuus xe siri, “Lavaxa, tavai a paamua lava ti Rom pana maana mo sina e tavai a Piran xo pana maana mo sina.”

²² Layaan ri langai a mo aanabe' ri ipul faagut e ri ta'ulane e ri falet fepatok.

A Maana Fiaian Pana To Fa'ulaian Ti La Maatan

²³ La yaan naang, saxano Sedusi aava ri pife namkai o a rabuna ri taa to fa'ulaa ti la maatan, ri filimaan xe si Yesus e ri kuus,

²⁴ “Mataa ina Fepitaa, na Moses a kuus, ‘Tamo a mataa a maat e piau ta rafulak, na tina i taa tamai sina tefin nakmaal aave xena fasavat a rafulak xa tina aava fo maat.’

²⁵ A toxan a mu fetinan pisiguak ri waan la palou imaam. A lak tuaan fo tamai e maat e piau ta lak e voxo na tina a tamai sina tefin nakmaal aave.

²⁶ A savat malaan se tina mui e mui lamina fefexaxaas a fataxapiak. Nari xapiak ri fo maat.

²⁷ E lumui lamiri a tefin vaxa a maat.

²⁸ Lana yaan ina to fa'ulaian a tefin aave i taa tefin sise'? Nari pisiguak ri fo tamai sina.”

²⁹ Taasaxa na Yesus a sui nari, “Nami, mi fo milung faagut sena to fa'ulaian ti la maatan! Mi pife texaas faroxo sena Xakalayan Taap o sena gutan sina Piran.

³⁰ Layaan a mu mamaat ri taa to fa'ulaa, a mu rabuna, a lutefin e mu tomexaan xapiak, ri taa taagul malaan sena mu angelo la xunavata; ri taa pife tamai.

³¹ E tamo nami, mi lamon maranga sena rabuna ri taa to fa'ulaa ti la maatan naak mi pi xakaat sena so ta mo a Piran a kuus pana lana Xakalayan Taap sina. Nane kuus,

³² ‘Nenia ve a Piran aava na bumi, na Abrahem, Aisaak e na Yaakop, rutul lotu xe sina.’ Nane ve a Piran sina mu rabuna aava ri taxa to, pife siri aava ri maat.” Ta'ulanan 3:6.

³³ E layaan a malila ri langaie ri ipul faagut sena fepitaian sina.

A Vuputkai Pelalava

³⁴ Layaan a mu Ferasi ri langai o na Yesus fo fakasam a mu Sedusi ri falet xe sina

³⁵ e saxa mataa ina fepitaa pana vuputkai siri a tafange pana fiaian

³⁶ malaan, “Mataa ina Fepitaa, a so ta fefasaian lana vuputkai a pelalava?”

³⁷ E na Yesus a suie, “‘Mi taa vubuxan xasingit a Memai aava Piran simi pana xunus imi, pana lamonan xapiak simi e pana vubuxanan xapiak simi.’ Vuputkai 6:5.

³⁸ A fefasaian aanabe' a pelalava.

³⁹ E a saxa lamina a malaanabe': ‘Mi taa vubuxan xasingit a xasanofuna malaan se' mi vubuxan xasingit nami xa.’ Vilaana sina mu Priis 19:18.

⁴⁰ A ro vuputkai aanabe' re fufuna maana mu vuputkai si Moses e a mu fepitaian sina mu rabuna ina kuus fatuxai.”

A Fiaian Pana Mataa Failai Sina Piran

⁴¹ Layaan a mu Ferasi ri taxa waan faxuvul lunai, na Yesus a fin nari,

⁴² “Mi lamon malaafaa sena Mataa Failai? Na Natuse'?” E ri xuuse, “Na Natu Devit.”

⁴³ E nane xuus nari, “Senasou na Devit, layaan a Vovau sina Piran a fagute, a xalie pana ‘Memai’ e kuus malaan:

⁴⁴ “‘A Memai a kuus xe sina Memai siak, nai su' la pamuaan siak fefexaxaas a yaan ne timin a mu xaiyaas siim lapaana kaam.’ Yanganan 110:1.

⁴⁵ Tamo na Devit a xalie pana ‘Memai’ malaafaa ve nane na natu Devit?”

⁴⁶ Pi ta saxa a fexaxaas sena sui na Yesus e ti lana yaan aave pi ta saxa a lamon o i taa fine pan' ta fiaian fulaa.