Maak 8 - A Turoxoian Fa'ui Sina Piran

A Fanganan Xana Rabuna 4,000

¹ La saxa yaan fulaa a malila ri savat xe si Yesus e ri piau ta fanganan. E voxo nane xel a mu fefeng sina e a xuus nari malaan,

² “Ne muluk a malila aanabe' senaso ri fo waan xuvul paga pana yaan talatul e naboxo ri piau ta fanganan.

³ Tamo ne taa feng fa'uli nari xe la mu lifu siri ri taa giis pana lagaian senaso saxano rabuna ri filimaan ti lasuun paaliu.”

⁴ A mu fefeng sina ri fine malaan, “A bina aanabe' a bina vingil. Maam taa maraan a bret faa xena famasiaana malila aanabe'?”

⁵ E nane fin nari, “Mi toxan a bret talavisan?” E ri xuuse, “A pisiguak.”

⁶ Nane xuus a malila o ri taa nai lapia. E nane siak a bret pisiguak e fenung xe laa'ui pana e viaxe. E mui a lisane xe sina mu fefeng sina xena tavaiaana malila pana.

⁷ Ri toxan a xasanu miraxan a din sait e na Yesus a fenung pana nu din e mui a xuus a mu fefeng rao ri taa tavai a mu rabuna pana sait.

⁸ E a malila ri fangan e ri maasi. Lamina fanganan a toxan a fanganan a soliu taxa waan e voxo a mu fefeng ri tifi a bi molava pisiguak pana mu xavil ina.

⁹ E a malila aava ri fo fangan ri fexaxaas sena 4,000. E na Yesus a feng fa'uli nari.

A Fepialaian Xuvul Pana Mu Ferasi

¹⁰ E nane xawas xuluna xaati fulaa xuvul pana mu fefeng sina e ri falet xe la nobina Dalmanuta.

¹¹ E saxano Ferasi ri savat xena fepialai xuvul pana senaso ri vubuk rao i taa fa'ipul nari pana saxano vilaana xena fakalimaan a gutan sina Piran. Ri fo filimaan xena tafangaana.

¹² E nane a maagus faagut la vilau ina e kuus malaan, “Xenaso a mu rabuna malaan se' mi vubuk seng a fakalimaanan? Ne kuus tuuna paaliu o piau ta fakalimaanan i taa savat xe simi.”

¹³ E nane ta'ulan nari e xawas xuluna xaati e ri fe paan fulaa xe la saxa paxasing ina Laman Galili.

Na Yesus A Fa'isin A Lalamonan Saat Pana Yiis

¹⁴ E a mu fefeng lana xaati xo, ri lamamaaluf paaliu pana maraan bret. Ri toxan a bret saxa mon lana xaati.

¹⁵ E na Yesus a xuus nari, “Mi taa faxatang faroxo pana yiis sina mu Ferasi e sina nutuvaat si Herot.”

¹⁶ E nari, ri fefiai la palou iri o ri piau ta bret.

¹⁷ E na Yesus a texaas sena ferawaian siri e nane fin nari, “Xenaso mi ferawai o mi piau ta bret? Mi piau paaliu ta texaasan e piau paaliu ta masaman lunai? A lalamonan simi a vungut paaliu sait malaan sena mu Ferasi?

¹⁸ A saxa mataa ina kuus fatuxai ti kavai fo kuus malaan: “‘Mi toxan a mata taasaxa mi pife xakaalum! Mi toxan a tanga taasaxa mi pife langai!’ Isikiel 12:2. “Mi fo lamamaaluf?

¹⁹ Layaan ne viak a bret pama xana rabuna 5,000, mi tifi a maana xavil lana bi talavisan?” E ri xuuse, “A bi sangafilu saxa pana taragua!”

²⁰ “E layaan ne viak a bret pisiguak xana rabuna 4,000 mi faxuvule e mi tifi a bi molava talavisan?” E ri xuuse, “A pisiguak.”

²¹ E nane fin nari fulaa, “E vaxa mi taxa lo vungut lunai, bo?”

Saxa Mataa Aava Piif

²² E ri falet e ri ung la saxa bina, a isina na Betsaida. E mu rabuna pave, ri maa lisan a saxa mataa piif xe si Yesus e ri fenung xe sina rao i taa vil faroxoie.

²³ Nane tao a mana mataa piif e re falet lasuun famodak sena bina. Nane kaanus xe la matana mataa piif e tao a putuna e fine, “No xalum ta mo vaxa? A so ta mo no xalume?”

²⁴ E a mataa a kaalum xolai e sui a fiaian sina, “Ne xalum a rabuna taasaxa ri kaalum malaan sena mu wai aava taxa sangas xolai.”

²⁵ E na Yesus a tao a matana fulaa e a mataa fexaxaas sena kaalum faroxo. A xakaaluman sina a roxo fulaa e matavas xe lasuun paaliu sait.

²⁶ E na Yesus a feng a mataa aave xe la bina sina e xuuse, “Muta ulaa xe la bina aamove.”

Na Yesus Narie Saimon Pita

²⁷ Na Yesus e mu fefeng sina ri falet xe la maana nu bina faasilak se Sesaria Filipai. La fena sangasan siri nane fin nari malaan, “A mu rabuna ri lamon malaafaa sega?”

²⁸ E ri xuus fatexaas nane, “Saxano rabuna ri kuus o nano, na Jon ina Fasufan aava to fulaa. E xasanofuna ri kuus o nano, na Ilaija e xasanofuna ri kuus o no malaan sena saxa mataa ina kuus fatuxai ti kavai.”

²⁹ E nane fin fulan nari, “E nami xa, mi lamon malaafaa sega? Nenia nase'?” E na Pita a sui a fiaian sina malaan, “Nano, no Mataa Failai sina Piran, na Krais!”

³⁰ E na Yesus a pebukan nari o ri muneta kuus famatavas pana isina lunai.

³¹ E nane tangpat pana fapiti nari o a Natuna Mataa taa yaas a maana maasaxan: a mu rabuna taa bilai fasaat xe sina e mu paamua sina mu Juda e mu matalava siri ri taa gigirane e ri taa punuxe. Taasaxa lamina yaan talatul i taa tamasiak fulaa ti la maatan.

³² E nane xuus famatavas nari. Taasaxa na Pita a xele xe la xasing e a ferawai xuvul pana, narie sang mon. Na Pita a baian a ferawaian si Yesus e a barase pana.

³³ Taasaxa na Yesus a ti tapuk e xalum a xasano fefeng sina e baras na Pita malaan, “Setan, no paan patak. Pita, a xunus ima pife usi a vilaana sina Piran. A lalamonan siim a malaan sena mataa palau mon!”

³⁴ E nane xel faxuvul a malila xuvul pana mu fefeng sina e nane xuus nari, “Nase' ta mataa rao i usiau i taa ta'ulan a maana mo sina e i taa yaas a maasaxan sina e i taa usiau.

³⁵ Senaso nase' ta mataa rao i tao fatateak a toyan sina, a toyan sina i taa malit. E nase' ta mataa aava i taa punuxan sega o sena Lagasai Roxo sina Piran, a toyan sina i taa waan vulai.

³⁶ A so ta roxoyan a mataa i taa toxane tamo nane taa toxan a maana mo xapiak nabe' lapia la xavala e a vovau ina i taa malit? Naak pife roxo malaan!

³⁷ A so ta mo nabe' lapia a fexaxaas xena maraan fa'uli a vovau ina mataa? Piau ta mo fexaxaas sena.

³⁸ Nase' ta mataa i taa mangil sega o sena ferawaian siak tanin la palou ina mu rabuna xaves aava ri taxa usi a vilaana saat, lavaxa mui a Natuna Piran i taa mangil sena layaan i taa savat pana malang molava sina Piran la palou ina mu angelo.”