Maak 5 - A Turoxoian Fa'ui Sina Piran

A Mataa Pana Vovau Saat Xaves

¹ E ri savat la saxa paxasing ina laman, la bina sina mu Gerasa.

² Na Yesus a du ti lana xaati e fataapus a saxa mataa aava toxan a vovau saat a savat sina. A mataa aanabe' fuuna taagul vulai la matana xawaa.

³ Nane fuuna matef la matana xawaa e pi ta mataa a fexaxaas i taa pise. A ʻseinʼ sait pife fexaxaas sena pisaana.

⁴ Faaxaxaves ri pis a mana e kana pana ʻseinʼ taasaxa fuuna piit a ʻseinʼ o saxano mo ri pis fatateaxe pana. A gutan sina a molava faagut e piau ta mataa fexaxaas sena yot fatateaxe.

⁵ Vulai la paanaas e lavung, nane fuuna taagul la matana xawaa e xuluna put e fuuna faati kuup e i taxa putuk vulan a tana pana fisa o pana faat.

⁶ Nane xalum na Yesus i taxa sangasmaan lasuun e falapuk e fe bukaak la no Yesus.

⁷ Nane ferawai faagut malaan, “Yesus, nano, no Natuna Piran Laa'ui! No vubuk vil a so sega? Ne fenung xe siim pana isina Piran, no muta tavaiau pana maasaxan!”

⁸ A ferawai malaan senaso na Yesus a xuuse, “Nano, no vovau saat, no ta'ulan a mataa aanabe'!”

⁹ E na Yesus a fin a vovau saat aava vao a mataa aanabe', “A isaam nase'?” E a vovau saat a sui a fiaian sina, “Na Aami, senaso nemaam, ma malila.”

¹⁰ E nane nung faagutan na Yesus o i taa muta feng tapin nari, mu vovau saat, xe la xasano bina patak.

¹¹ Faasilak seri a tagaan ina vio xaves ri taxa fangan xuluna fomirak put.

¹² E a mu vovau saat ri fenung faagut xe si Yesus malaan, “A fexaxaas no taa feng nemaam xe sina mu vio aapave?”

¹³ E na Yesus a turoxo xe siri rao ri taa falet saa. E mu vovau saat ri ta'ulan a mataa aave e ri paan xe sina mu vio. A mu vio aanabe' moxo, ri fefalayai saa xe la talasaafan sina bina. A mu vio ri fexaxaas malaan sena 2,000! Ri lalaas du xe lana raarum e nari xapiak ri xarak e ri maat.

¹⁴ A mu rabuna ina faxatangaana mu vio ri sinuf e ri fe lisan a lagasai lana bina lava faasilak e lana mu bina xapiak. E maana rabuna ri paan xe pave xena xalumaana mo aanabe'.

¹⁵ Ri fesavat si Yesus e ri xalum a mataa aava mu vovau saat ri mo vawe e ri taagul xuvul pana. Naboxo i taxa falak a marapi e a lalamonan sina a matavas e i taxa nai faroxo. E a mu rabuna ri xalume e ri mataut.

¹⁶ A rabuna ina faxatangaana mu vio, ri xuus a xasano rabuna pana mo aava fo savat sena mataa aava mu vovau saat mo waan la tana paamua. E ri kuusan a mu vio siri sait.

¹⁷ A mu rabuna, ri kuus faagut rao na Yesus i taa ta'ulan a bina siri e i taa paan xe la saxa nobina patak.

¹⁸ Layaan na Yesus i taxa xawas fulaa xuluna xaati a mataa aava vovau saat mo waan la tana, a fin na Yesus rao i taa falet xuvul pana.

¹⁹ Taasaxa na Yesus a pife kuus turoxo pana, a xuuse, “No paan saa xe la lifu siim e xe sina mu fesing siim. E no xuus nari pana maana mo a Memai fo vile sema e malaafaa a muluk nano.”

²⁰ Lavaxa, a mataa aanabe' a falet e taxa kuusan fasavat a mo na Yesus fo vesane sena la maana mu bina pe Dekaapolis. E mu rabuna, ri ipul faagut pana e ri lamon faaxaves sena.

A Lak Si Jairus E Saxa Tefin Pana Giisan

²¹ Na Yesus a ulaa fulaa xe pe la saxa paxasing ina Laman Galili. E a malila ri savat xe sina pe la vangana raarum.

²² E saxa matalava ti la lifu ina faxavulan a savat, a isina na Jairus. Nane xalum na Yesus e filimaan e maa bukaak faasilak la ka Yesus.

²³ E nane fenung faagut xe si Yesus malaan, “A lak tefin siak faasilak rao i maat. Ne vubuk o no taa falet e no taa tao a tana talo i taa roxo fulaa.”

²⁴ Na Yesus a falet xuvul pana e a malila ri usie e ri ivung faasilak paaliu lamina.

²⁵ A saxa tefin la palou ina malila aanabe', nane a xaxalum a fulun vulai la maana yaan. Nane fo toxan a giisan aanabe' pana mariaas sangafilu saxa pana taragua.

²⁶ E mu rabuna i'irin ri famasaxe pana maana buk irin xaves e a tefin a maraan nari pana tangop xapiak sina taasaxa giisan sina pife taxapus famodak, piau paaliu!

²⁷ A tefin aanabe' a langai sena faisok si Yesus e nane fe laak la palou ina rabuna aava ri taxa usi na Yesus e nane sangas faasilak lumui la mi Yesus e a tao a marapi sina.

²⁸ Senaso a ilisai malaan, “Naak tamo ne taa tao a marapi sina mon ne taa roxo fa'ulaa.”

²⁹ Lavaxa, nane vil malaane e fataapus paaliu a ria la tana a pagala e nane nasam a giisan ti la tana fo taxapus paaliu.

³⁰ E na Yesus a texaas o saxano gutan fo falet, e voxo nane ti tapuk e fiai, “Nase' tao a marapi siak?”

³¹ E a mu fefeng si Yesus ri sui a fiaian sina malaan, “Ai, no xalum a malila ri taxa pitai xolai la taam e xenaso no fiai malaan: nase' tao a marapi la taam?”

³² Na Yesus a kaalum xolai e a vubuk texaas o nase' fo tao a marapi sina.

³³ Taasaxa, a tefin aave nane texaas o nane fo vil a mo aanabe' e a mataut e radakui faagut. E nane falet e fe bukaak la ka Yesus e kuusan xapin a maana mo nane fo vile.

³⁴ E na Yesus a xuuse, “Lak siak, a namkaian siim fo vil faroxoi nano. No taa falet e a xunus ima i taa malui, a giisan siim fo taxapus!”

³⁵ Na Yesus i taxa ferawai lunai e saxanu sisiak sina matalava ina lifu ina faxavulan aave ri savat e ri xuus a matalava, “A lak siim fo maat xong, xenaso no taxa lo fasorak a mataa ina fepitaa aanabe'?”

³⁶ Taasaxa na Yesus fo texaas sena so ta mo ri kuusane. Nane a xuus a matalava ina lifu ina faxuvulan malaanabe', “No muta mataut naboxo. No taa namkai mon.”

³⁷ E na Yesus a ti votan a xasano rabuna ri taa pife paan xuvul pare. Na Saimon Pita, Jems e na Jon a saxa ti Jems, narutul sang mon rutul usi na Yesus.

³⁸ E ri fe savat la lifu sina matalava aave e na Yesus a xalum nari pave, ri taxa felingai faagut senaso ri taxa fetaangiis.

³⁹ E na Yesus a laak la lifu e fin nari, “Senasou mi felingai faagut pana taangiisan simi? A lak aanabe' pife maat paaliu. Nane taxa matef move.”

⁴⁰ E mu rabuna ri fenangon xuluna. Taasaxa nane feng tapin nari xe lamalei. E nane xel mon a tamana lak e ninana o re taa laak xuvul pana e a fefeng talatul sina. E ri laak xe la nobina aava lak taxa mati lana.

⁴¹ E na Yesus a tao a mana lak e xuuse malaan, “Talita Kum!” A malasuf ina paferawaian aanabe' a malaan, “Lak tefin, ne xuus nano, no tamasiak!”

⁴² E fataapus a lak tefin aanabe' a tamasiak e sangas. A mariaas sina lak a sangafilu saxa pana taragua. E na ninana e tamana e fefeng talatul sina ri ipul faagut paaliu sena gutan si Yesus.

⁴³ E na Yesus a xuus faagutan nare o re muta xuus ta saxa mataa pana mo aanabe'. E nane xuus nare sait o re taa tavai a lak pana fanganan.