Maak 11 - A Turoxoian Fa'ui Sina Piran

La Sande Fataxapiak Pe Jerusalem

¹ La fena sangasan siri xe Jerusalem, faasilak a ro bina Betani e Betfas, la xasing ina Put Pana mu Wai Olif, na Yesus a feng paamuin a ro fefeng taragua.

² E nane xuus nare malaan, “Falet xe la bina aapave e layaan me taa savat lana me taa xalum a fomirak ʻdonkiʼ aava ri pi nanai xuluna lunai. Muluse e me lisanmaane.

³ E tamo saxa mataa i taa fin name malaan, ‘Xenaso me taxa siak a ʻdonkiʼ aamove?’ Me taa sui a fiaian malaan, ‘A Memai a vubuxane e mui i taa lisan fa'ulie xe nabe'.’”

⁴ E nare, re falet e re tingin a fomirak ʻdonkiʼ aave a palei fatian pe la salan faasilak la matana lifu e re muluse.

⁵ E saxano rabuna aava ri taxa tigina faasilak, ri fin nare, “Ai, me taxa mulus a ʻdonkiʼ xenaso?”

⁶ E re xuus nari malaan se Yesus fo xuus nare e a rabuna ri kuus turoxo e ri feng nare pana.

⁷ E ro fefeng re lisan a ʻdonkiʼ xe si Yesus e re timin a marapi sire xuluna ʻdonkiʼ e na Yesus a nai xuluna.

⁸ E a rabuna xaves ri sului a marapi siri pe la salan e xasano rabuna ri siak a raxana wai pana paxana aava ri fo siaxe pe lalatan e ri timine la salan.

⁹ E a mu rabuna ri sangas paamua e lumui la mi Yesus e ri taxa xukulai faagut malaan, “Hosaana! Faamamaas pana mataa i taa siak fati a isina Piran.

¹⁰ Faamamaas sena fatataganan malaan se butaara Devit i taa savat xo. Hosaana, laa'ui la xunavata!”

¹¹ E nane laak xe pe Jerusalem e falet xe la tang lifu lotu sina mu Juda. E na Yesus xuvul pana mu rabuna, ri laak lana e ri sangas kaalum xolai. E mui na Yesus e mu fefeng sina ri ulaa xe Betani senaso faasilak a bina i suk.

Saxa Yaan Lamina Savatan Sina

¹² A yaan saxa lumui la paanen, ri ta'ulan a bina Betani rao ri taa ulaa fulaa xe Jerusalem e na Yesus xo, a lagai.

¹³ E nane xalum a wai malaan sena xakaap a toxan a paxana xaves. E nane falet xe pave rao i taa murul a xalana. Taasaxa layaan nane fe savat pe la funa wai e xalume, piau ta xalana senaso pife yaan ina fuaian sina lunai.

¹⁴ E nane faraweie malaan, “A rabuna taa pife fangan sema fulaa!” E mu fefeng ri langaie.

¹⁵ E mui ri savat pe Jerusalem e ri laak lana tang lifu lotu pave. E na Yesus a xup tapin a mu rabuna aava ri taxa faasot pana mu bulmakau e sipsip lana lifu lotu. E nane puk tapin a mu ivin sina rabuna aava ri taxa fesoxulai pana maana buk faat ina maraanan o ri taxa faasot pana mu maanu.

¹⁶ E nane ti votan a rabuna rao ri muta yaas falak a maana mo xena faasot lana nobina ina lifu lotu.

¹⁷ E nane fasei nari, a kuus malaan, “A Xakalayan sina Piran a kuus malaan, bo? “‘A lifu siak i taa waan a lifu ina fenungan siak xana mu rabuna xapiak.’ Aisaia 56:7. “Taasaxa nami, mi fo vile malaan sena nobina ina fenauan.”

¹⁸ A mu matalava sina rabuna aava ri faisok lana lifu lotu e mu rabuna aava ri masam pana mu vuputkai siri, ri langai a ferawaian sina e ri lalamon pana punuxaana taasaxa ri mataut se Yesus e sena rabuna vaxa, senaso a rabuna xo, ri ipul pana fepitaian sina.

¹⁹ E la maana leaaf na Yesus e mu fefeng sina ri fuuna ta'ulan Jerusalem e ri ulaa xe pe la bina Betani.

A Fepitaian Sina La Fataraguiaana Yaan

²⁰ La paanen lolof ri falet fulaa xe Jerusalem e ri xalum a wai aava na Yesus fo kuus fatutule. A wai naang fo maiyang ti la xarei ina xe laa'ui.

²¹ E na Pita a lamon fa'uli a ferawaian si Yesus e xuuse, “Mataa ina Fepitaa, kaalum, a wai aava no fo fatutule, pevoxo, fo maiyang xo.”

²² E na Yesus a xuus nari, “Mi taa namkai faagut pana Piran.

²³ Ne xuus tuunei nami, tamo ta mataa pana namkaian tateak faroxo i taa farawei a put aanabe' malaan, ‘Falet e lalaas du xe pe la laman’ e a put i taa vile. Nase' ta mataa rao i taa vil malaane, tamo i taa namkai faagut pana, a vubuxanan sina i taa savat.

²⁴ E voxo ne xuus nami layaan mi taa fenung xe sina Piran mi taa namkai faagut sena mo aava mi fenung pana e i taa savat.

²⁵ E fulaa, layaan mi taxa fenung xe sina Piran mi taa lamon tapin a mu vilaana saat aava xasano rabuna ri fo vile xe simi talo a Piran vaxa i taa lamon tapin a vilaana saat simi.

²⁶ [Taasaxa tamo mi pife lamon tapin a vilaana saat sina xasano rabuna, lavaxa na Tamami pe laa'ui, i taa pife lamon tapin a vilaana saat simi.”]

A Vepen Si Yesus

²⁷ E ri savat fulaa pe Jerusalem e ri laak pe lana tang lifu lotu. E mu paamua ina lotu e mu rabuna aava ri masam pana mu vuputkai e mu matalava sina mu Juda, nari xapiak, ri filimaan xe sina

²⁸ e ri fine, “No taxa vil a faisok siim lapaana isin sise'? Nase' tavai nano pana gutan xena faisok malaan?”

²⁹ E na Yesus a xuus nari, “Paamua ne taa fin nami pana fiaian saxa e layaan mi suie ne taa xuus nami o ne taxa faisok lapaana gutan sise'.

³⁰ A fiaian siak a malaan: A faisok ina fasufan aava na Jon fo vile, a mo sina Piran ti laa'ui o mo sina mataa mon? Mi xuusau!”

³¹ E nari, ri ferawai faxuvul e ri kuus malaan, “Tamo taara taa kuus ‘ti laa'ui’ nane i tamaa kuus: ‘Lavaxa, senasou mi pife namkai sena?’

³² Taasaxa, taara mataut xena xuuse, o sina mataa mon.” Ri taxa mataut senaso a rabuna, ri taxa lamon se Jon o nane a mataa ina kuus fatuxai tuuna.

³³ Pevoxo, ri sui a fiaian si Yesus malaan, “Nemaam, maam vungut.” E na Yesus a xuus nari, “Lavaxa, ne taa pife xuus fatexaas nami sait pana gutan nenia, ne taxa faisok lapaana.”