Luuk 22 - A Turoxoian Fa'ui Sina Piran

¹ Faasilak naboxo a yaan ina Fenamo ina Bret A Piau Ta Yiis aava ri xalie pana Paaliuan, i taa savat.

² A mu paamua priis e mu rabuna ina fepitaa pana vuputkai, nari xapiak ri mataut sena malila e voxo ri vubuk rao ri taa punuk fun na Yesus.

Na Judas A Turoxo Pana Pet Lisanaan Na Yesus

³ E mui na Judas aava ri xalie pa Iskeriot, a saxa ti la palou ina mu yaamut sangafilu saxa pana taragua, na Setan a lam la xunus ina.

⁴ E voxo na Judas a falet e fe ferawai xuvul pana mu paamua priis e mu matalava aava ri faxatang a lifu lotu. Ri ferawai pana malaafaa i taa pet lisan na Yesus xe siri.

⁵ Nari, ri faamamaas e ri kuus o ri taa tatavai xe sina pana faat.

⁶ Na Judas a turoxo pana e seng xo ta salan xena pet lisanaan na Yesus xe siri talo rabuna ri taa vungut sena.

Na Yesus A Faigot Pana Nganaana Fenamo Ina Paaliuan

⁷ La fena Paaliuan a yaan ina punuk a sipsip xena fenamo a savat.

⁸ E na Yesus a feng na Pita nare Jon pana fefasaian aanabe', “Falet e fe faigotan a fenamo ina Paaliuan talo taara fexaxaas sena fangan.”

⁹ E re fine, “Maame taa faigotane faa?”

¹⁰ E nane sui nare, “Layaan me taxa laak la bina, saxa mataa aava i taxa yaas a mo ina raarum, i taa fasusui name, usie e laak lana lifu aava i taa laak lana

¹¹ e xuus a mataa tafuna lifu, ‘A Mataa ina Fepitaa i taxa fiai pana faa ta nobina ina nganaana Paaliuan xuvul pana mu yaamut siak?’

¹² E nane taa faxalit name pana nobina roxo e pave me taa faigotan a maana mo.”

¹³ Re falet e a maana mo a savat fexaxaas malaan se Yesus fo xuus nare pana e re faigotan a fenamo ina Paaliuan.

¹⁴ A yaan fatak xo a savat e na Yesus a nai la vepen sina la ivin xuvul pana mu yaamut.

¹⁵ Nane xuus nari, “Ne vubuk temasaat o ne taa fangan lana fenamo ina Paaliuan aanabe' xuvul pami paamuina maasaxan siak.

¹⁶ Senaso ne xuus nami, ne taa pife ngan fulan a fanganan malaan fefexaxaas taara taa fangan faxuvul fulaa la fatataganan sina Piran.”

¹⁷ E mui na Yesus a siak a lisa e fenung xe sina Piran pana e a kuus, “Siak a lisa ina wain aanabe' e fepatoxane la palou imi.

¹⁸ Ne xuus nami o ne taa pife num fulan a wain aanabe' fefexaxaas a yaan a fatataganan sina Piran i taa savat la matavas.”

¹⁹ E mui nane siak a nebret e fenung xe sina Piran pana e viaxe e tavai nari pana e a kuus, “Nabe' ve a vipin siak aava ne taxa tatavai pana xami. Usi a vilaana aanabe' xena lamon fa'uliau.”

²⁰ E lamina fanganan, nane tao a lisa ina wain e a kuus, “A lisa ina wain aanabe' a kuus turoxoian fa'ui sina Piran e ne taxa kuus turoxo sena pana ria iga aava i taa talatiu xami.

²¹ Taasaxa kaalum, a saxa aava i taa pet lisanau naboxo i taxa waan nabe' la palou itaara.

²² A Natuna Mataa i taa maat senaso a Piran xa fo lamon faati pana, taasaxa ne taxa muluk marasaxain a saxa aava i taa pet lisanau.”

²³ E mui ri fefiai xolai nase' tuuna ti la palou iri i taa vil a mo aanabe'.

A Fegagelaian Pana Nase' A Matalava

²⁴ A mu yaamut ri fegagelai o nase' ti la palou iri i taa matalava siri.

²⁵ E na Yesus a xuus nari, “A mu piran sina rabuna ri fuuna paamuian a rabuna pana gutan e a mu paamua pana tateaxan ri xalian pana ‘Fesing sina Rabuna’.

²⁶ Taasaxa vilaana aanabe' pife vilaana simi, piau! A matalava simi i taa malaan sena lak e a paamua simi i taa xakaavang malaan sena sisiak.

²⁷ Nase' a matalava? A saxa aava nai fangan o a saxa aava tigina faasilak xena sisiak xe sina? A mataa aava taxa nai fangan, bo? Taasaxa nenia, ne waan la palou imi malaan sena sisiak mon.

²⁸ Nami, mi fo waan xuvul paga lana matafanan siak.

²⁹ Na Tamaang a tavaiau pana ngavuk ina Memai e voxo ne fexaxaas ne taa tavai nami pana sait.

³⁰ E mi taa fangan e num la ivin lana fatataganan siak e vaxa mi taa nai la vena Memai xena tiisaana pabung sangafilu saxa pana taragua sina mu Israel.

Na Yesus A Kuus Famatavas Pana Faaxolusan Si Pita

³¹ “Saimon, Saimon, langai! Na Setan a vubuk rao i taa valam nano; i taa fepatoxan nano malaan sena kam e a xawa, a xavil ina i taa waan e a xavil ina no taa tapine.

³² Taasaxa ne fo fenung pama, Saimon, talo a namkaian siim i taa pife poxo. E layaan no ulaa xe siak, fagut a mu tiam.”

³³ Taasaxa na Pita a suie, “Memai, ne taa vipis e maat xuvul pama.”

³⁴ Na Yesus a suie, “Ne xuus nano, Pita, a pura taa pife taliskukuk lunai e no taa faaxolusanau faatalatul.”

³⁵ E na Yesus a fin nari, “Layaan ne feng nami xe la nu bina e mi piau ta faat o marapi o ʻslipaʼ, a maana mo simi a fexaxaas o piau?” E ri suie, “A fexaxaas.”

³⁶ E nane xuus nari, “Taasaxa naboxo, tamo no toxan ta faat, siaxe e taaxanum ta bi, e tamo no piau ta pinis, faasot pana marapi siim xena maraan taaxanum.

³⁷ A Xakalayan Taap a kuus, ‘Ri xalie pana mataa fafaasaal.’ Aisaia 53:12. A mo aanabe' i taa savat la matavas sega. Aang, a lagasai sega i taxa savat la matavas monabe' mon.”

³⁸ E a mu yaamut ri kuus, “Kaalum Memai, a toxan a pinis taragua.” E nane sui nari, “A fexaxaas.”

Na Yesus A Fenung Xuluna Put Olif

³⁹ Na Yesus a ta'ulan a bina e falet xe la Put Olif malaan sena vilaana sina e a mu yaamut sina ri usie.

⁴⁰ Layaan ri savat pave a xuus nari, “Fenung talo mi taa pife poxo lana tatafangan.”

⁴¹ Nane ta'ulan nari, taasaxa pife lasuun temasaat, e fe bukaak e fenung,

⁴² “Tamaang, tamo no vubuxane, siak tapin a lisa ina maasaxan aanabe' i taa savat xulok. Taasaxa pife vubuxanan siak i taa savat, a vubuxanan siim.”

⁴³ A angelo ti laa'ui la xunavata a savat xe sina e fagute.

⁴⁴ E lana mimilisaatan molava paaliu sina nane fenung faagut fulaa e a maxarafan sina, malaan sena ria, taxa poxo xe lapia.

⁴⁵ Nane fataxapin a fenungan sina e tamasiak e ulaa xe sina mu yaamut e fe tingin nari ri taxa matef senaso ri maagus pana mimilisaatan siri.

⁴⁶ Nane fin nari, “Senasou mi taxa matef? Para e mi fenung talo mi taa pife poxo lana tatafangan.”

A Pisaan Na Yesus

⁴⁷ La fena ferawaian sina a malila ri savat xuvul pa Judas, a saxa ti la palou ina mu yaamut sangafilu saxa pana taragua, e i taxa paamuianmaan nari. Nane sangasmaan xe si Yesus xena ngusaana.

⁴⁸ Taasaxa na Yesus a fine, “Judas, no taxa pet lisan a Natuna Mataa pana fengusan, bo?”

⁴⁹ Layaan a fefeng si Yesus ri xalum a so ta mo i taxa savat, ri kuus, “Memai, taara taa fevis pana pinis sitaara?”

⁵⁰ E a saxa a sip a sisiak sina priis lava e patal a tangana la pamuaan.

⁵¹ Taasaxa na Yesus a suie, “Mune.” E nane tao faroxoi a tangana sisiak aave.

⁵² E mui na Yesus a ferawai xe sina mu paamua priis, mu paamua sina rabuna ina faxatang a lifu lotu e mu matalava, nari xapiak aava ri savat xena pisaana e a kuus, “Mi filimaan pana tol e vam xena pisaan nenia malaan sena paamua ina rabuna mosaat paaliu, bo?

⁵³ La maana yaan xapiak ne waan xuvul pami la maana nobina pe la lifu lotu e mi pife pisau. Taasaxa yaan aanabe' a yaan simi, a yaan si Setan.”

Na Pita A Faaxolusan Na Yesus

⁵⁴ Ri pis na Yesus e ri lisan falaxe xe la lifu sina priis lava. Na Pita xo usi saa taasaxa waan lasuun famodak.

⁵⁵ A fata taxa raam la xunamalei e na Pita maa nai xuvul pari aava ri taxa nai maari.

⁵⁶ Layaan a saxa tefin sisiak a xalume taxa nai maari nane kaalum fatak xe sina e kuus, “A mataa aanabe' sait fuuna waan xuvul pana.”

⁵⁷ Taasaxa na Pita a faaxolus, “Tefin, ne vungut sena.”

⁵⁸ E mui fadak a xasafuna a xalume e fine, “Nano sait, no saxa siri, bo?” E na Pita a suie, “Au, nenia ve, ne piau.”

⁵⁹ A awa saxa a falet e xasafuna a kuusan faagutane, “A mataa aanabe' fuuna waan xuvul pana senaso nane ti Galili.”

⁶⁰ E na Pita a suie, “Au, ne vungut paaliu sena so ta mo no taxa ferawai pana.” La fatalatulaana faaxolusan sina a pura rawei.

⁶¹ A Memai a gilim e kaalum fatak xe si Pita. E mui na Pita a lamon fa'uli a ferawaian sina Memai sena: “A pura i taa pife rawei lunai e no taa faaxolusanau faatalatul.”

⁶² E na Pita a savat xe lamalei e taangiis faagut.

A Mu Rabuna Ina Fevis Ri Suaxan Na Yesus

⁶³ A rabuna ina fevis aava ri faxatang na Yesus, ri suaxane e ri sipe.

⁶⁴ Ri pis votan a matana pana marapi e ri kuus, “Mataa ina kuus fatuxai, xuus nemaam; nase' sip nano?”

⁶⁵ E ri suaxane pana xasano mo fulaa.

Na Yesus La Mata Pailat Nare Herot

⁶⁶ La paanen paaliu a mu matalava sina mu Juda e mu paamua priis e mu rabuna ina fepitaa pana vuputkai ri filimaan faxuvul e ri xel na Yesus xe siri.

⁶⁷ E ri kuus, “Tamo nano, no Krais, no Mataa Failai sina Piran, xuus fatexaas nemaam.” E na Yesus a sui nari, “Tamo ne xuus nami, mi taa pife namkai sega

⁶⁸ e tamo ne fin nami, mi taa pife suiau.

⁶⁹ Taasaxa ti la yaan aanabe' a Natuna Mataa i taa nai la pamuaan sina Piran pana Gutan Xapiak.”

⁷⁰ E nari xapiak ri fine, “Nano, no Natuna Piran?” E nane sui nari, “Mi kuus fatak layaan mi ferawai malaan.”

⁷¹ E mui nari, ri kuus, “Xenaso maam taa seng ta rabuna xena kuus fulaa? Maam fatak, maam fo langai a ferawaian sina.”