Luuk 18 - A Turoxoian Fa'ui Sina Piran

A Ferawaian Paap Pana Saxa Tefin Nakmaal Nare Na Mataa Ina Tiisan

¹ E mui na Yesus a ferawai paap xena fapiti nari talo ri taa fenung vulai e ri taa pife taxapus.

² Nane kuus, “La saxa bina a toxan a mataa ina tiisan aava pife mataut sena Piran e pife lamon faroxo sena mu rabuna.

³ E lana bina aave toxan a tefin nakmaal aava taxa lo savat xena fenung xe sina malaan, ‘Tiis faroxoiau xasena mu xaiyaas siak.’

⁴ “Pana maana yaan xaves nane pi lalangai sina tefin aave. Taasaxa nane mamaxus pana fenungan sina e a ilisai, ‘Naapalaan ne pife mataut sena Piran e ne pife lamon faroxo sena mu rabuna

⁵ ne taa xavang a tefin nakmaal aanabe' pana tiisan roxo talo i taa pife fasoraxau.’”

⁶ E a Memai a kuus, “Lalamon pana ferawaian sina mataa saat ina tiisan.

⁷ A Piran i taa xavang tuunei a mu rabuna sina layaan ri taangiis e fenung xe sina la maana yaan e vung sait, bo? I taa pife waan, waan, waan, xena xavangaan nari, bo?

⁸ Ne xuus nami o a Piran i taa tavai fatapusan nari pana xakaavangan sina. Taasaxa layaan a Natuna Mataa i taa savat fulaa naak i taa tingin a maana rabuna xaves aava ri taxa namkai o piau, bo?”

A Ferawaian Paap Pana Saxa Ferasi Nare Na Mataa Ina Siak Taakis

⁹ Na Yesus a ferawai paap malaanabe' xe sina saxano rabuna aava ri lamon o a faisok siri a xaradak e ri xalum fasivi a xasano rabuna

¹⁰ e a kuus, “A rovaat tomexaan re laak xe lana tang lifu lotu xena fenung xe sina Piran. A saxa mataa ve a Ferasi e a xasafuna ve a mataa ina siak taakis.

¹¹ A Ferasi aave a ti fenung pana xa malaan, ‘Piran ne kuus faasiroxo xe siim senaso nenia, ne pife malaan sena xasanofuna aava ri fenau o ri tamai xolai o ri vivil a saat e vaxa ne pife malaan sena mataa ina siak taakis aamove.

¹² Nenia, ne fuuna falfaal a yaan taragua ti lana yaan pisiguak e ne tatavai xe siim pana fasangafiluaana maana mo xapiak aava ne siaxe.’

¹³ “Taasaxa mataa ina siak taakis a tigina lasuun fadak. Nane tigina pana mangilan e pife kaalum xe laa'ui la xunavata. Nane sip a famarena e a kuus, ‘Piran muluxau, ne mataa saat.’

¹⁴ “Lavaxa, ne xuus nami o a mataa aanabe' ina siak taakis, nane sang mon a ta'ulan a lifu lotu pana luaian la xunus ina. Senaso nane aava lamon falavai nane xa, a Piran i taa lamon fasivie e nane aava lamon fasivi nane xa, a Piran i taa fatiginei fataxe.”

Na Yesus Xuvul Pana Mu Rafulak Modak

¹⁵ Saxano rabuna ri taxa lisan a mu rafulak siri xe si Yesus talo i taa tao nari. Layaan a mu fefeng sina ri xalume, ri baras nari.

¹⁶ Taasaxa na Yesus a xel a mu rafulak xe sina e a kuus, “Turoxoian a mu rafulak xena filimaan xe siak e muta ti votan nari senaso a fatataganan sina Piran ve siri.

¹⁷ Ne kuus tuuna, nase' ta mataa a pife namkai malaan sena lak dak, i taa pife waan lana fatataganan sina Piran.”

A Mataa Piran A Vubuxan A Toyan Xe Vulai

¹⁸ A saxa matalava a fine, “Mataa roxo ina fepitaa ne taa vil a so xena siak a toyan xe vulai?”

¹⁹ Na Yesus a suie, “Xenaso no xaliau pana mataa roxo? Pi ta mataa roxo, a Piran sang mon a roxo.

²⁰ No texaas sena mu vuputkai: muta femilungai pana vilaana ina tamaian, muta punuk mataa, muta fenau, muta kuus xakaavang bit e suai faagut se ninaam nare tamaam.”

²¹ E a matalava aave a kuus, “Nenia, ne fo vil malaan maane ti lana modaxan siak.”

²² Layaan na Yesus a langaie, a suie, “Saxa vilaana a malit lunai. Faasot pana maana mo xapiak siim e tavai a mu valagof pana faat ina e nano, no taa toxan a fafanaian xaves paaliu la xunavata. E mui, maa usiau.”

²³ Layaan a mataa aave a langaie, nane kanamsaat senaso nane ve a mataa piran pana fafanaian xaves paaliu.

²⁴ Na Yesus a kaalum xe sina e a kuus, “A mo lagaf paaliu layaan a mataa piran a vubuk waan lana fatataganan sina Piran Tuuna.

²⁵ A tuuna, a ‘kaamel’ aava tiir molava sena ʻhosʼ, a fexaxaas sena laak xe lana valof ina niil paamuina mataa piran i taa laak xe lana fatataganan sina Piran Tuuna.”

²⁶ Nari aava ri langaie ri fine, “Nase' a fexaxaas sena fakaxupan?”

²⁷ E na Yesus a sui nari, “A so ta mo a matatuuna a pife fexaxaas sena vile a Piran a fexaxaas sena vile.”

²⁸ Na Pita a xuuse, “Maam fo ta'ulan a maana mo simaam xena usiaan nano.”

²⁹ E na Yesus a kuus xe siri, “Ne kuus tuuna, nase' ta mataa a ta'ulan a lifu o tefin o mu tina o mu vasaana o mu rafulak sina xena vil a faisok sina Piran

³⁰ i taa siak a maana mo xaves naboxo lana yaan aanabe' e mui vaxa lana toyan vulai xe vulai.”

Na Yesus A Ferawai Fulaa Pana Maatan Sina

³¹ Na Yesus a xel patak a mu yaamut sangafilu saxa pana taragua sina e a xuus nari, “Taara taa laak xe Jerusalem e a maana mo aava mu rabuna ina kuus fatuxai fo kala pana sena Natuna Mataa, ri taa savat la matavas.

³² A mu rabuna aava ri pife Juda ri taa tao fatateaxe e ri taa sarak sena; ri taa kuusan pengane; ri taa xanuse; ri taa inise e ri taa punuxe.

³³ E la fatalatulaana yaan i taa to fa'ulaa.”

³⁴ A mu fefeng aave ri pife masam pana ferawaian aanabe' senaso a malasuf ina a funan xaseri e a lamonan siri a sotuk.

Na Yesus A Vil Faroxoi A Mataa Piif La Salan Xe Jeriko

³⁵ Layaan na Yesus taxa savatmaan pe Jeriko, a saxa mataa matana piif taxa nai la xasing ina salan. E i taxa fenung faat o xasano mo.

³⁶ Layaan nane langai a ling ina malila aava ri taxa sangas et, nane fiai ri taxa so.

³⁷ E ri xuuse, “Na Yesus ti Nasaret i taxa filimaan.”

³⁸ E nane xukulai, “Yesus, Lak si Devit, muluxau.”

³⁹ Nari aava ri sangas paamuin a malila, ri barase e ri xuuse o i taa nai kasam. Taasaxa nane xukulai faagut maan, “Lak si Devit, muluxau.”

⁴⁰ Na Yesus a tigina e a xuus faagutan a rabuna o ri taa lisanmaane. Layaan a maa savat faasilak la tana, na Yesus a fine,

⁴¹ “No vubuk rao ne taa vil a so xaanum?” E nane suie, “Memai, ne buk kaalum.”

⁴² Na Yesus a xuuse, “Monabe' mon kaalum. A namkaian siim fo vil faroxoi nano.”

⁴³ Fataapus nane fexaxaas sena kaalum e a usi na Yesus e i taxa lo kuus fati a isina Piran. Layaan a mu rabuna ri xalume, nari vaxa ri kuus fati a isina Piran sait.