Luuk 17 - A Turoxoian Fa'ui Sina Piran

A Maana Vilaana Ina Faasaalan Ri Taa Waan

¹ Na Yesus a kuus xe sina mu fefeng sina, “A maana mo xaves xena fafaasaal a mu rabuna ri taa savat, taasaxa muluk a mataa aava fasavate.

² A mataa aave i taa mimilisaat temasaat tamo i taa vil fafaasaal a saxa lak modak. A mo roxo ri taa xiute pana faat matafan e tapine la laman.

³ Faxatang faroxoi nano xa. “Tamo na tiam a faasaal, barase e tamo a puk tapin nane xa xasena vilaana saat sina, lamon tapine.

⁴ Tamo, lana yaan saxa, i taa bilai fasaat fapisiguak xe siim e i taa ulaa fapisiguak xe siim e kuus, ‘Ne muluk a vilaana saat siak.’ Lavaxa, no lamon tapine.”

⁵ A mu yaamut ri kuus xe sina Memai, “Memai, falavai a namkaian simaam.”

⁶ Nane sui nari, “Tamo a namkaian simi a molava malaan sena fomirak kam ina mastaat, a fexaxaas mi taa kuus xe sina wai aanabe', ‘Put tapin nano xa e no fe boak la laman’ e i taa langai nano.

A Faisok Sina Mu Rabuna Sisiak

⁷ “Lalamon faagut! Saxa mataa a toxan a mataa faisok aava fuuna faisok la uma o faxatang a mu sipsip sina. Layaan a mataa faisok aave i taa savat, no lamon o a mataa tafuna taa ferawai xe sina malaan, ‘Filimaan, nai e no fangan.’ Piau!

⁸ I taa ferawai malaan, ‘Faigotan a fanganan xaanak, tamasiak e no lisanmaan a fanganan xe siak e lamina bak no taa fangan e num.’

⁹ Naak i taa kuus faasiroxo xe sina mataa faisok sina senaso a vil a faisok sina? Piau!

¹⁰ E layaan mi fataxapin a maana faisok aava ri xuus nami pana vesanaana, mi taa kuus, ‘Maam pife mu rabuna faisok roxo temasaat senaso maam fo vil a faisok simaam mon e piau ta mo fulaa.’”

A Mataa Sangafilu Pana Tapak Ri Savat Roxo Fulaa

¹¹ Lana sangasan sina xe Jerusalem, na Yesus a falet la itina fafalas la palou i Sameria e Galili.

¹² Layaan i taxa laak la saxa bina, a mu rabuna tomexaan sangafilu a tari tapak, ri maa fesuaiane. Ri tigina lasuun famodak

¹³ e ri taxa xukulai faagut, “Yesus, Memai, muluk nemaam!”

¹⁴ Layaan nane xalum nari, a kuus, “Falet, faxalum a mu priis pana tami.” E lana faletan siri, a tari feroxo.

¹⁵ Saxa la palou iri, layaan a xalum a roxoian sina, a ulaa e maa kuus fati a isina Piran pana ling molava.

¹⁶ A tapiit turung la ka Yesus e kuus faasiroxo xe sina e nane ve a mataa ti Sameria.

¹⁷ Na Yesus a fiai, “Ne lamon o a mataa sangafilu ve tari tapak e ri fo roxo. A xasanofuna ri paan xe faa?

¹⁸ A saxa mon a ulaa xena kuus fati a isina Piran e nane ve a mataa topen, bo?”

¹⁹ E a xuuse, “No falet, a namkaian siim fo vil faroxoi nano.”

A Filimaanan Sina Fatataganan Sina Piran

²⁰ Saxa yaan a mu Ferasi ri fine pana fatataganan sina Piran taa savat laso, e na Yesus a sui nari, “A fatataganan sina Piran i taa pife savat la matavas. I taa pi ta fakalimaanan talo a rabuna ri taa xalume

²¹ senaso a fatataganan sina Piran taxa waan la xunus imi. Pi ta rabuna ri taa kuus o ‘I taxa waan nabe'’ o ‘I taxa waan pave.’”

²² E mui a xuus a mu fefeng sina, “A yaan taa savat layaan mi taa vubuk xalum a filimaanan sina Natuna Mataa taasaxa mi taa pife xalume.

²³ A rabuna taa xuus nami, ‘I taxa waan pave!’ o ‘I taxa waan nabe'!’ Muta fala xolai xena xalum nari.

²⁴ A filimaanan sina Natuna Mataa i taa savat malaan sena yaamit. I taa rarapak e famalang a xunavata xapiak, ti paa xe kol.

²⁵ Taasaxa paamua, i taa maasak faagut lapaana maana mo xaves e a mu rabuna ti tanin ri taa tisuie.

²⁶ “A mu yaan sina Natuna Mataa ri malaan sena yaan si Noye'.

²⁷ A mu rabuna lana yaan aave ri pife tamasiak: ri fangan, num e ri tamai. Ri taxa lo fetamai fefexaxaas a yaan na Noye' laak xe lana xaati aava malaan sena lifu. La yaan aave a ulim molava piis a savat e faxarak xapin nari xapiak aava ri taxa waan lamalei.

²⁸ “Lana mu yaan si Lot a malaan vaxa. A mu rabuna ri taxa fangan e num, mamareiai e faasot, kaapis e vavesai.

²⁹ Taasaxa lana yaan na Lot a ta'ulan na Sodom, a fata e salfa re poxo sivi ti laa'ui malaan sena raafui e kawaasan xapin nari xapiak.

³⁰ “E a mu rabuna ti tanin vaxa ri taa pife tamasiak la yaan a Natuna Mataa taa savat la matavas.

³¹ Lana yaan aave a mataa aava taxa waan laa'ui la putuna lifu sina, i taa pife sivi e laak xe la lifu xena siak faxuvul a maana mo sina. E a mataa aava taxa faisok la uma vaxa i taa pife ulaa xe la bina xena siak faxuvul a maana mo sina.

³² Lamon fa'uli a tefin si Lot.

³³ Nase' ta mataa a vubuk tao fatateak a toyan sina nabe' la xavala, i taa pi ta toyan vulai xe vulai. E nase' ta mataa i taa lamon fepalauan a toyan sina nabe' i taa siak a toyan vulai xe vulai.

³⁴ Ne xuus nami o la vung aave layaan ro mataa taxa matef la ivin saxa; saxa i taa malit e saxa i taa waan.

³⁵ A ro tefin aava re taxa mimit a mu kam; saxa i taa malit e saxa i taa waan.”

³⁶ [A rovaat aava re taxa faisok la uma; saxa i taa malit e saxa i taa waan.]

³⁷ E ri fine, “I taa savat faa, Memai?” E nane sui nari, “Laso ta bina aava toxan a mamaat a mu kor ri taa faxuvul lana.”