Hibru 8 - A Turoxoian Fa'ui Sina Piran

Na Yesus A Memai Priis Sitaara Lana Faxuvulan Sina Piran

¹ A malasuf ina maana ferawaian siak a malaan: taara toxan a Memai Priis xataara e nane taxa nai la pamuaan sina Piran Peraroxo xuluna ivin sina pe la xunavata.

² E nane taxa vil a faisok ina Memai Priis lana Tang Lifu Lotu Taap. A nobina aave a Piran sang mon fo vesane o i taa nobina tuuna ina naangusan.

³ A rabuna ri fo bur a maana memai priis xapiak talo ri taa tatavai xe sina Piran pana meska ina mu tiir e pana xasano tatavaian. E a Memai Priis sitaara vaxa i taxa tatavai pana saxa tatavaian sait.

⁴ Tamo i taxa waan nabe' la xavala, nane pife fexaxaas sena vil a faisok sina priis senaso a toxan a maana priis lapaana vuputkai si Moses aava ri fuuna tatavai pana mu tatavaian.

⁵ A faisok sina priis aave a xaxaalua mon; ri taxa pok a faisok tuuna aava waan la xunavata. A lamonan aanabe' a malaan sena ferawaian sina Piran xe si Moses. Layaan nane tangpat pana faigotan a maana mo ina Lifu Marapi ina Turoxoian a Piran a xuuse: “Faxatang faroxo, no taa usi fatak a xaxaalua aava ne fo faxalit nano pana layaan no waan pave xuluna put.” Ta'ulanan 25:40.

⁶ Taasaxa naboxo, na Yesus fo siak a faisok ina priis aava molava paaliu seri, a malaan sena kuus turoxoian aava nane fo fataxe xuvul pana Piran a molava paaliu sena kuus turoxoian siri, senaso a Piran fo kuus fanai pana maana mo roxo paaliu lapaana kuus turoxoian sina.

⁷ Tamo a kuus turoxoian ti kavai a fexaxaas sena vil fasavat a maana vilaana xaradak paaliu, a Piran i taa pife siak fati a xasa kuus turoxoian fulaa lamina, bo? Taasaxa kuus turoxoian aave pife fexaxaas.

⁸ E voxo a Piran i taxa kasalan a mu rabuna sina layaan nane ferawai malaan: “A Piran a kuus: A mu yaan ri taxa filimaan layaan ne taa fatiginei a turoxoian fa'ui xuvul pana mu rabuna Israel e xuvul pana mu rabuna Juda.

⁹ A turoxoian aave i taa pife malaan sena turoxoian aava ne fo xuus a mu buri pana layaan ne tao a mari e ne paamuian nari ti Isip. Nari, ri pife usi fatak a turoxoian aava ne xuus nari pana e voxo ne ta'ulan nari.”

¹⁰ Taasaxa sena mu yaan aava taa filimaan, a Piran a kuus: “Ne taa fatiginei a turoxoian aanabe' xuvul pana mu rabuna Israel: Ne taa timin a mu vuputkai siak lana lamonan siri e ne taa xaleie la xunus iri. Ri taa nangusau sang mon. Senaso ri taa waan rabuna siak e nenia, ne taa Piran siri.

¹¹ E piau ta mataa i taa faisok pana fapiti a xasanofuna paga e ri taa pife faxaar a xasanofuna pana: ‘Texaas faagut sena Piran.’ Senaso nari xapiak ri taa texaas sega, nari mu mataa palau e nari mu matalava e mu memai vaxa.

¹² Ne taa lamon tapin a mu vilaana saat siri e ne taa pife lamon fa'uli a mu milungan siri.” Jeramaia 31:31-34.

¹³ Layaan nane ferawai pana turoxoian fa'ui a Piran a kuus o saxa aava waan paamua ve a mo ti kavai e mi texaas o a mo ti kavai aava fo maiyang e fo xares, i taa pife waan pana yaan xaves e faasilak i taa malit.