Hibru 2 - A Turoxoian Fa'ui Sina Piran

A Piran Rao I Vil Falavai A Namkaian Sina Rabuna

¹ A mo aanabe' a mo tuuna e voxo taara taa tao fatateak a maana ferawaian tuuna aava taara fo langaie talo taara taa pife kais patak sena namkaian sitaara.

² A mu vuputkai aava mu angelo ri fo kuusan fasavate xe sina mu butaara, ri tuuna paaliu. E nase' ta mataa pife usie o langai pesalai sena, i taa siak a maana fakasanaman aava mu vuputkai fo ferawai pana.

³ E netaara vaxa, tamo taara taa langai pesalai sena fakaaxupan lava, taara taa sinuf sena fakasanaman malaafaa? A Memai xa, fo kuusan fasavat a fakaaxupan aanabe' paamua e nari aava ri langaie, ri fo faxalit famatavas netaara o a ferawaian aave a tuuna.

⁴ E la yaan fatak aave pana fangaasixan siri, a Piran a faxuvul a fakalimaanan sina, a fakalimaanan naang ve a malaan: a mu faisok ina gutan, maana mo fa'ipul e tavaiaana mu rabuna pana tatavai ina Vovau Xaradak fexaxaas sena vubuxanan sina.

A Piran A Siak Fati A Memai Sitaara

⁵ A Piran pife siak fati a mu angelo xena paamuian a xavala fa'ui aava i taa savat, a xavala aava maam taxa ferawai sena, piau.

⁶ Taasaxa malaan sena ferawaian aava waan la saxa nobina pe lana Xakalayan ti Kavai: “Piran, a so ta mo ve a mataa e no taxa lamon sena? A mataa ve a so ta mo e no taxa muluxe?

⁷ No fo timine lapaana mu angelo pana saxanu yaan, e mui no bure pana isin lava e pana miridingan.

⁸ E no fatie talo i taa paamuian a maana mo xapiak aava no fo vesane.” Yanganan 8:4-6. Lavaxa, i taxa ferawai o a Piran fo siak fati a mataa xena ti paamuian a maana mo xapiak, e voxo a matavas paaliu o i taxa ferawai xasingit sena maana mo xapiak marasaxa. Taasaxa, taara pife xalum ta mataa taxa paamuian a maana mo xapiak naboxo, bo?

⁹ Taasaxa taara taxa xalum na Yesus, nane aava Piran fo timine lapaana mu angelo pana saxanu yaan talo lapaana xakaavangan xatam sina Piran nane fo maat xana mu rabuna xapiak. E naboxo taara taxa xalume i taxa tigina, fo buran pana malangan e pana isin lava senaso nane fo siak a maasaxan ina maatan.

¹⁰ A mo roxo a Piran aava vesan a maana mo xapiak e taxa lo vil fafa'ui nari, a vil faxaradak na Yesus pana maasaxan xena xel a maana mu natuna Piran talo ri taa waan faxuvul lana malangan sina. Senaso na Yesus ve a saxa aava i taxa lisanmaan nari xena fakaxupaan nari.

¹¹ Nane taxa gon fatak a rabuna sena vilaana saat siri e nane xuvul pari aava nane fo gon fatak nari, a Tamari a saxa. E voxo na Yesus pife mangil sena xali nari pana mu fetinan.

¹² Nane taxa kuus xe sina Piran: “Ne taa xuus fatexaas a mu fetinan siak pana isaam e a so ta mo no fo vile. Ne taa kuus fati a vilaana siim la palou ina faxuvulan siri.” Yanganan 22:22.

¹³ E a kuus fulaa: “Ne taa timin a lamon fanaian siak xuluna Piran.” Aisaia 8:17. E vaxa a kuus fulaa sait: “Kaalum, nenia naboxo xuvul pana mu rafulak aava Piran fo tavaiau pana.” Aisaia 8:18.

¹⁴ A rafulak sina Piran ri rabuna tuuna pana meska e ria e voxo na Yesus xa fewaan malaan seri e toxan a meska e ria ina mataa tuuna sait. Nane vil malaane talo pana maatan sina i taa kawaasan xapin a faisok si Setan aava toxan a gutan ina maatan.

¹⁵ Pana maatan sina, na Yesus a mulus nari aava ri yaasok si Setan la maana yaan ina toyan siri senaso ri matautan a maatan.

¹⁶ A mo aanabe' a matavas paaliu: na Yesus pife fangasik a mu angelo. Taasaxa malaan sena Xakalayan ti Kavai taxa kuus: “Nane taxa xavang a mu bu Abrahem.”

¹⁷ A malasuf ina a malaan: nane waan fexaxaas paaliu malaan sena mu fetinan lana taagulan xapiak siri e voxo i taa usi fatak a Piran e i taa bas pana mamaaluxan talo i taa savat memai priis siri. Pana vilaana aanabe' i taa vil a faisok sina Piran talo Piran i taa pife marala e i taa lamon tapin a vilaana saat sina mu rabuna.

¹⁸ E naboxo na Yesus a fexaxaas sena fangasik nari aava na Setan taxa valam nari pana vilaana saat, senaso na Yesus fo waan lapaana maasaxan e vil penganan e na Setan fo valame pana vilaana saat.