Hibru 10 - A Turoxoian Fa'ui Sina Piran

Na Krais A Tatavai Faasaxa Mon

¹ A Vuputkai si Moses ri pife xaxaalua xurul e fatak sena maana mo tuuna; ri malaan sena mu xaxaalua xares mon ina maana mo roxo aava ri taa savatmaan lumui. A mu memai priis ri fuuna tatavai vulai pana maana buk tiir la maana mariaas xapiak, taasaxa mu tatavai aave ri pife fexaxaas sena vil faxaradak a mu rabuna aava ri vubuk waan xuvul pana Piran?

² Tamo a mu tatavai aave ri fexaxaas sena gon tuunei a mu rabuna sena mu faasaalan siri, nari aava ri nangus a Piran ri taa pife nasam o ri taxa vupuno lunai, bo? Tamo ri pife vupuno lavaxa, a mu tatavai aave ri taa taxapus.

³ Taasaxa piau; a maana tatavai aave ri taxa falalamon fa'uli a mu rabuna pana maana faasaalan siri la maana mariaas xapiak aava taxa filimaan.

⁴ Senaso a ria ina mu bulmakau e meme pife fexaxaas sena gon tapin tuunei a mu faasaalan sina rabuna, piau paaliu.

⁵ E lapaana lalamonan aanabe' layaan na Krais fo faigotanan xena savatmaan la xavala, nane xuus a Piran malaan: “No pife vubuxan a mu falfaalan e mu tatavai, piau. Taasaxa no fo faigotan a vipin xaanak.

⁶ No pife faamamaas temasaat pana mu tiir aava ri faram xapine xuluna ivin ina faraaman e no pife faamamaas pana mu tatavai xena gon tapin a mu faasaalan.

⁷ Taasaxa mui nenia, ne kuus, ‘Nenia nabe' Piran, xena usi a vubuxanan siim, malaan se' ri fo xaleie sega lana xakalayan ina mu Vuputkai.’” Esra 6:2; Jeramaia 36:2; Yanganan 40:6-8.

⁸ Paamua nane kuus o, “No pife vubuxane e no pife faamamaas pana mu falfaalan e mu tatavaian e pana mu tiir aava ri farame xuluna ivin ina faraaman o pana mu tatavai xena gon tapin a mu faasaalan.” Nane kuus malaan naapalaan ri taxa lo usi fatak a maana Vuputkai layaan ri tatavai pana mu tiir aave.

⁹ E mui nane kuus, “Nenia nabe' Piran, xena usi a vubuxanan siim.” Xalume, a Piran a vil tapin a vilaana ti kavai pana mu tatavai e nane timin a tatavai i Krais lana nobina siri.

¹⁰ Senaso na Yesus Krais a vil faxa'usi a maana vubuxanan sina Piran xana. A tatavai fatak sina aava nane vil faasaxaine mon xe vulai pana vipin sina, fo gon fatak netaara sena lalosaat ina vilaana saat.

¹¹ A mu priis sina mu Juda ri taxa lo vil a faisok ina priis la maana yaan xapiak e ri taxa tatavai faaxaves, taasaxa mu tatavai aave ri pife fexaxaas sena gon tapin a mu faasaalan.

¹² Taasaxa na Krais a tatavai faasaxa mon pana toyan sina xena gon tapin a faasaalan e a tatavai aave i taa tigina fatak xe vulai, vulai. E lamina tatavai sina nane fe nai la pamuaan sina Piran.

¹³ E naboxo nane taxa nai bang a yaan a Piran i taa timin a mu xaiyaas sina lapaana kana malaan sena mo ina vaapaas.

¹⁴ Lavaxa, pana tatavai saxa aave, nane fo vil fatak nari aava ri fasufan sena vilaana saat siri e a fasufan siri taxa waan tanin e xe vulai, vulai.

¹⁵ E Vovau Xaradak sait taxa kuus xakaavang sena xe sitaara. Paamua a kuus:

¹⁶ A Piran taxa kuus: “Nabe' ve a kuus turoxoian aava ne taa fasavate xuvul pari la mu yaan aave ri taxa savatmaan: Ne taa timin a mu vuputkai siak la xunus iri e ne taa xaleie lana lamonan siri.” Jeramaia 31:33.

¹⁷ E mui a kuus fulaa: “Ne taa pife lamon fa'uli a mu faasaalan o a mu vilaana saat siri fulaa.” Jeramaia 31:34.

¹⁸ Lavaxa layaan i taa lamon tapin a faasaalan siri a tatavai xena gon tapin a faasaalan a mo palau mon.

A Mu Fefasaian E Mu Pebukaian Taara Taa Savat Xe Sina

¹⁹ Lavaxa netaara, mu fetinan, taara fexaxaas sena laak fatak lana Nobina Taap Xasingit. Piau ta saxa fexaxaas sena ti votan netaara senaso a ria i Yesus fo kas a salan xe lana.

²⁰ Nane fo kas a salan fa'ui xataara, a salan ina toyan, xena laak liu a marapi taap aava taxa tofai; nane vil malaane layaan a tatavai pana vipin sina.

²¹ E voxo taara toxan a xataara Memai Priis Lava aava taxa paamuian a Tang Lifu Lotu sina Piran pe laa'ui la xunavata.

²² E taara taa falet faasilak xe sina Piran pana lamonan tuuna e namkaian fatak, e pana xunus itaara saxa saxa aava ri tamulus sena nasaman vupuno e a mu vipin sitaara fo fasufan pana raarum roxo e fatak.

²³ Taara taa tao fatateak a lamon fanaian aava taara kuusan fasavate, senaso taara texaas o a Piran i taa tamana vil fasavat a kuus fanaian sina.

²⁴ Taara taa lamon faagut pana vilaana ina fasavat a mu vilaana ina roxoyan e vubuxan xasingitan la palou itaara.

²⁵ E muta ta'ulan a vilaana ina faxuvulan xena lotu malaan sena saxanofuna. Taasaxa taara taa faxaar faagutan netaara xa senaso taara texaas o a Yaan ina Savatan sina Memai i taxa filimaan faasilak.

²⁶ Langai! Tamo taara taxa lo lamon pana vil a saat lamina yaan taara fo texaas sena tuunayan, piau ta tatavaian fulaa aava fexaxaas sena gon tapin a faasaalan sitaara.

²⁷ Taasaxa taara taa nai bang mon pana matautan fefexaxaas sena Yaan ina Tiisan taa savatmaan pana fata mosaat aava i taa kawaasan xapin a mu rabuna xapiak aava ri xaiyaasan a Piran.

²⁸ Lamon pana mo aanabe': Nase' ta mataa a laxao a Vuputkai si Moses, layaan a mataa taragua o talatul, ri xalume e ri kuusan fasavat a vilaana saat sina, nari mu matalava ri taa tiise tamo nane vupuno o piau. E tamo a vupuno ri taa punuxe pana piau ta mamaaluxan.

²⁹ Malaafaa bak sena mataa aava i taa paas fasivi a isina Natuna Piran? E malaafaa sait sena mataa aava i taa lamon o a ria i Yesus aava tatavai ina turoxoian sina Piran, a mo palau o a mo ina lalosaat? A ria aave fo gon fataxe e naboxo i taxa suaxane o kuus pengan a Vovau ina Xakaavangan Xatam. Lamon pana fakasanaman molava piis aava i taa savat xuluna mataa aave.

³⁰ Senaso taara texaas sena saxa aava fo kuus: “Nenia, ne taa suie. Ne taa lisan fa'uli a saatan xe sina.” Vuputkai 32:35. E nane vaxa kuus fulaa: “A Piran i taa tamana tiis a rabuna sina.” Vuputkai 32:36.

³¹ Ai, layaan no taxa waan lapaana fakasanaman sina Piran aava to, a mo aanabe' a mo ina matautan molava paaliu.

³² Taasaxa lamon fa'uli a mu yaan simi aava ri fo falet xo. La mu yaan aave a miridingan sina Piran a savat xulumi e mi waan fatateak lapaana mu matafanan molava.

³³ E saxano yaan a mu rabuna ri kuusan pengan nami e ri vil famasak nami la matana mu rabuna. E saxano yaan mi waan xuvul pari aava ri taxa siak a buk matafanan malaan semi.

³⁴ Mi fo nasam a maasaxan sina mu timi aava ri taxa waan lana vipis e layaan a xasano rabuna ri gei tapin a maana mo simi, mi faamamaas senaso mi texaas o mi toxan a maana mo roxo sena maana mo aave ri taxa waan vulai.

³⁵ Lavaxa, muta lamon fepalau pana lamon fanaian simi, a lamon fanaian aave i taa lisanmaan a sepirigus molava.

³⁶ Senaso mi taa waan fatateak xena vil a vubuxanan sina Piran talo mi taa siak a maana mo nane fo kuus fanai pana.

³⁷ A malaan sena Xakalayan ti Kavai a kuus: “Famodak fulaa e nane aava i taa filimaan i taa savat e i taa pife sovut.

³⁸ A mu rabuna pana vilaana fatak siak ri namkai e voxo ri taa to. Tamo ta saxa iri i taa faatasu e puk tapin nane xa xasega, a xunus iga i taa pife faamamaas pana.” Habaakak 2:3-4.

³⁹ Taasaxa netaara xa, taara pife rabuna ina faatasu xena kawaasanan, piau! Taara mu rabuna pana namkaian e taara taxa waan lapaana fakaaxupan sina Piran.