Hibru 1 - A Turoxoian Fa'ui Sina Piran

A Namkaian Se Krais A Mo Pelalava Marasaxa A Ferawaian Sina Piran I Taxa Waan Lana Natuna

¹ Lana maana yaan xaves e pana maana vilaana xaves la mu yaan ti kavai a Piran fo ferawai xe sina mu butaara la ngusuna mu rabuna ina kuus fatuxai.

² Taasaxa lana mu yaan aanabe' xo taxa falet, nane fo ferawai xuvul pataara la ngusu Natuna. Se Natuna aave mon, a maana mo xapiak la xavala e la finavata fo vesanan pana gutan sina Piran. E a Piran a siak fatie vaxa xena tavaie pana maana mo xapiak.

³ Nane sang mon i taxa faxalit a miridingan sina Piran; a maana mo xapiak sina e maana mo sina Piran ri fexaxaas. E pana gutan ina ferawaian sina nane taxa lo tao fanei fatateak a maana mo aava nane fo vesane. E lamina yaan nane fo siak a lamon tapinan sena vilaana saat xana mu rabuna xapiak, nane laak xe la xunavata e fe nai la pamuaan sina Piran pana Maana Gutan Xapiak.

A Isikiel Natuna A Pelalava Sena Mu Angelo

⁴ Na Natuna a pelalava seri mu angelo malaan sena isin aava Piran fo fa'isine pana, a molava seri. Xe sise' ta angelo ve a Piran fo xuuse: “Nano, no Lak Tomexaan siak. Tanin nenia, ne Tamaam.” Yanganan 2:7.

⁵ E a Piran a pife ferawai sena saxa angelo o: “Nenia, ne taa Tamana e nane, i taa Natuk.” 1 Xuuskuus 17:13; 2 Saamwel 7:14.

⁶ Piau! Taasaxa layaan a Piran rao i feng a Lak Tuaan sina xe nabe' la xavala nane ferawai malaan: “A maana angelo sina Piran ri taa nanguse.” Vuputkai 32:43.

⁷ E sena mu angelo a Piran fo kuus malaan: “A mu angelo sina Piran ve, ri mu sisiak sina e ri fexaxaas malaan sena reref, ri malaan sena radaam ina fata.” Yanganan 104:4.

⁸ Taasaxa se Natuna naboxo, a Piran fo kuus: “A fatataganan siim Piran, i taa waan vulai xe vulai. No taa paamuian a mu rabuna siim pana roxoyan.

⁹ No fuuna vubuxan a maana mo xapiak aava roxo e no baian a maana mo xapiak aava saat. E voxo Piran, a Piran siim, fo siak fati nano e nane tavai nano pana faamamaasan senaso nane fo bur nano pana ngavuk aava pelalava sena ngavuk aava nane tavai a xasanofuna pana.” Yanganan 45:6-7.

¹⁰ E nane kuus fulaa: “Nano Memai, la tangpat no fo vesan a xavala e maana mo xapiak xuluna e pana maam no fo vesan a finavata e maana mo xapiak lana.

¹¹ E a maana mo aave ri tafe malit, taasaxa nano xo, no taa waan. Nari, ri tafe xavai malaan sena mu marapi.

¹² Nano Piran, no taa pulum nari malaan sena marapi xavai o no taa xul nari malaan sena mataa taa xul a marapi sina. Taasaxa no pi xuxul, no taxa waan fatak vulai e a toyan siim i taa pife taxapus.” Yanganan 102:25-27.

¹³ A Piran pife xuus ta saxa angelo o: “No maa nai nabe' faasilak la pamuaan iga fefexaxaas sena yaan ne taa timin a maana xaiyaas siim lapaana kaam malaan sena mo ina vaapaas.” Yanganan 110:1.

¹⁴ A so ta mo ve mu angelo? Nari ve ri mu vovau aava ri sisiak sina Piran. E nane taxa feng nari xena xavang a mu rabuna aava ri taa siak a fakaaxupan sina.