Faisok 4 - A Turoxoian Fa'ui Sina Piran

A Mu Memai Ina Lotu Juda Ri Kuus Votan Na Pita Nare Jon Sena Fepitaa Pa Yesus

¹ Saxano paamua ina lotu Juda xuvul pana memai keptin sina mu rabuna ina faxatangaana tang lifu lotu e saxano Sedusi sait, ri savat si Pita nare Jon layaan na Pita taxa ferawai xe sina mu rabuna.

² Nari, ri marala senaso a rovaat naang re taxa lo fapiti a mu rabuna pa Yesus e to fa'ulaian ti la maatan sina. E vaxa re xuus a malila o a mu rabuna taa to fa'ulaa lamina maatan siri senaso na Yesus a to fa'ulaa.

³ Nari mu matalava aave ri marala faagut e ri yot na Pita nare Jon. Taasaxa ngaas faasilak i rul e voxo ri timin nare lana lifu ina vipisan fefexaxaas a yaan mui.

⁴ Taasaxa maana rabuna xaves, faasilak 5,000, ri langai se Yesus e ri namkai.

⁵ A yaan mui, a mu paamua e mu matalava xuvul pana mu rabuna ina fepitaa pana vuputkai sina Piran, ri faxuvul pe Jerusalem.

⁶ Na Aanas, a memai priis, a taagul pave, e na Kaiafas, Jon e na Aleksanda e saxano tau Aanas, ri taagul pave sait.

⁷ Nari, ri xel fasavat na Pita nare Jon e re maa tigina lanori la bina ina tiisan. Re tigina pave e saxano tau Aanas ri fin nare, “Me vil faroxoi a maalapen aanabe' malaafaa? Pana so ta gutan? Lapaana gutan ina isise'?”

⁸ Na Pita, pana gutan sina Vovau Xaradak, a sui nari, “Nami, mu paamua sina rabuna e mu memai,

⁹ tanin, mi taxa xel fatiginei nemaame sena faisok roxo maame fo vile sena maalapen aanabe' e mi taxa fin nemaame, ‘Nane naboxo a roxo malaafaa?’

¹⁰ Lavaxa, maame vubuk o nami e mu rabuna xapiak ti Israel, mi taa texaas o mi fo punuk na Yesus Krais ti Nasaret, taasaxa Piran a fatatoi fa'ulie ti la maatan. E lapaana gutan si Yesus naboxo a mataa naang taxa tigina la matami e fo roxo xapiak.

¹¹ A xakalayan sina Piran a ferawai pa Yesus malaan layaan i taxa kuus pana newai: “‘Nami mu rabuna ina vavesai, mi baian a wai aave taasaxa a Piran fo famati fa'ulie la vepen ina pungan fataxapiak.’ Yanganan 118:22.

¹² Pi ta xasa mataa fulaa a fexaxaas sena fakaxup netaara, na Yesus sang mon. A Piran a siak fatie xena fakaxup netaara e nane sang mon a salan ina roxoyan.”

¹³ Layaan ri xalum na Pita nare Jon re pife mataut, ri ipulan a vilaana sire senaso ri texaas o nare, re pi ta texaasan, re rovaat palau mon. E mui, ri lamon fa'uli a rovaat aave o re fo waan xuvul pa Yesus.

¹⁴ E vaxa ri xalum a mataa tamu maalapen taxa tigina lanori e ri matakasam palau mon.

¹⁵ E voxo, ri feng nare xe lamalei talo ri taa ferawai faxuvul.

¹⁶ Ri fefiai, “Taara taa vil a so pana rovaat aanabe'? A mu rabuna xapiak pe Jerusalem ri texaas sena mo fa'ipul molava re fo vile e taara pife fexaxaas sena kuus o a bitan.

¹⁷ Taara baian a xasanofuna ri taa langai sena. Lavaxa, taara taa kuus bukan nare talo re taa pife ferawai fulaa pana isi Yesus.”

¹⁸ E bak, ri xel fulan nare e ri fasei faagutan nare o re taa muta ferawai o fepitaa fulaa pana isi Yesus.

¹⁹ Taasaxa na Pita nare Jon re sui nari e re kuus, “La matana Piran, nami sang mi lamon faati o a peraroxo naak, maame taa langai simi e pife sina Piran?

²⁰ Maame taa lo ferawai pana maana mo xapiak maame fo xalume e langaie.”

²¹ Fulaa, a mu paamua ri fasei faagutan nare e mui, na Pita nare Jon re ta'ulan nari. Ri pife lamon pana fakasanamaan nare senaso a mu rabuna ri kuus faasiroxo xe sina Piran pana faisok roxo nane fo vile

²² senaso a mataa tamu maalapen a toxane pana mariaas sangafilu talafaat.

A Mu Rabuna Aava Ri Namkai Ri Fenung

²³ Layaan na Pita nare Jon re ta'ulan a mu paamua aave, re fe xuus fatexaas a mu fesing sire pana fefasaian sina mu memai priis e mu matalava.

²⁴ Layaan ri langaie, a xunus iri a faxuvul e ri fenung xe sina Piran e ri kuus, “Piran pana Gutan Xapiak, nano sang mon no fo vesan a vata, xavala, laman e a maana mo xapiak lana.

²⁵ E sena Vovau Xaradak siim no fo ferawai la ngusuna sisiak siim, na tamamaam, na Devit malaan: “‘Xenaso a mu rabuna aava ri pife Juda ri sarak? Xenaso a mu Israel ri lamon faagut pana mo ri vungut sena?

²⁶ A mu memai king la mu bina, ri faigotan nari xa e a mu paamua ri faxuvul xena tisui a Piran e a saxa aava nane fo noxole, a Mataa Failai sina.’ Yanganan 2:1,2.

²⁷ A tuuna, na Herot nare Ponsus Pailat, a ro memai ti Rom, re fesavat sina mu Rom e mu rabuna ti Israel pe Jerusalem e ri fexuus kasam xena fasivi a Sisiak Xaradak siim, na Yesus aava nano Piran, no fo noxole.

²⁸ Lana gutan e texaasan siim a so ta mo no lamon faati o i taa savat, nari xo, ri fo fasavate.

²⁹ E naboxo, Memai, langai a kasalan siri e fagut a xunus imaam, mu sisiak siim, xena kuusan fasavat a Lagasai Roxo siim.

³⁰ Talangaimaan xe simaam pana gutan xena vil faroxoiaana rabuna e xena vil fasavat a mo fa'ipul e maana fakalimaanan lapaana isin sina Sisiak Xaradak siim, na Yesus.”

³¹ Lamina fenungan siri a nobina aava ri faxuvul lana a radakui e a Vovau Xaradak a fabas nari e ri fexuusan fasavat a ferawaian sina Piran pana gutan.

A Fangaasixan Sina Mu Rabuna Aava Ri Namkai

³² A mu rabuna aava ri namkai, ri faxuvul lana lamonan e nasaman siri. Pi ta mataa felamon saxaie pana maana mo xapiak sina. Taasaxa ri femiraaxan a maana mo siri.

³³ Pana gutan molava paaliu, a mu yaamut si Yesus ri lo kuusan a to fa'ulaian si Memai Yesus e a Piran a tavai nari pana xakaavangan xatam molava sina.

³⁴ Piau ta saxa la palou iri fe piau ta mo, senaso a rabuna pana maana mo xaves ri faasot pana xavala o lifu siri e siak a maana faat ina

³⁵ e ri maa tatavai pana xe sina mu yaamut. E nari, ri tavai a mu valagof pana.

³⁶ Na Yosep, a saxa ti lana pabung si Livai aava ri luxe pe Saipras, i taxa waan. A mu yaamut ri xalie pana xasa isin, na Baanabas, a malasuf ina a malaan: a mataa ina fagutaana rabuna.

³⁷ Nane faasot pana xavala sina e tavai a mu yaamut pana mu faat xapiak ina.