Faisok 3 - A Turoxoian Fa'ui Sina Piran

A Vil Faroxoiaana Saxa Mataa Tamu Maalapen

¹ Saxa yaan faasilak leaaf, la 3 oklok, na Pita nare Jon re taxa laak xe lana tang lifu lotu xena fenung xe sina Piran.

² Pave la matana vaabat lava ina tang lifu lotu aava ri xalie pana Yalaxau Magaaf, a toxan a maalapen. Nane toxane ti la modaxan sina e la maana yaan xapiak saxanu tuvaat ri fuuna yaase xe la Yalaxau Magaaf aave e faneie pave xena nung faat sina rabuna aava ri taxa laak xena naangus.

³ Layaan nane xalum na Pita nare Jon re taxa laak vaxa, nane fin nare pan' ta faat.

⁴ E na Pita xuvul pa Jon re xalum fatateaxe e na Pita a xuuse, “Xalum fatateak nemaame.”

⁵ E voxo, a maalapen a xalum fatateak nare senaso nane lamon o re taa tavaie pana saxa mo.

⁶ E mui na Pita a kuus laa, “Ne pi ta faat, taasaxa ne taa tavai nano pana xasa mo, lana gutan ina isi Yesus Krais ti Nasaret--- sangas.”

⁷ E na Pita a tao a pamamuaan sina mataa aave e xavang fatiginei a maalapen. E fataapus, a ro kana xapiak re fo roxo.

⁸ Nane xo tigina faroxo e sangas tapang xolai. Nane sangas e lalaas faagut e a kuus fati a isina Piran. E mui, nane laak xe la tang lifu lotu xuvul pa Pita nare Jon. Nane sangas e lalaas e kuus fati a isina Piran.

⁹ A mu rabuna pe la lifu aave ri xalum nane taxa sangas xolai e kuus fati a isina Piran.

¹⁰ E ri xalum taraxali nane a mataa tamu maalapen aava fuuna nai la Yalaxau Magaaf xena fenung faat xe sina rabuna. E nari, ri ipul faagut e ri pangaa senaso ri pife texaas o nane a roxo malaafaa.

Na Pita A Kuus Famatavas Pana Vil Faroxoiaana Maalapen

¹¹ Lavaxa, a mataa tamu maalapen i taxa doxot xolan na Pita nare Jon e a mu rabuna ri ipul faagut e ri falapukmaan xe sirutul lana saxa nobina ina tang lifu lotu aava ri xalie pana Bina si Solomon.

¹² Layaan na Pita a xalum a ipulan sina mu rabuna, nane xuus nari, “Mu Israel, senasou mi xalum fatateak nemaatul? Naak mi lamon o maame fo vil fasasangas a mataa aanabe' pana gutan o roxoyan simaame, bo? Piau!

¹³ A Piran si Abrahem, Aisaak e na Yaakop ve a Piran sina mu butaara, nane tavai a sisiak sina, na Yesus, pana isin lava layaan nane fatatoi fa'ulie ti la maatan. Nami, mi tavai a mu paamua simi pana xena punuxaana. E na Pailat, a memai ti Rom, nane tafo mulus tapine, taasaxa mi bai.

¹⁴ Na Yesus naang, a vilaana sina a xaradak, taasaxa mi baiane. Mi fin na Pailat o i taa mulus tapin a saxa mataa ina punuk mataa la vepen sina.

¹⁵ E mi punuk a mataa aava tavai netaara pana toyan tuuna, taasaxa Piran a fatatoi fa'ulie ti la maatan. E maam xalum tuuneie.

¹⁶ A mataa aanabe' xo, a mataa tamu maalapen aava mi texaas sena, a gutan si Yesus a vil faroxoie. Lana gutan e namkaian se Yesus, a mataa aanabe' i taxa tigina faroxo la matami.

¹⁷ “Naboxo mu fetinan, ne texaas o nami e mu paamua simi, mi fo vil a mo mosaat aanabe' lana vungutan simi.

¹⁸ Taasaxa lumua, a mu rabuna ina kuus fatuxai ri fo kuus o a Mataa Failai sina Piran i taa maasak faagut.” E tanin a mo aanabe' fo savat tuuna la matavas.

¹⁹ E voxo tanin, muluk a vilaana saat simi e puk a lamonan simi talo a Piran i taa lamon tapin a maana vilaana saat simi e a Yaan ina Fangaafusan Tuuna i taa savat sena Memai

²⁰ e a Piran i taa feng a Mataa Failai, na Yesus aava nane fo siak fatie, xe simi.

²¹ Taasaxa nane xo taa waan la xunavata fefexaxaas a yaan a Piran i taa vil fafa'ui a maana mo xapiak malaan sena mu rabuna ina kuus fatuxai ri fo kuusan famatavase.

²² Na Moses aava mataa ina kuus fatuxai sait, a kuus pa Yesus malaan: “‘A Memai, a Piran simi, i taa feng fasavat a saxa mataa ina kuus fatuxai ti la palou imi malaan sena fo fengau. E a mataa aave mi taa langai faagutan a maana mo i taa xuus nami pana.’ Vuputkai 18:15,18.

²³ Nase' ta rabuna ri langai pesalai, a Piran i taa ti votan nari xasena mu rabuna sina e ri taa maat.”

²⁴ “Aang, na Samwel e a mu rabuna ina kuus fatuxai lamina, ri fo kuusan famatavas a yaan ina savatan sina Mataa Failai sina Piran.

²⁵ A mu kuus fanaian sina Piran aava mu rabuna ina kuus fatuxai ri fo mo kuusane, nari va xataara xapiak. E vaxa, a kuus fanaian sina aava nane tavai a mu bumi pana, i taa xafut netaara xapiak sait. A Piran a xuus na Abrahem pa Yesus malaan: “‘A mu rabuna xapiak la xavala ri taa siak a roxoyan sena yaya siim.’ Tangpat 22:18; 26:4.

²⁶ Layaan a Piran a siak fati a sisiak sina, nane fenge xe simi paamua. E nane taa fafaamamaas nami layaan a puk tapin nami xasena maana vilaana saat simi.”