2 Timoti 4 - A Turoxoian Fa'ui Sina Piran

¹ Senaso ne tigina la matana Piran e na Krais Yesus aava i taa tafang a mu rabuna xapiak; nari aava ri taxa to lunai e nari aava ri fo maat xo e vaxa senaso ne taxa lalamon vulai pana fatataganan si Yesus e a ulaian sina, ne fasei faagutan nano:

² kuusan fasavat vulan a ferawaian sina Piran. La maana yaan xapiak tamo a rabuna ri buk langai o piau, kuusan fasavate; xuus faxaradak nari, baras nari e fagut nari. Fepitaa faroxo pana fangaasixan.

³ Ne fasei nano malaan senaso a yaan taxa savat layaan a rabuna ri taa baian a fepitaian roxo ina namkaian sitaara. Ri taa famasi a vubuxanan siri pana faxuvul fakaliuan nari xa pana mu rabuna ina fepitaa bit aava ri taa xuus fafaamamaas nari pana vubuxanan siri.

⁴ Ri taa puk tapin nari xasena tuunayan xena langai a xuuskuus ti kavai.

⁵ Taasaxa nano xo, no lamon fatak la maana yaan xapiak, tigina fatateak lana lagafan, kuusan fasavat a Lagasai Roxo e vil xapin a maana faisok ina ngavuk siim.

⁶ E nenia xo, a yaan a faasilak layaan ne taa maat malaan sena tatavai xe sina Piran xuluna ivin ina faraaman. E a yaan xena ta'ulan a toyan siak fo savat xo.

⁷ Ne fo fevis faroxo, ne fo fataxapin a falayan siak e ne pife poxo lana namkaian siak.

⁸ E voxo pe la xunavata a toxan a ligilot xanak aava i taa fakalimaan a vilaana roxo siak. E lana yaan lava aave, a Memai aava fuuna tiis faroxo vulai, i taa pisinganau pana. Pife nenia mon taasaxa nase' ta rabuna aava vilaana siri a faxaalit o ri taxa waan bang a ulaian si Yesus.

Xasano Ferawaian Si Pol

^9-10 Tamo no fexaxaas sena, filimaan fataapus senaso na Demas a usi soxot a maana mo ti la xavala e a ta'ulanau xena falet xe pe Tesalonaika. Na Kresens fo falet xe Galesia e na Taitus xe Daalmesia.

¹¹ Na Luuk mon taxa waan xuvul paga. Xel na Jon Maak e lisane xuvul pama senaso nane fexaxaas sena xavangau pana faisok siak.

¹² Ne fo feng na Tisikas xe pe Efasis.

¹³ Layaan no filimaan lisan a marapi ina xakaafutan siak aava ne ta'ulane pe Troas xuvul pa Kaapas; lisanmaan a mu kalayan ri waan xuluna vipin e a xasano kalayan vaxa.

¹⁴ Na Aleksanda, a mataa ina vavesai pana ʻaianʼ, a fasavat a lagafan molava xulok, a Memai i taa susuaa sena vilaana saat sina.

¹⁵ Faxatang faroxo sena, senaso nane tisui faagutan a lagasai sitaara.

¹⁶ Pi ta mataa a xavangau lana tatafangai mata siak, nari xapiak ri ta'ulanau. Ne nung a Piran o i taa pife tiis nari pana.

¹⁷ Taasaxa Memai a waan xuvul paga xena fagutau. E voxo ne fexaxaas sena kuusan fasavat a lagasai xapiak talo a mu rabuna aava ri pife Juda, ri langaie. E ne fakaxupan sena maatan.

¹⁸ A Memai taa fakaxupau sena maana saatan xapiak e i taa lisan faroxoiau xe sina fatataganan sina lu laa'ui la xunavata. Tavaie pana isin molava piis, vulai xe vulai. A tuuna.

A Fasisian Fataxapiak

¹⁹ Suai se Prisila nare Akwila e a matafetama si Onesiforas.

²⁰ Na Eraastus a waan pe Korin e na Tofimas aava giis, ne ta'ulane pe Miletus.

²¹ Filimaan fataapus talo no savat iau paamuina yaan ina xaing. Na Yubalas nari Pudens, Linus e na Klodia ri lisan a fasisian siri e vaxa xasano titaara lana namkaian.

²² A Memai i taa fagut a vovau siim. A xakaavangan xatam i taa xafut nano.