2 Korin 6 - A Turoxoian Fa'ui Sina Piran

¹ Nemaam, maam faisok xuvul pana Piran e maam faxaar nami talo mi taa pife saxam fepalauan a xakaavangan xatam sina.

² Senaso a Piran a kuus, “Lana yaan ina mamaaluxan siak ne langai nami e lana yaan ina fakaxupan, ne xavang nami.” Aisaia 49:8. E ne xuus nami o nabe' ve a yaan ina mamaaluxan e nabe' ve a yaan ina fakaxupan sina Piran.

A Maana Lagafan Aava Savat Si Pol

³ Maam pife vil ta mo xena fakalaxoi ta mataa senaso maam baian a faisok simaam taa siak a isin saat.

⁴ Taasaxa, senaso nemaam, maam mu sisiak sina Piran, maam taa xuus famatavas nami pana mu vilaana simaam: maam tigina fatateak lana mu lagafan, layaan maam xaxaalif pana maana mo e layaan maam pife texaas sena so ta mo maam taa vile;

⁵ layaan ri inis nemaam e pis nemaam, o tisui nemaam; layaan maam maare sena faisok xaves simaam, o maam pife fexaxaas sena matef o maam nasam a lagaian;

⁶ pana mu vilaana fatak e tuuna, pana masaman tuuna, pana vilaana fananap e fangaasik; lapaana Vovau Xaradak e lapaana vubuxan xasingitan tuuna;

⁷ pana ferawaian tuuna e lapaana gutan sina Piran; pana maana mo fatak ina fevisan la pamamuaan e la pamaxaiya.

⁸ Maam tigina fatateak; layaan ri suaian nemaam e layaan ri famangil nemaam, layaan ri kuusan pengan nemaam e layaan ri faatulan nemaam. Nemaam ve maam mu yaamut tuuna, taasaxa saxanofuna ri kuus o maam taxa bit.

⁹ Saxano rabuna ri kuus o nemaam ve maam rabuna palau, taasaxa rabuna la mu bina xapiak xo ri texaas semaam; maam taxa maat la vipin simaam, taasaxa maam taxa to lunai. Ri sip pengan nemaam, taasaxa ri pife punuk nemaam;

¹⁰ lana mamaxusan simaam maam taxa faamamaas; maam piau ta faat xaves, taasaxa maam fasavat a fafanaian molava xana maana rabuna; maam mu valagof, taasaxa maam toxan a maana mo xapiak.

¹¹ Maam fo ferawai famatavas xe simi mu Korin e maam pife fun a lamonan simaam.

¹² Maam pife rawetan nami pana vubuxan xasingitan simaam, piau, taasaxa mi rawetan nemaam pana vubuxan xasingitan simi.

¹³ Ne ferawei nami malaan se' mi mu rafulak siak; faxa'usi a vilaana simaam: faxalit nemaam pana vubuxan xasingitan simi malaan se' maam fuuna vile.

Muta Faxuvul Xuvul Pana Rabuna Aava Ri Pife Namkai

¹⁴ Muta faxuvul xuvul pana rabuna aava ri pife namkai. A roxoyan e saatan va re fexaxaas malaafaa? Piau! A malang e suk va re taa faxuvul malaafaa? Piau!

¹⁵ Na Krais e na Belail aava ri xalie pa Setan, re pife fexaxaas. E a mataa aava namkai se Krais e nane aava pife namkai, nare vaxa, re pife fexaxaas.

¹⁶ A tang lifu ina naangusan sina Piran e a lifu lotu sina mu piran bit re fexaxaas malaafaa? Piau, senaso netaara ve taara lifu ina naangusan sina Piran aava taxa to. A malaan sena Piran fo kuus, “Ne taa taagul xuvul pari e sangas la palou iri e ne taa piran siri e nari, ri taa rabuna siak.”

¹⁷ Lana Xakalayan Taap: “A Memai a kuus, ‘E voxo savat faapalau maan e mi waan patak seri. Muta tao a mo lalosaat e ne taa turoxoian nami.’” Aisaia 52:11.

¹⁸ A Memai pana Gutan Xapiak a kuus fulaa: “Ne taa Tamami e nami, mi taa mu rafulak tomexaan e rafulak tefin siak.” 2 Saamwel 7:14; 7:8.