2 Korin 2 - A Turoxoian Fa'ui Sina Piran

¹ E voxo ne lamon faati o ne taa pife savat fulaa xena famamaxus nami.

² Tamo ne taa famamaxus nami, nase' fulaa taxa waan xena fafaamamaasau, nami mon aava ne fo famamaxus nami.

³ A maana mo aava ne kala pana paamua, ne vile talo layaan ne savat simi, ne taa piau ta lagafan la xunus iga seri aava ri taa fafaamamaasau. Ne lamon tuuna o mi taa waan xuvul paga lana faamamaasan siak.

⁴ Ne kala xe simi pana maasaxan e lagafan la xunus iga e pana taangiisan xaves sait. Ne pife vile xena famamaxus nami taasaxa xena xuus nami pana vubuxan xasingitan molava siak xe simi.

Taara Taa Lamon Tapin A Vilaana Saat Sitaara

⁵ Tamo ta saxa a fasavat a mimilisaatan, nane pife muluxau mon, taasaxa nane muluk famodak nami vaxa. Ne bai ferawai faagut temasaat pana mimilisaatan aanabe'.

⁶ A fakasanaman xaves simi aava mi fo tavaie pana, a fexaxaas sena.

⁷ Naboxo si, mi taa lamon tapine e famalulume talo i taa pife kanamsaat temasaat.

⁸ E voxo ne faxaar nami o mi taa faxalit fulane pana vubuxan xasingitan simi.

⁹ Ne kala xe simi malaanabe' xena tatexaas tamo mi taa tigina fatateak lana tatafangai e langai a maana mo xapiak aava ne xuus nami pana.

¹⁰ Tamo mi lamon tapin a vilaana saat sina saxa, nenia sait ne lamon tapine. E a so ta mo ne fo lamon tapine, tamo a toxan tuunei a mo xena lamon tapine, ne fo lamon tapine la mata Krais xena xavang nami

¹¹ talo na Setan i taa pife fa'onam netaara. Senaso taara fo matavas sena maana buk vilaana saat sina.

A Lisanaana Turoxoian Fa'ui

¹² Lavaxa, layaan ne falet xe pe Troas xena kuusan fasavat a Lagasai Roxo se Krais, ne texaas o a Memai fo kas a salan xena faletan siak.

¹³ Taasaxa ne piau ta luaian lunai la xunus iga senaso ne pife tingin na titaara, na Taitus, pave. E voxo ne ta'ulan nari e ne falet xe pe Mesidonia.

¹⁴ E voxo, la xuvulaian xuvul pa Krais taara kuus faasiroxo xe sina Piran aava paamuian vulan netaara lana sangasan ina vuktol e feng netaara aava taara malaan sena lasan roxo i Krais, xena xuus fatexaasaana rabuna sena.

¹⁵ Senaso a Piran a lamon o netaara ve taara lasan i Krais la palou ina mu rabuna aava ri taxa fakaxupan e nari aava ri taxa kawaasanan.

¹⁶ Xe sina saxa, taara malaan sena lasan ina maatan e xe sina xasafuna a lasan ina toyan. E nase' fexaxaas tuuna sena vil a faisok ina ngavuk lava aanabe'?

¹⁷ Maam pife kuusan fasavat a Lagasai Roxo xena fasavataana faat malaan sena saxanofuna, piau. Lapaa Krais maam ferawai la matana Piran pana nasaman roxo, malaan sena rabuna aava Piran fo feng nari.