Vilipia 1 - Tennet

Zawinet ci Pa̱u̱lo̱

¹ Annita Pa̱u̱lo̱ ki Ti̱mo̱te̱yo̱ wak ke̱e̱ggi̱nna̱ du̱cca̱k cik Ye̱su̱ Ki̱ri̱sto̱ ko̱ cik keherya waraga cu. Keherika waraga cu ol wak a̱tu̱ zoz ci Ye̱su̱ Ki̱ri̱sto̱ o̱rge̱ ci een Vilip, keherika bu̱k lo̱ddi̱ki̱re̱ cik ke̱le̱ci̱o̱ veelek.

² Anyik bai deten ki gano kize cunno̱ng ci a̱kku̱ ngati Ta̱mu̱ta̱dde̱n Be̱e̱ti̱nna̱ ki Manyi Ye̱su̱ Ki̱ri̱sto̱.

Kalac Ta̱mu̱ta̱dde̱n kanycik zany

³ Ming ka̱a̱da̱nnu̱ng anna i̱ge̱t odohize, kanyike anna Ta̱mu̱ta̱dde̱n cinanni zany.

⁴ Kala anna Ta̱mu̱ta̱dde̱n odohize talninta, ming kalaye zo̱ze̱ cunno̱ng do̱o̱k.

⁵ Imma zo̱ze̱ ci kozol naga ki i̱ge̱ta̱ ngati kuwahek ol kaviyak cik abunna balik iziktu niga bali oowa ke̱.

⁶ Ka̱gga̱ anna zoz ci kozozi ko̱, edeccak atin Ta̱mu̱ta̱dde̱n bali akane zoz ci abunna baize cunno̱ng ke̱, li̱ngli̱ngo̱n cinne zee ki̱ki̱ya̱ i̱i̱te̱ni̱ ci okko Ye̱su̱ Ki̱ri̱sto̱ obodak lo̱o̱c.

⁷ Aavtiyyu niga odohize zinine cinanni, kirezung anna i̱ge̱t oroot, abunna zin ming kabai anna go̱o̱le̱ necu ngatinno̱ng. Ming kaave ngati kapirnane lagama ko̱ icima kuwahek ol kaviyak cik abunna, eeltau niga do̱o̱k li̱ngli̱ngo̱n ci kozol naga ki i̱ge̱t deten ci Ta̱mu̱ta̱dde̱no̱ ki annit bu̱k.

⁸ A̱gga̱ Ta̱mu̱ta̱dde̱n bu̱k korongi anna ki̱vo̱nnu̱ng kar kirezung ki i̱yo̱ko̱ ming irez Ye̱su̱ Ki̱ri̱sto̱ ol ko̱.

⁹ Een necu lawinet cinanni kalawe Ta̱mu̱ta̱dde̱n abunna rezinet cunno̱ng ngatinne kotore oroot kar a̱gga̱c zoz cinne ju̱rru̱m,

¹⁰ kar atin niga a̱gga̱c gi̱i̱ ci abunna kar kize caala ci iróng anyak kaal cik gerzek zee ki̱ki̱ya̱ i̱i̱te̱ni̱ ci okko Ki̱ri̱sto̱ obodak lo̱o̱c,

¹¹ a̱a̱nyu̱ng atin Ye̱su̱ Ki̱ri̱sto̱ i̱li̱ngli̱nge̱t u̱tu̱gu̱z kaal cik abunna cik aanyik ol ki̱di̱ngdi̱nga̱ni̱t kar bo̱do̱k kinnatit Ta̱mu̱ta̱dde̱n.

Uwe pirnanet ci Pa̱u̱lo̱ kaviyak cik abunna ta̱dde̱na̱

¹² Gotonogga ki ngonogga, i̱yo̱ko̱ korongnyung a̱gga̱c zoz bali ogonika ol annit ke̱ ci aanyik kaviyak cik abunna koot oowa.

¹³ I̱yo̱ko̱ zin, i̱ye̱la̱i̱ zoz necu ju̱rru̱m ngati ol wak ebek ce̱e̱z ci alaano ki ol do̱o̱k, ming kecebje anna lagama zo̱ze̱ ci Ki̱ri̱sto̱.

¹⁴ Eci zo̱ze̱ ci kecebine anna ko̱, aanyik zoz necu komiz gotonogget cik meelek a̱tu̱ Manyi kuwaktek ol zoz ci Ta̱mu̱ta̱dde̱no̱ oroot kodoit zi̱nze̱tti̱ kak, iróng nege ngen o̱ngo̱o̱le̱ gi̱i̱ imma.

¹⁵ Een de̱de̱ anyak ol cik uwak zoz ci Ki̱ri̱sto̱ go̱o̱le̱ ci anyahe nege meder ki jooret, ma̱i̱je̱ ol uggak uwak zi̱nze̱tti̱nne̱ cik voorik.

¹⁶ Ogon nege rezinta, a̱gga̱ kecebje anna zo̱ze̱ ci kaviyak cik abunna ko̱.

¹⁷ Imma ol wak een mederyok ko̱, uwahek ol zoz ci Ki̱ri̱sto̱ go̱o̱le̱ ci oronge nege kaal cik orong zi̱nze̱tti̱ cigge̱k, iróng een zoz ci een de̱de̱, orong nege kamarta annita nong ming kecebje lagama niko ko̱.

¹⁸ Abarik iróng zin zoz necu ogon gi̱i̱ imma, zoz ci riili icu, ming uwak ol zoz neci zi̱nze̱tti̱nne̱ cik gerzek icima cik abunna, uwahe zoz ci Ki̱ri̱sto̱. Kar zin zo̱ze̱ necu katalne zin anna. De̱de̱, katalne atin anna udut,

¹⁹ eci ka̱gga̱ anna lawinte ci alawekkang niga annita Ta̱mu̱ta̱dde̱n, ki bo̱do̱k eelannet ci aanyet Vongizi ci Ye̱su̱ Ki̱ri̱sto̱, ovvo kaala ne̱k gerzek i̱nna̱ka̱ annita ko̱ ukce atin kizeto kaal cik a̱ti̱ri̱za̱n.

²⁰ Gi̱i̱ zin ci korongi anna oroot ko̱ icu, karike zinin oroot, kar zin iróng adaka a̱li̱ya̱ni̱, abarik kanyai komiz ci kanime zoz, kar zoz ci Ki̱ri̱sto̱ ki̱di̱ngdi̱nga̱ne̱ eliye cinanni, go̱o̱le̱ ci ngen anna karugi icima ka̱da̱ha̱.

²¹ Eci ngatinanni, een rugeti Ki̱ri̱sto̱ kaale do̱o̱k, kar ming ka̱da̱i̱ ngati ka̱li̱ngli̱nge̱ zoz cinne ko̱, kamuda atin muci.

²² Iróng anna ka̱gga̱ kar katahala nya. Abarik kabai zin anna kar ki̱li̱ngli̱ng zoz ci abunna ngu̱me̱ ci Ta̱mu̱ta̱dde̱no̱.

²³ Abarik odoi kar katahala. Korongi ka̱da̱k kar ka̱vvu̱ta̱ ki Ki̱ri̱sto̱, eci go̱o̱le̱ necu abunna oroot.

^24-25 Abarik ka̱gga̱ anna ngen niga do̱o̱k orongnyang annita. Ka̱gga̱ ngen atin kabak ki i̱ge̱t bu̱k, kar atin keelaung i̱ge̱t do̱o̱k a̱gga̱c kar a̱vvu̱t talninta tu̱we̱nte̱ cunno̱ng.

²⁶ Kar ming ki̱ki̱ya̱u̱ng anna i̱ge̱t dee, ovvo atin niga a̱gga̱yyu̱ keng ci zoz ci abunna odongnyu niga e̱le̱tti̱ ngati Ye̱su̱ Ki̱ri̱sto̱ zo̱ze̱ cinanni.

²⁷ Ming i̱na̱ku̱ng no̱ngi̱tto̱na̱ uggak, abait baiz ci abunna anyahak bunnat kaviyaha cik Ki̱ri̱sto̱. Ming ki̱vo̱nnu̱ng icima iróng ka̱kku̱ni̱, ka̱gga̱ atin anna abakku niga baiz ju̱rru̱m nga̱to̱de̱, okkomnu kak, ogon ki e̱e̱ti̱ co̱de̱ ming a̱tu̱ kaviyak cik abunna.

²⁸ Ma o̱ngo̱o̱li̱nnu̱ udut ol cik amarinnung i̱ge̱ta̱. Een necu zoz ci i̱ye̱la̱ egerzan atin Ta̱mu̱ta̱dde̱n nogo, ma̱i̱je̱ niga amudannu atin ti̱ri̱ze̱ne̱t ngati Ta̱mu̱ta̱dde̱no̱.

²⁹ A̱a̱nyu̱ng enne baiz ci ogon niko zo̱ze̱ ci Ki̱ri̱sto̱, ma a̱tu̱yyu̱ nonno do̱ niko, abarik bo̱do̱k amudannu atin pirnanet zo̱ze̱ cinne,

³⁰ eci niga amudannu pirnanet ki bali ming icinntu niga kapirna anna ke̱, iziyyet zin, ngen anna kapirna dee rok i̱yo̱ko̱.