Ti̱to̱ 1 - Tennet

Waraga wa eherik Pa̱u̱lo̱ Ti̱to̱

¹ Annit Pa̱u̱lo̱ wa atahala Ta̱mu̱ta̱dde̱n kize du̱ca̱i̱t cinne kar zin bo̱do̱k kize to̱ni̱a̱t wa Ye̱su̱ Ki̱ri̱sto̱ bali atahalai ke̱. Ki̱tto̱nna̱i̱ kar ki̱ki̱ya̱ kanyahak tu̱we̱ne̱t ol wak engera Ta̱mu̱ta̱dde̱n, kar kedemez nogo ka̱gga̱c zoz wa een de̱de̱, kar ki̱ye̱le̱k nogo gool ci abahe nege ngati o̱ngo̱o̱li̱nne̱ Ta̱mu̱ta̱dde̱n.

² Aave tu̱we̱ne̱t ki gga̱we̱ne̱t zoz ngati zoz ci karike naga zi̱nze̱tti̱ ko̱, a̱kku̱ zo̱ze̱ ci baiz ci aave udut, nonno ci een Ta̱mu̱ta̱dde̱n, iróng enne ovolongi, u̱du̱wa̱ zoz neci ming ngen enne kidiman ta̱mu̱-keng ki lo̱o̱c,

³ kar doize cinne, idiman enne lo̱lo̱yo̱k kar enne kanyahak zoz cinne nginti voori go̱o̱le̱ ci aanya enne kar kuwahek ol kaviyak ne̱ke̱. Ta̱mu̱ta̱dde̱n ti̱ri̱zo̱i̱t cinna ci a̱du̱wa̱ka̱n,

⁴ Keheriki zin anna waraga necu i̱nne̱ta̱ Ti̱to̱, wa u̱tu̱gu̱ ki ngeranni tu̱we̱nte̱ ci kozol naga ko̱: Anyik Ta̱mu̱ta̱dde̱n wa een Be̱e̱ti̱nna̱ ki Ye̱su̱ Ki̱ri̱sto̱ Ti̱ri̱zo̱i̱t cinna kaanyi deten ki baiz yahe.

Li̱ngli̱ngo̱n wa Ti̱to̱

⁵ Kungneki ba̱li̱ye̱ lo̱o̱c ci een Crete, abunna ming edecak li̱ngli̱ngo̱n bali ngen anna kedecak ke̱, kar bo̱do̱k tahala nyakanganet o̱ro̱gjo̱we̱ ne̱ke̱ ki bali ming ka̱du̱wa̱ki̱ ke̱.

⁶ Abunna e̱e̱ti̱ ci een nyakangan ming ogon kaal cik abunna. Abunna ming o̱de̱ nonno ngaa ṯok niko. Abunna dooli ciginnek ming a̱tu̱ Ye̱su̱, kar bo̱do̱k iróng a̱vi̱r o̱o̱tti̱.

⁷ Abunna ming abak baiz ci emede eci enne een tuwayoit ci Ta̱mu̱ta̱dde̱no̱. Gerza ming idica zinin, gerza ming een bba̱kco̱i̱t, gerza ming een e̱e̱t ci jo̱o̱re̱ttu̱, gerza ming anyak zinin ci a̱ppwe̱ o̱ro̱bi̱ya̱i̱.

⁸ Abarik, abunna ming irez e̱re̱nno̱k, kar bo̱do̱k katal ku̱tu̱gu̱ kaal cik abunna, abunna ming anyak urutoit zoza, abunna ming ogon kaal cik een de̱de̱, anyik kabak baiz ci abunna a̱li̱le̱.

⁹ Abunna ming a̱gga̱m enne kaviyak cik Ye̱su̱ balik edemeze ol nonno ke̱; kar atin enne ki̱ti̱lo̱ ol de̱mzi̱nte̱ neci, bak i̱ye̱la̱ ba̱ci̱nno̱k cik ol wak abure de̱mzi̱ne̱t neci.

U̱du̱wa̱ Pa̱u̱lo̱ zoz ci li̱ngli̱ngo̱n ci Nyakanganet wak ovolongi

¹⁰ Anyak ol cik meelek ibbez de̱mzi̱ne̱t wa een de̱de̱, edemez nege ol de̱mzi̱ne̱t ci een darace kar ku̱lu̱te̱t ol. Een zoz necu de̱de̱ ngati ollik Ya̱u̱do̱ wak orong ol kettedit wucic vi̱ca̱vi̱cce̱t kar kurubta ti̱ri̱ze̱ne̱t.

¹¹ Ma anyike nyakanganet cik volongak ko̱ ke̱de̱me̱zi̱t ol cik Ta̱mu̱ta̱dde̱no̱, eci de̱mzi̱nte̱ neci egerzanit ol cik meelek oroot, iróng ngen elemi zoz ci een de̱de̱. Orong demezyaha cik ogon niko o̱ro̱bi̱ya̱ cik ollu.

¹² Anyak ba̱li̱ye̱ a̱ri̱to̱i̱t ci abak lo̱o̱ce̱ ci olli Crete, u̱du̱wa̱ zoz ci obod ki nogo, ize ne, “Een ol cik abak o̱rge̱ ci Cretans ko̱ do̱o̱k volongnyok; u̱tu̱gu̱zzo̱ nege ki elegje, kar bo̱do̱k kizeto gu̱u̱rwa̱ ki elemnyok.”

¹³ Een zin zoz necu de̱de̱, ti̱lo̱ zin abarik i̱nna̱ nogo ju̱rru̱m, kar zin kokommit tu̱we̱nte̱ cinne̱ng.

¹⁴ Abunna ming abiliz zoz ci azikne nga̱ri̱de̱t wak Ya̱u̱do̱, ki zoz ci a̱du̱wa̱ ol wak utuburet zoz wa een de̱de̱.

¹⁵ Caalette kaala do̱o̱k paz ngati ol wak anyak zi̱nze̱tti̱ cik voorik. Ma̱i̱je̱ ol wak gerzek baizi, iróng bo̱do̱k a̱tu̱we̱, a̱zze̱ gi̱i̱ imma ci caale to, eci zi̱nze̱tti̱ cigge̱k ki o̱o̱tti̱ do̱o̱k u̱la̱ltte̱.

¹⁶ A̱du̱wa̱k nyakanganeta ne̱k volongak ol zoz ci azi ne ka̱gga̱yya̱ Ta̱mu̱ta̱dde̱n, ma̱i̱je̱ abarik abure Ta̱mu̱ta̱dde̱n go̱o̱le̱ ci abahe nege. Ogon kaal cik gerzek.