Roma 7 - Tennet

Oogjai ol wak a̱tu̱we̱ komize ci lo̱ti̱nno̱u̱

¹ Gotonogga ki ngonogga tu̱we̱nta̱, a̱gga̱yyu̱ niga abal lo̱ti̱nno̱wa̱ e̱e̱t ming ngen aruge.

² Ki i̱yo̱ko̱ e̱he̱rye̱ lo̱ti̱nno̱wa̱ azi ne, anyik ngaa kodowozik mac cinne do̱ niko ming ngen enne aruge. Ming a̱da̱k e̱e̱ti̱ cinne, arume wo̱ye̱ ki e̱e̱t imma labak.

³ Ming okko enne arume ki e̱e̱t imma ming ngen e̱e̱ti̱ cinne aruge, orooto enne ki e̱e̱t neci. Abarik ming a̱da̱k mac, iróng wo̱ye̱ lo̱ti̱nno̱wa̱ alam nonno, a̱ti̱k wo̱ye̱ e̱e̱ti̱ imma nonno labak.

⁴ Gotonogga ki ngonogga tu̱we̱nta̱, aave baizi ci ogon niko bu̱k ngatinno̱ng. Iróng lo̱ti̱nno̱wa̱ bo̱do̱k anyak ngatinno̱ng komiz ci kar kabalung, eci bali a̱da̱kne̱ Ye̱su̱ ke̱, ogon ki i̱yo̱ko̱ bu̱k a̱da̱kttu̱ niga ki nonno lo̱ti̱nno̱we̱. Anyakku zin niga gool ci arumenu ki Ki̱ri̱sto̱ bali ingazi daiza kurug ke̱, abunna zin ka̱li̱ngli̱nge̱k Ta̱mu̱ta̱dde̱n.

⁵ Baling ngen ku̱tu̱we̱t zoz ci Ta̱mu̱ta̱dde̱no̱, kogon naga mu̱nye̱n cik irez e̱le̱tti̱ cigga̱c do̱ niko, mu̱nye̱n cik i̱ye̱la̱ lo̱ti̱nno̱wa̱ cik Ta̱mu̱ta̱dde̱no̱, anyahakket atin daiz.

⁶ Ma̱i̱je̱ ngatu, iróng lo̱ti̱nno̱wa̱ ngen abaleta. Ku̱tu̱gu̱zzo̱ naga kiwagon ol wak a̱da̱i̱to̱ baling ngen abalet lo̱ti̱nno̱wa̱, i̱llo̱i̱ zin komiz ci anyak lo̱ti̱nno̱wa̱ ngatinna. I̱yo̱ko̱, ka̱li̱ngli̱nge̱k naga Ta̱mu̱ta̱dde̱n go̱o̱le̱ ci Vongiz ci een jor, iróng een go̱o̱le̱ bali reeni ko̱ngo̱o̱li̱ne̱ lo̱ti̱nno̱k balik e̱he̱rye̱ ke̱.

I̱ye̱le̱kke̱t lo̱ti̱nno̱wa̱ zoz ci mu̱nye̱nu̱

⁷ I̱yo̱ko̱ zin kazi wo̱ye̱ naga ne? Een lo̱ti̱nno̱wa̱ mu̱nye̱n? Iróng een niko! Ming iróng lo̱ti̱nno̱wa̱ i̱ye̱le̱kke̱t mu̱nye̱n, iróng wo̱ye̱ da̱ anna ka̱gga̱ mu̱nye̱n de̱de̱. Iróng bo̱do̱k wo̱ye̱ anna ka̱gga̱ gi̱i̱ ci e̱e̱to̱ amanik zinin cinne gerze, eci azi lo̱ti̱nno̱wa̱ ne, “Ma anyai zinin ci a̱ppwe̱ ce̱e̱ze̱ ci e̱e̱t imma.”

⁸ Abarik zin mu̱nye̱n cik a̱ki̱v gool ci lo̱ti̱nno̱u̱ kar anna ku̱tu̱gu̱ kaal cik gerzek orong zinin cinanne. Een mu̱nye̱na̱ daiz ngati a̱zze̱ne̱ lo̱ti̱nno̱wa̱ to.

⁹ Baling ngen anna ka̱gga̱ lo̱ti̱nno̱k ke̱, kabai bali ju̱rru̱m. Ma baling kokko anna ka̱gga̱ lo̱ti̱nno̱k vu̱rrta̱, i̱vi̱ta̱ mu̱nye̱na̱ anyait komiz ngatinanni,

¹⁰ Baling kokko kacinni niko, abarik lo̱ti̱nno̱wa̱ wak balik abunna weda kamudane ruget ke̱, anyaktta daiz.

¹¹ Aanya mu̱nye̱na̱ kozorzore baizi cinanni go̱o̱le̱ ci lo̱ti̱nno̱u̱. Imma zin go̱o̱le̱ ci mu̱nye̱nu̱ kuruba daiz.

¹² I̱yo̱ko̱ zin, i̱li̱le̱c lo̱ti̱nno̱wa̱ ki zoz ci a̱du̱wa̱ do̱o̱k abunna.

¹³ Ming abunna lo̱ti̱nno̱wa̱, nya zin ci ozorzoran baiz cinanni kize gerza? Mu̱nye̱n cik aanya annit daiz ngati kogonne gi̱i̱ ci abunna lo̱ti̱nno̱we̱. Iróng een lo̱ti̱nno̱k de̱de̱ cik anyik baiz cinanni kize gerza.

¹⁴ Ka̱gga̱ naga niko, a̱vvu̱ lo̱ti̱nno̱wa̱ ngati Ta̱mu̱ta̱dde̱no̱, ki i̱yo̱ko̱ anna ming kazunne lo̱ti̱nno̱k balik reentik baize cinanni ke̱, ecebta annit bu̱k mu̱nye̱na̱.

¹⁵ De̱de̱, iróng anna ka̱gga̱ gi̱i̱ ci kogonni. Eci gi̱i̱ wa korongi anna ku̱tu̱gu̱ ko̱, ngen abarik ku̱tu̱gu̱, abarik ku̱tu̱gu̱ gi̱i̱ ci abure zinin cinanni oroot.

¹⁶ Ma̱i̱je̱ nu̱nu̱n ming ku̱tu̱gu̱ gi̱i̱ ci iróng anna korongi kar ku̱tu̱gu̱, ngen anna kelemi niko een lo̱ti̱nno̱wa̱ kaal cik abunna.

¹⁷ Iróng een annit ci kogonni kaal cik gerzek mu̱nye̱nu̱, abarik een mu̱nye̱n cik abak eliya cinanni ko̱, cik ogon kaal ne̱ko̱ do̱o̱k.

¹⁸ Ka̱gga̱ niko i̱llo̱i̱ gi̱i̱ imma eliya cinanni ci aanya kar ku̱tu̱gu̱ kaal cik abunna. Ma̱i̱je̱ nu̱nu̱n ming korongi ku̱tu̱gu̱ kaal cik abunna abarik ogone kaala cik gerzek.

¹⁹ Imma anna korongi ku̱tu̱gu̱ gi̱i̱ ci abunna, abarik karuba ele kogonni kaal cik gerzek iróng anna korongi ku̱tu̱gu̱.

²⁰ I̱yo̱ko̱ zin, ming kogonni anna gi̱i̱ ci iróng zinin cinanni orong ku̱tu̱gu̱, abarik zin iróng een annit ci kogonni, een mu̱nye̱n wak abak ngatinanni cik ogoni.

²¹ Ming orong zinin cinanne ku̱tu̱gu̱ gi̱i̱ ci abunna, abarik kamuda ele cinanni ku̱tu̱gu̱ gi̱i̱ ci gerze, lo̱ti̱nno̱k cik aanya annit ku̱tu̱gu̱ niko.

²² Kelemi zin anna zinine cinanni do̱o̱k lo̱ti̱nno̱k cik Ta̱mu̱ta̱dde̱no̱.

²³ Kacinni zinine cinanni, anyak kaal u̱gge̱ cik ooro zinine cinanni, kecebe lagame ci lo̱ti̱nno̱k cik mu̱nye̱nu̱, alamte kaala wak ki̱no̱ni̱ korongi ku̱tu̱gu̱.

²⁴ Kiize anna e̱e̱t ci kamati! Ngene wo̱ye̱ ci eelanna daiza?

²⁵ Kanyike Ta̱mu̱ta̱dde̱n zany ngati Manyitinna Ye̱su̱ Ki̱ri̱sto̱! I̱yo̱ko̱ zin, ke̱e̱ni̱ anna zinine cinanni du̱ca̱i̱t ci lo̱ti̱nno̱k cik Ta̱mu̱ta̱dde̱no̱, imma go̱o̱le̱ ci mu̱nye̱nu̱ ke̱e̱ni̱ du̱ca̱i̱t ci lo̱ti̱nno̱k wak mu̱nye̱nu̱.