Roma 5 - Tennet

Kanyait naga gano ki Ta̱mu̱ta̱dde̱n

¹ I̱yo̱ko̱ zin, elemnyet Ta̱mu̱ta̱dde̱n tu̱we̱nte̱ cinna, kanyait zin naga gano ki Ta̱mu̱ta̱dde̱n ngati Manyitinna Ye̱su̱ Ki̱ri̱sto̱.

² I̱ye̱le̱i̱t zin Ye̱su̱ Ki̱ri̱sto̱ agit wak ka̱tu̱ nonno ko̱ gool ci kar Ta̱mu̱ta̱dde̱n kelemaita eci enne anyak deten, ka̱tu̱ bo̱do̱k naga nonno. Katalninna karikka zi̱nze̱tti̱ i̱i̱te̱n ci okko Manyi odongnyet okkoyyet ta̱dde̱na̱, kar ka̱vvu̱t ki nonno udut ngati a̱di̱ngdi̱nga̱ne̱ ol nonno.

³ Iróng zin ogon niko do̱o̱k! Katalne naga piryanzete ci kamuda eci ka̱gga̱ aanyyet piryanzet kinimet no̱ngi̱tto̱n,

⁴ okko nimenet no̱ngi̱tto̱n amad e̱e̱t ju̱rru̱m, kar kaanyyet kartik zi̱nze̱tti̱ Ta̱mu̱ta̱dde̱n.

⁵ Iróng zoz ci karike naga zi̱nze̱tti̱ Ta̱mu̱ta̱dde̱n ko̱ unyaneta, eci Ta̱mu̱ta̱dde̱n aanyyet agit rezinet cinne zi̱nze̱tti̱nne̱ cigga̱c go̱o̱le̱ ci Vongiz ci A̱li̱le̱, ci aanyet enne agita.

⁶ Ma baling i̱zzi̱ gool ci kar naga keelttai e̱le̱tti̱ cigga̱c, i̱ki̱ya̱ zin Ki̱ri̱sto̱ ti̱ri̱zo̱i̱ti̱ i̱i̱te̱ne̱ ci odola Ta̱mu̱ta̱dde̱n kar ka̱da̱k mu̱nye̱ne̱ cigga̱c.

⁷ I̱llo̱i̱ wo̱ye̱ e̱e̱t imma ci orong kar ka̱da̱k zo̱ze̱ ci e̱e̱t ci azunne lo̱ti̱nno̱k, orong wo̱ye̱ e̱e̱ti̱ imma ka̱da̱k zo̱ze̱ ci e̱e̱t ci abunna.

⁸ Ma̱i̱je̱ ba̱li̱ye̱, u̱tu̱gu̱ Ta̱mu̱ta̱dde̱n zoz necu, i̱ye̱la̱ bunnat cinne, baling ngen ke̱e̱ggi̱n naga ol cik mu̱nye̱nu̱, a̱da̱k zin Ki̱ri̱sto̱ zo̱ze̱ cinna.

⁹ Idimantet zin bi̱ye̱ta̱ cik Ye̱su̱ wak a̱ddu̱ta̱i̱ ko̱ kubunnta ju̱rru̱m, eelawet mozinte ci Ta̱mu̱ta̱dde̱no̱, kar Manyi kelemait zo̱ze̱ necu.

¹⁰ Baling ngen ke̱e̱ggi̱n mo̱ddo̱ cik Ta̱mu̱ta̱dde̱no̱ nu̱nu̱n, aganizet zin enne, eci a̱da̱k Ngerinne zo̱ze̱ cinna. I̱yo̱ko̱ zin, baling kaganto ki nonno, ka̱gga̱ naga kamuda atin baiz ci aave udut eci i̱ti̱ri̱zze̱t bi̱ye̱ta̱ cik Ngerinne Ye̱su̱.

¹¹ Katalninna zin oroot kaale do̱o̱k, eci Ta̱mu̱ta̱dde̱n i̱tto̱na̱i̱t Manyitinna Ye̱su̱ Ki̱ri̱sto̱ kar kanyait gano naga ol balik ke̱e̱ggi̱n mo̱ddo̱ cik Ta̱mu̱ta̱dde̱no̱ ke̱.

Zoz ci obod ki Adam ki Ye̱su̱

¹² Akane e̱e̱ti̱ co̱de̱ ṯok mu̱nye̱n kar mu̱nye̱na̱ ne̱ke̱ kanyaktak olli lo̱o̱tu̱ daiz. Bak kacin u̱tu̱gu̱zzo̱ ol do̱o̱k mu̱nye̱n, a̱da̱i̱ atin ol do̱o̱k zo̱ze̱ ci mu̱nye̱nu̱.

¹³ Anyak looci mu̱nye̱n baling ngen lo̱ti̱nno̱wa̱ cik Musesi ki̱vi̱ta̱. I̱llo̱i̱ gi̱i̱ ci i̱ye̱le̱k ol ming anyak nege mu̱nye̱n, eci a̱zze̱ lo̱ti̱nno̱wa̱ ba̱li̱ye̱ to.

¹⁴ Anyak daizi komiz ngati e̱e̱t ci diiri, akane ba̱li̱ye̱ i̱nya̱we̱ balik Adami ke̱ rok Muses. Okko daizi rok ol wak ngen ku̱tu̱gu̱zzo̱ mu̱nye̱n ki bali u̱tu̱gu̱ Adami ke̱.

¹⁵ Imma bo̱do̱k Adami ki Ye̱su̱ engero go̱o̱lo̱we̱ cik ogone nege kaal. A̱kku̱nna̱k daizi lo̱o̱c mu̱nye̱ne̱ cik Adami kar kuruma ol do̱o̱k. Okko zin Ye̱su̱ Ki̱ri̱sto̱ anyahak ol do̱o̱k muci ci een deten ci Ta̱mu̱ta̱dde̱no̱.

¹⁶ Anyak kaal cik aavtte do̱ mu̱nye̱ne̱ cik u̱tu̱gu̱ Adami cik iróng ogon ki muci ci Ta̱mu̱ta̱dde̱no̱. Anyaha Adami de̱zi̱ne̱t e̱e̱ti̱ co̱de̱ ci arrak akane mu̱nye̱n. Ma̱i̱je̱ muci ci Ta̱mu̱ta̱dde̱no̱ i̱ki̱ya̱ vu̱rrta̱ ngati kanyahe naga mu̱nye̱n cik meelek, kar enne keelawet kubunnta ngu̱me̱ cinne.

¹⁷ Abalet daizi ki i̱yo̱ko̱ alaani ko̱, eci Adami abaca. Iróng zin zoz necu atubo ki gi̱i̱ ci ogon Ye̱su̱ Ki̱ri̱sto̱. I̱i̱rke̱ Ta̱mu̱ta̱dde̱n ngatinna oroot, kar kaanyyet bunnat cinne ka̱vvu̱ baize cinna zo̱ze̱ ci e̱e̱t co̱de̱ ṯok, Ye̱su̱ Ki̱ri̱sto̱.

¹⁸ Okko atin Ta̱mu̱ta̱dde̱n edez ol do̱o̱k mu̱nye̱ne̱ cik e̱e̱t co̱de̱, wa een zara Adam. Imma zin zo̱ze̱ ci e̱e̱t co̱de̱, u̱tu̱gu̱ Ye̱su̱ Ki̱ri̱sto̱ ko̱, ngati a̱da̱kne̱ ta̱la̱ke̱ca̱, elema zin Ta̱mu̱ta̱dde̱n ol do̱o̱k kubunnta kar kurubta ruget wa aave udut.

¹⁹ Iróng ba̱li̱ye̱ Adami ngen azunne zoz ci Ta̱mu̱ta̱dde̱no̱ kar kanyahak ol do̱o̱k mu̱nye̱n. Imma Ye̱su̱ uzute zoz ci Ta̱mu̱ta̱dde̱no̱, anyahak ol zoz ci abunna, kar Ta̱mu̱ta̱dde̱n kelema ol do̱o̱k.

²⁰ Aanyik Ta̱mu̱ta̱dde̱n Muses lo̱ti̱nno̱k, kar ki̱ye̱la̱ ba̱ci̱nno̱k cik ollu meelek, ming ovvo ba̱ci̱no̱wa̱ e̱e̱ggi̱n meele giir, okko zin deteni ci Ta̱mu̱ta̱dde̱no̱ okkomi kak, i̱ye̱la̱ bunnat cinne.

²¹ Ki i̱yo̱ko̱, ming anyahak zin mu̱nye̱na̱ ol daiz lo̱o̱ta̱ ngatu; imma zin deteni abal ol bunnate ci Ta̱mu̱ta̱dde̱no̱ kar kaanyyet baiz wa aave udut ngati Ye̱su̱ Ki̱ri̱sto̱ Manyitinna.