Roma 4 - Tennet

Abunna Aburahami ngu̱me̱ ci Ta̱mu̱ta̱dde̱no̱ tu̱we̱nta̱

¹ Ki̱no̱ni̱ zoz ci ji̱ji̱ti̱nna̱ Aburaham, elemi Ta̱mu̱ta̱dde̱n nonno kubunna go̱o̱le̱ jang?

² Ming elema Ta̱mu̱ta̱dde̱n Aburaham kubunna kaale cik u̱tu̱gu̱ enne, anyak wo̱ye̱ enne gi̱i̱ imma ci odonge ele. Iróng wo̱ye̱ enne odong ele ngu̱me̱ ci Ta̱mu̱ta̱dde̱no̱.

³ E̱he̱rye̱ Warage ci Ta̱mu̱ta̱dde̱no̱ zoz ci azi ne, “Elema zin Aburahami zoz ci Ta̱mu̱ta̱dde̱no̱ kar enne kaanyik nonno kize e̱e̱t ci abunna.”

⁴ Imma gon ming a̱li̱ngli̱ng e̱e̱ti̱, a̱ru̱we̱k ol nonno o̱ro̱bi̱ya̱, iróng een muci.

⁵ Imma e̱e̱ti̱ ci iróng a̱li̱ngli̱ng ma̱i̱je̱ ngatu a̱tu̱ Ta̱mu̱ta̱dde̱n ci alalnek ol mu̱nye̱n, eci Ta̱mu̱ta̱dde̱n elemi tu̱we̱ne̱t cinne kize bunnat.

⁶ E̱he̱rye̱ Warage ci Ta̱mu̱ta̱dde̱no̱ ozoz Da̱vi̱de̱ ma̱yu̱we̱ne̱t ci e̱e̱t wa elema Ta̱mu̱ta̱dde̱n nonno kize bunnat, iróng een go̱o̱le̱ ci li̱ngli̱ngo̱n cinne. Azi Da̱vi̱de̱ ne,

⁷ “U̱mu̱yu̱k Ta̱mu̱ta̱dde̱n ol balik alalek enne nogo mu̱nye̱n, utung enne kaal wak gerzek u̱tu̱gu̱zzo̱ nege.

⁸ Amuda e̱e̱ti̱ ci i̱ti̱vi̱lta̱i̱ mu̱nye̱na̱ ciginnek veelek ma̱yu̱we̱ne̱t, iróng atin Manyi edez nonno.”

⁹ Ma i̱yo̱ko̱ een ma̱yu̱we̱ne̱t ci ol balik etted vi̱ca̱vi̱cce̱t een Ya̱u̱d ko̱ do̱, iróng een ci ollu do̱o̱k? Iróng een niko, azi bali Warage ci Ta̱mu̱ta̱dde̱no̱ ne, elema Ta̱mu̱ta̱dde̱n Aburaham kubunna eci enne a̱tu̱ nonno.

¹⁰ Akane zoz necu vonga? Akane baling ngen Aburahami ketted wucic vi̱ca̱vi̱ca̱ yo, icima ngati ettede? Akane baling ngen enne ketted.

¹¹ Aanyik Aburahami ele cinne kettede kar ki̱ye̱la̱ bunnat cinne eci enne a̱tu̱ Ta̱mu̱ta̱dde̱n ki bali ming ngen enne ketted wucic vi̱ca̱vi̱ca̱ ke̱ nu̱nu̱n. Aanyik zin zoz necu Aburaham kize be̱e̱ti̱ ol wak elemi Ta̱mu̱ta̱dde̱n tu̱we̱nte̱ cinne̱ng, ming iróng nege etted nu̱nu̱n.

¹² Een enne bo̱do̱k be̱e̱ti̱ ol do̱o̱k wak etted wucic vi̱ca̱vi̱ca̱, iróng nege ettede do̱, abarik annu gool ci tu̱we̱nto̱ ci owoye be̱e̱ti̱nna̱ Aburahami baling ngen enne kettede.

Amuda ol kaal cik u̱du̱wa̱ Ta̱mu̱ta̱dde̱n tu̱we̱nta̱

¹³ U̱du̱wa̱k Ta̱mu̱ta̱dde̱n Aburaham ki dooli cik dooli cigge̱k, okko atin enne aanyik nogo lo̱o̱c. Iróng enne a̱du̱wa̱ zoz necu eci Aburahami uzute lo̱ti̱nno̱k balik Musesi ke̱, abarik Ta̱mu̱ta̱dde̱n acin bunnat ci a̱kku̱ tu̱we̱nte̱ cinne.

¹⁴ Ming aanyik Ta̱mu̱ta̱dde̱n ol kaal ciginnek eci azunne nege lo̱ti̱nno̱k, okko ucca tu̱we̱ne̱t een gi̱i̱tareng, okko bo̱do̱k zoz ci u̱du̱wa̱ Manyi ogonik atin ol ko̱, een rara.

¹⁵ Ming iróng e̱e̱ti̱ azunne lo̱ti̱nno̱k, aanyik Ta̱mu̱ta̱dde̱n komoze; gool co̱de̱ ci iróng anyike Ta̱mu̱ta̱dde̱n komoze, abunna ming iróng kanyak lo̱ti̱nno̱k.

¹⁶ U̱du̱wa̱ Ta̱mu̱ta̱dde̱n, a̱mu̱yu̱k atin enne ol wak a̱tu̱ nonno, eci enne i̱i̱rke̱, anyak deten, irez ol, iróng een zo̱ze̱ ci azunne nege lo̱ti̱nno̱k. Ming anyak e̱e̱ti̱ tu̱we̱ne̱t ki ci Aburahami, a̱mu̱yu̱k atin Manyi nonno, iróng een ol wak azunne lo̱ti̱nno̱k do̱, abarik ki ol wak a̱tu̱ Ta̱mu̱ta̱dde̱n ki Aburahami, wa een be̱e̱ti̱nna̱ tu̱we̱nta̱.

¹⁷ E̱he̱rye̱ Warage ci Ta̱mu̱ta̱dde̱no̱ zoz ci obod ki Aburaham, azi ne, “Ma̱rri̱t ming kaanyi i̱nne̱t ize be̱e̱ti̱ i̱do̱ngi̱ cik meelek.” U̱du̱wa̱k Ta̱mu̱ta̱dde̱n nonno zoz necu eci enne anyak tu̱we̱ne̱t. Manyi ci aanyik ol wak a̱da̱i̱to̱ kuruget, kar kidiman kaal cik een jor.

¹⁸ U̱du̱wa̱k Ta̱mu̱ta̱dde̱n Aburaham zoz ci okko enne een be̱e̱ti̱ i̱do̱ngi̱ cik meelek, ming acin ize enne ma̱ti̱yo̱c nu̱nu̱n, ngen Aburahami arike zinin Ta̱mu̱ta̱dde̱n dee, ki baling u̱du̱ya̱i̱ ke̱, “I̱yo̱ko̱ zin ovvo atin dooli cigunnek e̱e̱ggi̱n niko.”

¹⁹ Ma baling ize Aburahami ma̱ti̱yo̱c anyak e̱rki̱nya̱ moten omoto, ngen enne a̱tu̱ Ta̱mu̱ta̱dde̱n zo̱ze̱ bali u̱du̱wa̱ enne ke̱. A̱gga̱ Aburahami ele niko ize ma̱ti̱yo̱c ere daiz, okko Sarah ngaa cinne ize ma̱ti̱yo̱c bu̱k, iróng ngen a̱ri̱ti̱.

²⁰ Iróng zin Aburahami i̱no̱n icima ebezbezan zoz bali u̱du̱wa̱ Manyi ke̱. Aanyik tu̱we̱ne̱t cinne nonno kokkom kak, aanyik zany Ta̱mu̱ta̱dde̱n.

²¹ A̱gga̱ enne anyak Ta̱mu̱ta̱dde̱n komiz kar ku̱tu̱gu̱ kaal balik u̱du̱wa̱ enne ke̱.

²² Zoz zin ci “elemane Ta̱mu̱ta̱dde̱n Aburaham kar enne kanyik nonno kize e̱e̱t ci abunna.”

²³ Ki i̱yo̱ko̱ ming kikeb naga Warage ci Ta̱mu̱ta̱dde̱no̱ ko̱. Iróng zin zoz een ci Aburaham do̱ ci elemi Ta̱mu̱ta̱dde̱n kize e̱e̱t ci abunna zo̱ze̱ ci tu̱we̱ne̱t cinne,

²⁴ abarik Ta̱mu̱ta̱dde̱n elemnyet kizet ol cik abunna ming karike naga nonno zinin, e̱e̱t bali ingane Manyitinna Ye̱su̱ Ki̱ri̱sto̱ daiza.

²⁵ Aanyyet Ta̱mu̱ta̱dde̱n Ye̱su̱ kar ka̱da̱k mu̱nye̱ne̱ cigga̱c, kar kitingawe nonno daiza, kar naga kizet ol cik abunna ngu̱me̱ ci Ta̱mu̱ta̱dde̱no̱.